ايماقتار • 19 قىركۇيەك، 2020

جاۋىنگەر ازىكەن نۇعىمانوۆتىڭ سۇيەكتەرى ستەپنياك قالاسىندا جەرلەندى

58 رەت كورسەتىلدى

وسى جىلدىڭ مامىر ايىندا رەسەي فەدەراتسياسىنىڭ تۆەر وبلىسىنداعى بەلسكي اۋداندىق «عىلىمي-تاريحي، اسكەري-پاتريوتتىق «پودۆيگ» قوعامدىق ۇيىمىنىڭ ىزدەستىرۋ قىزمەتكەرلەرى قازاق جاۋىنگەرىنىڭ مەدالونى بار سۇيەك قاڭقالارىن تاپقان بولاتىن.

مايدان دالاسىندا وپات بولعان جاۋىنگەر 1942 جىلعى 19 ساۋىردە ءبىرجان سال اۋداندىق اسكەري كوميسسارياتىنان اسكەرگە شاقىرىلعان، اقمولا وبلىسىنىڭ 1897 جىلعى تۋماسى ازىكەن نۇعىمانوۆ بولىپ شىقتى.

اقمولا وبلىسىنىڭ اكىمدىگى بۇل وقيعاعا بايلانىستى ارنايى شەشىم قابىلداپ، رەسپۋبليكالىق «اتامنىڭ اماناتى» قوعامدىق بىرلەستىگىمەن بىرگە جەرلەس جاۋىنگەردىڭ سۇيەگىن وتانىنىمىزعا اكەلۋگە قاتىستى جۇمىس جۇرگىزدى. ۇشاقپەن ەلگە جەتكىزىلگەن جاۋىنگەر مايىتىنە قازاقستان قارۋلى كۇشتەرى مينيسترلىگىندە اسكەري قۇرمەت كورسەتىلدى. بۇل يگى ءىستىڭ باسى-قاسىندا اۋدان اكىمى ەرمەك نۇعىمانوۆ تا جۇرگەنىن اتاپ وتكىمىز كەلەدى.

وسىناۋ ايتۋلى وقيعا بايلانىستى بۇگىن وبلىس ورتالىعى كوكشەتاۋ قالاسىنداعى داڭق مەموريالىندا «ەرلىككە تاعزىم» شاراسى وتكىزىلدى.

وبلىس اكىمى ەرمەك مارجىقپاەۆ، رەسەي ەلشىلىگىنىڭ وكىلدەرى مەن قالا جۇرتشىلىعى داڭق مەموريالىنا گۇل شوقتارىن قويىپ، اسكەري قۇرمەتتى ەسكورد جاۋىنگەر سۇيەگى سالىنعان تابىتتى الىپ شىقتى.

تاعىلىمدى شارادا اقمولا وبلىسىنىڭ اكىمى ەرمەك مارجىقپاەۆ ءسوز سويلەدى.

- بيىل ۇلى جەڭىستىڭ 75 جىلدىعىن اتاپ وتۋدەمىز، – دەدى ەرمەك بورانباي ۇلى، – بۇل ءبىز ءۇشىن قاستەرلى كۇندەر سانالادى. قازاقستان پرەزيدەنتى قاسىم-جومارت توقاەۆ اتاپ وتكەندەي: ء«بىزدىڭ حالقىمىز جەڭىسكە ءوزىنىڭ شەكسىز ۇلەسىن قوستى. بابالارىمىزدىڭ ەرلىگى جەر بەتىندەگى بەيبىتشىلىكتى ساقتاپ قالدى. وبلىسىمىزدان سۇراپىل سوعىسقا اتتانعان 90 مىڭ جەرلەسىمىزدىڭ 37 مىڭى عانا ەلگە ورالدى. ولاردىڭ 33-ءى عانا ارامىزدا. ۋاقىت وتكەن سايىن ادامزات تاريحىنىڭ وسى قايعىلى بەتتەرىن بارىنشا تەرەڭ تۇسىنە تۇسەسىڭ. ەندىگى نەگىزگى ماقساتىمىز ارداگەرلەرگە قامقورلىق جاساپ، ولاردى ەرەكشە نازاردا ۇستاۋ. ءبىز سول قاسىرەتتى سوعىس جىلدارىندا قازا تاپقان، حابارسىز كەتكەن اتالارىمىز بەن اكەلەرىمىزدىڭ، بەيبىت كۇندەردە ەلدى كوتەرۋگە اتسالىسقان بارلىق ازاماتتاردىڭ جارقىن بەينەلەرىن قۇرمەتپەن ەسكە الامىز.

بۇدان كەيىن رەسەي فەدەراتسياسىنىڭ قازاقستانداعى ەلشىلىگىنىڭ اعا كەڭەسشىسى يۋري مەلنيك، وبلىستىق ارداگەرلەر كەڭەسىنىڭ توراعاسى عوسمان تولەعۇل، «اتامنىڭ اماناتى» رەسپۋبليكالىق قوعامدىق كەڭەسىنىڭ توراعاسى مۇرات مولداعاليەۆ بۇگىنگى شارانىڭ ءمان-ماڭىزى تۋرالى تولعانىستى لەبىزدەرىن ءبىلدىردى.

جاۋىنگەر ازىكەن نۇعىمانوۆ رۋحىنا ارنالعان «ەرلىككە تاعزىم» شاراسىندا ءبىر مينۋتتىق ەسكە الۋ جاريالانىپ، ءۇش دۇركىن ساليۋت بەرىلدى.

ەرجۇرەك جاۋىنگەردىڭ سۇيەكتەرى ءوزى تۋعان ستەپنياك قالاسىندا جەرلەندى.

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار