وكىنىشكە قاراي, ازات ەلدىڭ باستى ورداسىنا اينالعان قالادا كەيىنگى كەزدە شەتەلدىك اتاۋلار كوبەيىپ بارادى. اسىرەسە جاڭادان سالىنىپ جاتقان تۇرعىن ءۇي كەشەندەرى ماڭگىلىك ەلدىڭ استاناسىندا ەمەس, جات جەردە جۇرگەندەي اسەر قالدىرادى. ماسەلەن, اۋەجايدان تۇسسەڭىز, الدىڭىزدان Family Town تۇرعىن ءۇي كەشەنى شىعادى. اۋدارماسى – «وتباسى شاھارى». قازاقشاسىنان جىلىلىق سەزىلە مە, قالاي؟!
سودان قابانباي باتىر داڭعىلىمەن بۇرىلىپ, ماڭگىلىك ەل كوشەسىنە ءتۇسىپ اقورداعا قاراي تارتا بەرسەڭىز, وڭ جاعىڭىزدان «ۆەنا ورامى» مەنمۇندالايدى. يدەيانىڭ گابسبۋرگ ديناستياسىنىڭ ورداسى سانالاتىن ۆەنا شاھارىنان الىنعانىن اڭعارۋ قيىن ەمەس. بىراق بۇل تۇرعىن ءۇي كەشەنىنەن اۋستريا استاناسىندا كەزدەسەتىن گوتيك نە باروككو ءستيلىن بايقاۋ قيىن.
ايتپاقشى, نۇر-سۇلتاندا شەتەلدىك قالالارعا ەلىكتەپ سالىنعان تۇرعىن ءۇي كەشەندەرى دە جەتەرلىك. «بارسەلونا» تك, «اعىلشىن ورامى», «لوندون» تك دەپ جالعاسا بەرەدى. تۇرعىن ءۇي كەشەنى «بارسەلونا» دەپ اتالعانىمەن, ول جاقتان كاتالونيالىق شاھاردىڭ ەلەمەنتتەرىن بايقاۋ قيىن. ايتپەسە بارسەلونا قالاسى ايگىلى ارحيتەكتور انتونيو گاۋديدىڭ ەسىمىمەن تىعىز بايلانىستى ءارى الەمنىڭ تۇكپىر-تۇكپىرىنەن اعىلعان تۋريستەر گاۋديدىڭ قولتاڭباسى – «ساگرادا فاميليا» عيباداتحاناسىن, «كاسا بالو» جانە «كاسا ميلا» عيماراتتارىن كورۋگە باراتىنى بەلگىلى.
قىسقاسى, ەلورداداعى عيماراتتارعا شەتەلدىك اتاۋ بەرىلگەنىمەن, ونداعى ارحيتەكتۋرالىق ەرەكشەلىكتەر ەسكەرىلمەي قالعانى انىق اڭعارىلادى. ايتپەسە ريم ءستيلى, فاحۆەرك, گوتيك, باروككو ستيلدەرىنىڭ ەلەمەنتتەرى جوقتىڭ قاسى. بۇل – بىرىنشىدەن.
ەكىنشىدەن, استاناداعى كەي تۇرعىن ءۇي كەشەندەرىنىڭ اتاۋى قازاقى ۇعىمعا مۇلدەم تۇسىنىكسىز. سانامالاپ بەرەيىك: Astoria, City Seoul, City Tokyo, Bright Star, Boston Comfort House, Castle House, Crocus City, Discovery, Dream City, Freedom, G-Park Premium, Highvill, Liberty, Millennium Park, Nova City, Panorama Park, Promenade Expo, Sunrize دەپ جالعاسا بەرەدى.
جوعارىدا اتالعان تۇرعىن ءۇي كەشەندەرىن سالعان كومپانيالار شەتەلدىك اتاۋعا اۋەستەنىپ كەتكەنىن اڭعارۋ وڭاي. ايتپەسە الەمنىڭ توعىزىنشى تەرريتورياسى سانالاتىن قازاقستاندا تارتىمدى جەر-سۋ اتاۋلارى دا جەتكىلىكتى. وعان قوسا, قازاق ءتىلى الەمدەگى باي تىلدەردىڭ قاتارىندا. ياعني, اتاۋ تاڭداۋدان قينالمايسىڭ. ماسەلەن, «نۇرلى ۇيا», «نۇرسايا», «حانشايىم», «اينالايىن», «اتامەكەن», «قۇلاگەر» دەگەن سەكىلدى ۇلتتىق بولمىسىمىزدى ايشىقتايتىن اتاۋلار كەرەمەت ەمەس پە.
باس قالانىڭ ىرگەتاسى قالانعاندا ساۋلەتتىك كەلبەتى سان ءتۇرلى ۇلت وكىلدەرى مەكەندەيتىن قالانىڭ ەۋرازيالىق بولمىسىنان حابار بەرۋى جوسپارلانعان ەدى. سوندىقتان شىعار, اقوردا كۇمبەزىندەگى التىن قىران, قازاق ەلى مونۋمەنتىنىڭ باسىنداعى كيەلى سامۇرىق قۇس, ءداستۇرلى قازاق ءۇيىنىڭ سۇلباسىن ەسكە تۇسىرەتىن تاۋەلسىزدىك سارايى جانە كونە اڭىزدارعا ارقاۋ بولعان بايتەرەك – ەلوردانىڭ وسى جانە باسقا دا كوپتەگەن كورىكتى جەرلەرى ۇلتتىق ميفولوگيامەن, حالىقتىڭ تاريحي جادىمەن تىعىز بايلانىستى.
استانانى الەمگە ايگىلەگەن عيماراتتاردىڭ اتاۋىنان دا قازاقىلىقتىڭ ءيىسى اڭقىپ تۇرادى. بريتان ساۋلەتشىسى نورمان فوستەردىڭ جوباسى بويىنشا سالىنعان, بيىكتىگى 62 مەترگە جەتەتىن الىپ عيمارات – بەيبىتشىلىك جانە كەلىسىم سارايى ەلوردانىڭ مادەني ءومىرىنىڭ ناعىز ورتالىعىنا اينالدى. اشىلعان الىپ كۇمبەز بەينەسىندەگى «حان شاتىر» ارحيتەكتۋرالىق ءانسامبلى بۇگىندە گيننەستىڭ رەكوردتار كىتابىنا ەنگەن. ۇشار باسىنا جەڭىمپاز سامۇرىق قۇس كەلىپ قونعان, كوككە ۇمتىلعان ماڭعاز مۇنارا «قازاق ەلى» مونۋمەنتى قازاقستاننىڭ بۇگىنگى كەلبەتى مەن ەرتەڭگى كۇنىن بەينەلەيدى.
كەزىندە ەلوردامىز اقمولاعا كوشىرىلگەندە ەلىمىزدەگى ءار ايماق قالا قۇرىلىسىنا اتسالىسقانى بەلگىلى. سول ۇيلەر كەيىنىرەك حالىق اراسىندا «الماتىنىڭ ءۇيى», «قاراعاندىنىڭ ءۇيى», «قوستانايدىڭ ءۇيى» دەپ اتالىپ كەتتى. وسىندايدا تالاي ساۋلەتشىنىڭ قولتاڭباسى قالعان ايشىقتى استانامىزدىڭ قازىرگى كەزدەگى قۇرىلىسىنا جاۋاپتىلار ۇلتتىق ميفولوگيانى, حالىقتىڭ تاريحي جادىن, ۇلى دالانىڭ تاريحي قايراتكەرلەرىن ەسكەرسە دەيسىڭ...
