پارلامەنت • 19 قىركۇيەك، 2020

سەناتور اقمارال ءالنازاروۆا ددۇ وكىلىمەن كەزدەستى

25 رەت كورسەتىلدى

پارلامەنت سەناتىنىڭ دەپۋتاتى اقمارال ءالنازاروۆا ددۇ-نىڭ قازاقستانداعى ەلدىك كەڭسەسىنىڭ باسشىسى دوكتور كارولين كلارينۆالمەن كەزدەستى، دەپ حابارلايدى Egemen.kz سەناتتىڭ ءباسپاسوز قىزمەتىنە سىلتەمە جاساپ. 

تاراپتار COVID-19-عا قارسى كۇرەس ماسەلەلەرىن، ونىڭ ىشىندە قازاقستانداعى اعىمداعى جاعدايدى، سونىمەن قاتار ارال وڭىرىندەگى حالىقتىڭ دەنساۋلىعىن قورعاۋ ماسەلەلەرىن تالقىلادى.

سەناتور اقمارال ءالنازاروۆا دۇنيەجۇزىلىك دەنساۋلىق ساقتاۋ ۇيىمىنىڭ قازاقستانعا Covid-19 پاندەمياسىمەن كۇرەستە كورسەتكەن جان-جاقتى قولداۋى مەن ىنتىماقتاستىعى ءۇشىن ددۇ-نىڭ رەسمي وكىلىنە العىس ايتتى.

"ددۇ بيلىك ورگاندارىنىڭ ماڭىزدى سەرىكتەسى بولىپ كەلەدى، ويتكەنى ۇيىم COVID-19-عا جاۋاپ رەتىندە تەحنيكالىق ۇسىنىستار ازىرلەيدى، وزگە دە تەحنيكالىق بىلىكتى رەسۋرستارىن ۇسىنادى. ءبىزدى حالىق دەنساۋلىعىن ساقتاۋ مەن زاڭ شىعارۋ ماسەلەلەرىندەگى ءوزارا ىنتىماقتاستىعىمىز قۋانتادى"، - دەپ اتاپ ءوتتى سەنات دەپۋتاتى.

دوكتور كلارينۆال، ءوز كەزەگىندە، ددۇ قازاقستاننىڭ COVID-19-عا قارسى كۇرەستەگى كۇش-جىگەرىن، سونداي-اق پاندەميامەن كۇرەستىڭ الدىڭعى شەبىندە جۇرگەن قازاقستاندىق مەديتسينا قىزمەتكەرلەرىنىڭ كاسىبيلىگى مەن جانكەشتىلىگىن جوعارى باعالايتىنىن جەتكىزدى. سونداي-اق، ول ددۇ قازاقستانعا ەپيدەميولوگيا، قاۋىپ-قاتەر كوممۋنيكاتسياسى، لوگيستيكا جانە وزگە دە دەنساۋلىق ساقتاۋ باعىتتارىندا قولداۋ كورسەتۋدى جالعاستىراتىنىن ايتتى.

"ىنتىماقتاستىق، ءوزارا ءىس-قيمىل، ءبىلىم جانە رەسۋرستار الماسۋ نەعۇرلىم تەز ارەكەت ەتۋ ءۇشىن اسا ماڭىزدى، سوندىقتان حالىقتىڭ دەنساۋلىعىن قورعاۋ جولىندا بارلىق تاراپتار اراسىندا سىندارلى ديالوگ قۇرا وتىرىپ، ءبىر باعىتتا ءجۇرۋدى جالعاستىرۋ ماڭىزدى"، دەپ تۇيىندەدى ددۇ-نىڭ قازاقستانداعى ەلدىك كەڭسەسىنىڭ باسشىسى.

سوڭعى جاڭالىقتار

تسيرك - الەم نازارىندا

قازاقستان • بۇگىن، 20:51

ۇقساس جاڭالىقتار