ايماقتار • 22 قىركۇيەك، 2020

الماتىدا "قۇدالىق"، "ۇزاتۋ تويىن" تيا الماعاندار 5 ميلليون ايىپپۇل تولەدى

107 رەت كورسەتىلدى

ىندەتتىڭ العاشقى تولقىنى تالاي وتباسىنا قاسىرەت بولىپ كەلىپ، ازاماتىنان، اياۋلى ادامدارىنان ايىرعانىن كوز كورىپ، قۇلاق ەستىسە دە، ءوز باسىنا تۇسپەگەننەن كەيىن ايىلىن جيا الماي ادامدار بار.
الماتى قالاسىنىڭ تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىندە مونيتورينگتىك توپتاردىڭ جۇمىسىن سارالاعاندا، سوڭعى اپتادا 10 نىساندا جانە 51 جەكە تۇلعانىڭ كارانتين رەجيمىن بۇزعانى انىقتالدى. سالىنعان ايىپپۇلدىڭ جالپى سوماسى – 5 ملن تەڭگە. اكىمشىلىك سوتتىڭ قاراۋىنا ءبىر ماتەريال تاپسىرىلدى، دەپ حابارلايدى Egemen.kz.

مونيتورينگتىك توپتار جالپى وسى جىلدىڭ 17 تامىزىنان بەرى شوب-ءتىڭ ەپيدەميالىق تالاپتاردى ساقتاۋىنا قاتىستى 9 مىڭنان استام تەكسەرۋ جۇرگىزدى. اكىمشىلىك قۇقىقبۇزۋشىلىق تۋرالى 3801 حاتتاما تولتىرىلدى. 2693 جەكە تۇلعاعا ماسكا رەجيمىن بۇزعانى ءۇشىن ايىپپۇل سالىندى. شوب-ءتىڭ 1635 سۋبەكتىسى ءوز ەرىكتەرىمەن قىزمەتتەرىن توقتاتتى. سوتقا 19 ماتەريال تاپسىرىلعان.

نەگىزگى تارتىپبۇزۋشىلىقتار – ماسكا رەجيمىنىڭ ساقتالماۋى، جۇمىس رەجيمىنىڭ بۇزىلۋى، دەزينفەكتسيالىق قۇرالداردىڭ جوقتىعى، سونىمەن بىرگە جاپپاي كوپشىلىك شارالاردى ۇيىمداستىرۋ.

بيىلعى 18 قىركۇيەكتە جەتىسۋ اۋدانى، جانگەلدين كوشەسى، 193 مەكەن-جايىندا ورنالاسقان «دانيار» مەيرامحاناسىندا زاڭسىز «ۇزاتۋ توي» وتكىزىلگەنى تۋرالى اقپارات كەلگەن. ودان كەيىن جەدەل تۇردە مونيتورينگتىك توپ جەتىسۋ اۋدانىنىڭ جەرگىلىكتى پوليتسيا قىزمەتىنىڭ قىزمەتكەرلەرىمەن بىرلەسىپ تەكسەرۋگە بارعان. بانكەت 50 ادامنىڭ قاتىسۋمەن وتكىزىلگەن. جەكە كاسىپكەرگە قاتىستى قر اق تۋرالى كودەكسىنىڭ 425-بابىنىڭ 1-تارماعى بويىنشا 230 اەك مولشەرىندە اكىمشىلىك قۇقىقبۇزۋشىلىق حاتتاماسى تولتىرىلدى.
ودان بولەك، وسى جىلدىڭ 20 قىركۇيەگىندە تۇنگى ۋاقىتتا مەدەۋ اۋدانىندا جەكەمەنشىك ۇيدە «قۇدالىق» وتكىزىلىپ جاتقانى تۋرالى اقپارات كەلىپ تۇسكەن. مونيتورينگتىك توپتىڭ مەدەۋ اۋدانىنىڭ جەرگىلىكتى پوليتسيا قىزمەتىنىڭ قىزمەتكەرلەرىمەن بىرلەسىپ تەكسەرۋىنىڭ بارىسىندا اقپارات راستالدى. جەكە تۇلعالارعا (شارا ۇيىمداستىرۋشىلارىنا) قاتىستى ەكى اكىمشىلىك حاتتاما تولتىرىلعان.

سونىمەن بىرگە، اۋەزوۆ اۋدانىنىڭ مونيتورينگتىك توپتارىنىڭ جۇمىسى بارىسىندا «مياتا» كافەتەريىنىڭ تۇنگى 23-00-دەن كەيىن جۇمىس ىستەگەنى، سونداي –اق، ادامداردىڭ كوپ توپتاسىپ، جينالعانى انىقتالدى. اكىمشىلىك قۇقىقبۇزۋشىلىق تۋرالى كودەكستىڭ 425-بابىنىڭ 1-تارماعىنا سايكەس، 230 اەك مولشەرىندە ايىپپۇل سالىندى.

باس مەملەكەتتىك دارىگەردىڭ 2020 جىلدىڭ 15 تامىزداعى №56 قاۋلىسىنا سايكەس، وتباسىلىق مەرەكەلەردى، ەستە قالارلىق شارالاردى (ۇيلەنۋ تويلارى، مەرەيتويلار، قۇدايى تاماق) وتكىزۋگە، سونىمەن بىرگە، ۇيگە كوپ ادامنىڭ كەلۋىنە قاتىستى سالىنعان تىيىمنىڭ ساقتالاتىنىن اتاپ وتكەن ءجون. بۇل شارالار كوروناۆيرۋس ينفەكتسياسىنىڭ تارالۋ قاۋپىن تومەندەتۋ ءۇشىن قاجەت.

وسى ارادا الماتى قالاسى اكىمىنىڭ تاپسىرماسىمەن 26 مونيتورينگتىك توپ كارانتين شارالارىنىڭ ساقتالۋىن باقىلاۋ ماقساتىندا جۇمىس ىستەيتىندىگىن ەسكە سالا كەتۋ كەرەك. مونيتورينگتىك توپتاردىڭ قۇرامىنا اۋدان اكىمدىكتەرىنىڭ وكىلدەرى، تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ، سونىمەن بىرگە، پوليتسيا قىزمەتكەرلەرى ەنگەن.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار