قىركۇيەك ايىنىڭ باسىندا ەلوردا اۋماعىنداعى اۋىلدىڭ بىرىندە قايعىلى وقيعا بولدى. ابايسىزدا ەكى بالانى تراكتور باسىپ, ءبىر جەتكىنشەك وقيعا ورنىندا كوز جۇمدى. ال ەكىنشى بالا ەلوردالىق بالالار اۋرۋحاناسىنا جەدەل جەتكىزىلدى. اۋىر حالدە تۇسكەن ناۋقاستىڭ جاعدايىن حيرۋرگتەر, نەيروحيرۋرگ, تراۆماتولوگ جانە رەانيماتولوگتەر قاراپ, دەرەۋ اپپاراتقا قوسىپ, وپەراتسياعا الدى. بالا 10 كۇن جانساقتاۋ بولىمىندە جاتتى.
اۋرۋحانانىڭ تراۆماتولوگ دارىگەرى مۇحتار احمۇرزاەۆتىڭ ايتۋىنشا, قىز بالا كلينيكاعا جاراقاتتىق شوك جاعدايىندا ءتۇسىپتى. جامباس مۇشەلەرىنىڭ جاراقاتتارىنا شۇعىل جاسالعان وپەراتسيادان سوڭ جانساقتاۋ بولىمىندە كۇنى-ءتۇنى اق جەلەڭدى جانداردىڭ قاداعالاۋىندا بولعان ونىڭ جاعدايى جاقساردى. بىلايشا ايتقاندا, مامانداردىڭ كەلىسىلگەن ءىس-ارەكەتتەرىنىڭ ارقاسىندا بالا امان قالدى.
«بالا وتە اۋىر جاعدايدا, 3-دارەجەلى جاراقاتتىق شوك جاعدايىندا ءتۇستى. مامانداردىڭ ۋاقتىلى جەدەل كومەك كورسەتكەنى اسا ماڭىزدى بولدى. بالا اپپاراتقا قوسىلىپ, شوكقا قارسى تەراپيا جۇرگىزىلدى. شۇعىل تۇردە وتا جاساۋ كەرەك ەكەنى بەلگىلى بولدى», دەدى دارىگەر. بەس جاسار قىزدىڭ باسىنان وتكەن وقيعا ول وتباسى ءۇشىن قاتتى سوققى بولعانى راس. بىراق ايتەۋىر بىلىكتى ماماندار قيمىلىنىڭ ارقاسىندا بالاسى ولىمنەن قالعان. كۇن سايىن ىلگەرىلەپ, جاعدايى جاقسارىپ كەلە جاتقان بالاپانىن قۇشقان انانىڭ قۋانىشى نەمەن ولشەنبەك؟ دارىگەرلەرگە شەكسىز العىسىن قالاي جەتكىزەرىن بىلمەگەن اناسى قازىر قىزىنىڭ قاسىندا, كورەر جارىعىن تاۋىسپاعان اللا تاعالاعا رازىلىعىن بىلدىرەدى.
«قازىر قىزىمنىڭ جاعدايى دا, كوڭىل كۇيى دە جاقسى. اكەسىمەن بەينەبايلانىس ارقىلى تەلەفونمەن سويلەسىپ تۇرادى. بارلىق وتباسى, تۋىستاردىڭ اتىنان دارىگەرلەرگە مىڭ العىس ايتامىز. ءبىرىنشى, قۇدايدىڭ قالاۋىمەن, ەكىنشى, دارىگەرلەردىڭ ارقاسىندا قىزىمىز قازىر امان-ەسەن قاسىمىزدا», دەيدى قىزدىڭ اناسى.
ء«بىز دارىگەرلەر ءۇشىن دە قىزدىڭ امان-ەسەن شىعۋى ۇلكەن قۋانىش. جامباس پەن ءزار شىعارۋ جولدارى قاتتى زاقىمدانعان. قازىر بالانىڭ جاعدايى تۇراقتى. بارلىق پروتسەدۋرالاردى اياقتاعاننان كەيىن ۇيىنە شىعارىلادى», دەيدى حيرۋرگيالىق ءبولىمنىڭ باسشىسى رينات بايگيرەەۆ.
