مەديتسينا • 23 قىركۇيەك، 2020

بيىك وكشە كيۋ دە باقىت (پاتسيەنت مۇنى 30 جىل ارمانداعان)

49 رەت كورسەتىلدى

ارمانداردىڭ ۇلكەن-كىشىسى بولا قويماس. بىراق كادىمگى ەل سياقتى قالاعان اياق كيىمىن كيۋدى، اۋىرسىنباي ءجۇرۋدى الماتىلىق جادىرا 30 جىلعا جۋىق ارمانداعان.

بيىل ناۋرىز ايىندا الما­تى­داعى №4 قالالىق كلي­ني­كالىق اۋرۋحانانىڭ حيرۋرگ-ورتوپەدتەرى جادىرا يساەۆانىڭ جامباسىنداعى ءتۋابىتتى كەمىستىگىن تۇزەتۋ ءۇشىن ەندوپروتەزدەۋ وتاسىن وڭدى وتكەرگەن بولاتىن. سول العاشقى وتادان كەيىن قىركۇيەك ايىندا دارىگەرلەر سول جاق جامباسىنا دا رەۆيزيا جۇرگىزدى. ال بۇل كۇندى 30 جىلداي كۇتكەن پاتسيەنت قازىر 43 جاستا، ەندى مىنە، ەل سياقتى ادەمى اياق كيىم كيە الاتىن بولدى.

«ورتوپەدتەرگە تەكسەرىلىپ قارا­لۋ­عا ۇزاق ويلاندىم. ويتكەنى دياگ­­نو­زىم اۋىر بولدى: جامباس بۋى­نىنىڭ تۋا بىتكەن ديسلوكاتسياسى، ەكى جاقتى كوكسارتروزىم بار ەدى. 1991 جىلعى وتادان كەيىن سول اياعىم 4،5 سم قىسقا بولدى، سودان كەيىن ورتوپەديالىق اياق كيىم كيۋگە ءماجبۇر بولدىم. مۇمكىندىك بولعان كەزدە عانا ساتىپ الىپ ءجۇردىم، بولماعان كەزدە وسىلاي جۇرە بەردىم. بۇلاي ءجۇرۋ قيىن ءارى ىڭعايسىز. ءوزىڭىز ءبىر اياعىڭىزدىڭ 4،5 سانتيمەترگە قىسقا ەكەنىن ەلەستەتىپ كورىڭىزشى. ءبىر كۇنى وتباسىلىق مەرەكەدە بيىك وكشەمەن جانە ادەمى اياق كيىممەن بي بيلەپ جۇرگەن ءبىر تانىسىمدى كەزدەستىردىم. بۇرىن ونىڭ دا اياعىندا مەنىكىندەي ماسەلەسى بار ەدى، ارەڭ جۇرەتىن. ءبىر تانىسىم وعان ء«تورتىنشى اۋرۋحانانىڭ» دارىگەرلەرى كومەكتەسكەنىن ايتىپ، سول كەزدە مەن دە كونسۋلتاتسيا الۋعا بەل بايلادىم. ناۋرىزداعى العاشقى وتادان كەيىن ومىرىمدە العاش رەت اياعىمنىڭ اۋىرعانى قويىپ، قالىپتى جاعدايدا ءيىلىپ، وتىرا باستادىم. مەن ءۇشىن بۇل ءومىر بويى كۇتكەن عاجايىپ جاعداي بولدى. ەكىنشى وتادان كەيىن ءوزىم جۇرە باستايمىن. 29 جىلدان كەيىن مەنىڭ دەنە اقاۋلارىم تۇزەلدى. ەندى ەكى اياعىم دا بىردەي بولىپ كورىنەدى. شامامەن جارتى جىلدان كەيىن بيىك وكشەلى اياق كيىممەن جۇرە الاتىن شىعارمىن»، دەيدى جادىرا يساەۆا.

ماماندار جامباس بۋىنى ادام قوزعالىسىندا نەگىزگى جۇكتى كوتە­رە­تىن اعزاداعى ەڭ كۇشتى بۋىن دە­سەدى. ول بۇكىل دەنە سالماعىنىڭ قىسىمىمەن تەپە-تەڭدىكتى ساقتاي وتىرىپ، قوزعالۋعا كومەكتەسەدى. مۇنداي قىسىم ارتيكۋليارلى شە­مىر­شەك پەن سۇيەك ارتيكۋلياتسياسى ءۇشىن اۋىر سىناق سانالادى. جادىرانىڭ جاعدايىندا بۋىنعا تۇسكەن ۇلكەن كۇش تۋا بىتكەن پاتو­لو­گيامەن قوسىلىپ اسقىنعان. وسى­لايشا كوكسارتروز دامىدى. بۇل ەڭبەككە جارامسىزدىققا جانە مۇگەدەكتىككە اكەلەتىن، قاتتى اسقى­نا­تىن دەگەنەراتيۆتى-ديسترو­فيا­لىق بۋىن اۋرۋى.

ء«بىز 4 سم رەزەكتسيا جاسادىق. ياعني اياقتىڭ ۇزىندىعىن، سونىمەن قاتار جامباس بۋىنىنىڭ رەۆيزيالىق ەندوپروتەزىن ورنىن تولتىردىق – ۋاقىت وتە كەلە جامباس اناتوميالىق قالپىنا كەلەدى. تولىعىمەن ەمەس، بىراق شامامەن 70%-عا. مۇنداي اۋىر، تۋا بىتكەن پاتولوگيا وتە سيرەك كەزدەسەدى. ءىس جۇزىندە باستاپقى كوكسارتروز، ارتروز، جامباس موينىنىڭ سىنۋى، ۆالگۋس دەفورماتسياسى ءجيى كەزدەسەدى. جانە بۇل پاتسيەنتتە انالىق پروكسيمالدى بولىكتىڭ ۆالگۋس دەفورماتسياسى بولدى – سۇيەك سىرتقا قاراي يىلگەن. ۇزاق ۋاقىت بويى پاتسيەنت جۇرگەن سا­يىن قينالىپ، سۇيەگى دۇرىس بولمادى. ناۋرىز ايىنداعى العاشقى وتا كەزىندە ونى تۇزەتە الدىق. وڭ جاق جامباس بۋىنىنىڭ العاشقى ەندوپروتەزىن جۇرگىزدىك. پاتسيەنتتىڭ كوڭىل-كۇيى جاقسى، الداعى ۋاقىتتا ناۋقاس اقساڭداماي، بىرقالىپتى جۇرەتىن بولادى»، دەيدى №4 قالالىق كلينيكالىق اۋرۋحانانىڭ ەندوپروتەزدەۋ بولىمشەسىنىڭ مەڭگەرۋشىسى ماناربەك اۋباكىروۆ.

ماناربەك عازيز ۇلى – جوعارى ساناتتاعى تراۆماتولوگ-ورتوپەد، بۋىن پاتولوگيالارى جونىنەن ناۋ­قاس­تار اراسىندا كەڭىنەن تانىمال. ەندوپروتەزدەۋ سالاسىنداعى بىلىكتى مامان رەتىندە پولشا، فرانتسيا، گەرمانيا، لاتۆيا جانە رەسەيدە قوسىمشا بىلىكتىلىگىن ارتتىرعان.

ءوز كەزەگىندە ماماندار بۋىن دامۋىنىڭ تۋابىتكەن پاتولوگياسىن دەر كەزىندە انىقتاۋ ءۇشىن جاڭا تۋعان نارەستەلەردىڭ تاعايىندالعان مىندەتتى تەكسەرىلىپ قاراۋىن ەلەپ، ورتوپەد-دارىگەرگە بارىپ قارالۋعا كەڭەس بەرەدى. ەمدەۋ بالا كەزىنەن باس­تالۋى كەرەك، ال بالا ورتوپەديالىق ماماننىڭ قاداعالاۋىمەن ءوسىپ، دامۋى كەرەك. ەرتە بالالىق شاقتا الدىن الا وپەراتسيا جاسالۋى مۇمكىن – تۇزەتۋ، بۇل بالا ءومىرىن جەڭىلدەتەدى جانە تىرەك-قيمىل اپپاراتىن سوڭعى ەمدەۋگە دايىندايدى. سوڭعى حيرۋرگيانى 21 جاستان كەيىن سۇيەكتىڭ ءوسۋى توقتاعان كەزدە جاساۋعا بولادى.

دارىگەرلەردىڭ جوسپارى بويىنشا جادىرا يساەۆا 1،5 ايدان كەيىن №4 قالالىق كلينيكالىق اۋرۋحانادا وڭالتۋ كۋرسىنان ءوتۋى ءتيىس، سودان كەيىن ول ءجۇرىس ارباسى مەن بالداقتار تۋرالى ماڭگى ۇمىتا الادى.

«دارىگەرلىك كەڭەس الۋعا بارعان كەزدە ماماندار ماعان ماناربەك عازيز ۇلىنا قارالۋدى ۇسىندى. ءۇشىنشى كۇنى العاشقى وتادان كەيىن-اق مەن اياعىما تۇرىپ، اۋىر­سىنباي ءجۇردىم. مۇندا مەديتسينا قىزمەتكەرلەرى جاقسى، بارلىق جاعدايىڭدى جاسايدى، ءبىز ءوزىمىزدى جايلى سەزىندىك، انەستەزيولوگ دارى­گەرلەرگە جەكە العىسىمدى بىلدى­رە­مىن! ويتكەنى ءبىر ساتتە ءبىزدىڭ ءومى­رى­مىز سولاردىڭ قولىندا، وتادان كەيىن ءبىر اپتا وتكەندە انەستەزيولوگ دارىگەر پالاتاعا كەلىپ، مەنىڭ حال-جاعدايىم تۋرالى سۇرادى. نەگىزگى جۇمىستى مەيىربيكەلەر مەن سانيتارلار اتقاردى. ولاردىڭ ەڭبەك­قورلىعى مەن مەيىرىمدىلىگىنە تاڭ­عا­لامىن. وسىنداي وتادان كەيىن ادامنىڭ جاعدايىن ءتۇسىنىپ، بارىنشا جاعدايىمدى جاساۋعا تىرىستى. ەكى ايدان كەيىن وڭالتۋعا كەلەمىن»، دەيدى جادىرا.

الماتى قالاسىنىڭ №4 قالالىق كلينيكالىق اۋرۋحاناسىنىڭ ەندوپروتەزدەۋ بولىمشەسى 2012 جىلدان باستاپ جۇمىس ىستەيدى، مۇندا تىرەك-قيمىل جۇيەسىنىڭ پاتولوگياسى بار پاتسيەنتتەرگە جوعارى تەحنولوگيالىق مەديتسينالىق كومەك كورسەتىلەدى. تەك 2019 جىلى بولىمشە حيرۋرگتارى جامباس، تىزە، يىق جانە شىنتاق بۋىندارىن ەندوپروتەزدەۋ بويىنشا 1637 وتا مەن 109 جەدەل رەۆيزيا جۇرگىزگەن.

 

الماتى

 

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار