وبلىستىق ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسياسىنىڭ باسشىسى بولات ءابدىراحمانوۆتىڭ مالىمەتىنە قاراعاندا, بۇگىنگە دەيىن 500-گە جۋىق قۇس ولگەن. بۇل ەسەپكە ەنگەنى عانا, ورمان-توعايداعى, كىسى كوزىنەن جىراقتاعى قۇس ءولىمى وقيعالارىنىڭ قانشالىقتى ەكەندىگىن ءدوپ باسىپ ەشكىم ايتا الماس.
استراحان, اتباسار, زەرەندى, ەگىندىكول, بۇلاندى, جارقايىڭ اۋداندارىندا وسىنداي وقيعالار تىركەلۋدە. جارقايىڭ اۋدانىنىڭ شويىندىكول ەلدى مەكەنىندە ىندەتتىڭ سەبەبى لابوراتوريالىق زەرتتەۋلەر ارقىلى ساراپتالىپ, قۇس تۇماۋى ەكەندىگى بەلگىلى بولىپ وتىر. اۋداننىڭ باس ۆەتەرينارلىق-سانيتارلىق ينسپەكتورى اۋىلدىق وكرۋگ اكىمىنىڭ اتىنا كارانتين ەنگىزۋ تۋرالى ۇيعارىم جولداپتى. اكىمنىڭ شەشىمى شىعارىلىپ, ادىلەت ورگانىندا تىركەۋدەن وتۋدە. تىركەلگەن سوڭ كارانتين جاريالانباق. اۋرۋ جۇقتىرعان قۇستاردى جيناپ, رەسپۋبليكالىق ەپيزووتيكاعا قارسى وتريادتىڭ ماماندارى ورتەيدى. كارانتين جاريالانعان اۋدانداردا تۇماۋ بەلگىسى بار قۇس بىتكەن تولىعىمەن جويىلادى. جويۋ بارىسىندا قۇستاردىڭ جاسى, ءتۇرى كورسەتىلگەن حاتتامالار تولتىرىلادى. بۇل قۇجات كەلگەن شىعىندى زاڭدى تۇردە وتەۋگە نەگىز بولماق. ال ساۋ قۇستارعا ۆاكتسينا ەگىلىپ, مامانداردىڭ باقىلاۋىنا الىنباق. كارانتين ايماعى ارنايى بلوك-بەكەتتەرمەن قورشالىپ, ساقتاندىرۋ شارالارى جۇرگىزىلەدى.
مامانداردىڭ ايتۋىنا قاراعاندا, قۇس تۇماۋى جىل قۇستارىنان جۇققان. ساقتىق شارالارى ءۇشىن قۇس فابريكالارىنىڭ ماڭايىندا جابايى قۇس قوناتىن بۇتا, تال بولماۋى قاجەت ەكەن.
– التى اۋداندا 7 قۇس فابريكاسى بار, – دەيدى ينسپەكتسيا باسشىسى مانات ءابدىراحمانوۆ, – ءۇي قۇستارىمەن قوسا ەسەپتەگەندە وبلىستا 7,2 ملن قۇس بار. قازىر قۇس تۇماۋىنىڭ الدىن الۋ ءۇشىن ۆاكتسينا قولدانۋدا. بۋراباي, ارشالى, تسەلينوگراد اۋداندارىنداعى 4 قۇس فابريكاسى رەسەيلىك ۆاكتسينالاردى ساتىپ الىپ, 1,8 ملن قۇسقا ەگىلدى. وزگە اۋدانداردا دا وسىنداي جۇمىستار جۇرگىزىلۋدە.
اقمولا وبلىسى
