ايماقتار • 18 قىركۇيەك، 2020

قىرماندا – قىزۋ ەڭبەك

17 رەت كورسەتىلدى

ەگىن وراعىن ەڭسەرىپ تاستاعان اقمولالىق ديقانداردىڭ بار نازارى قىرمانداعى قىزىلعا اۋعان. ەندىگى ماقسات – بيداي سۇرىپتارىن ىرىكتەپ، جاۋىنعا ۇرىندىرماي قامباعا قۇيىپ الۋ. كەلەر كوكتەمدەگى تۇقىمعا ءمان بەرۋ.

اسىلىندا مول ءونىم الۋدىڭ العىشارتتارىنىڭ ءبىرى – تۇقىم. «كامەنكا جانە د» سەرىكتەستىگى وبلىستاعى بيداي تۇقىمىن دا­يىندايتىن شارۋاشىلىقتاردىڭ ءبىرى. ىرىستىڭ الدىمەن تۇقىم­عا بايلانىستى ەكەندىگىن دالەل­دەي كەتەلىك. قازىر شارۋاشى­لىقتاعى سوڭعى 637 گەكتار القاپتىڭ اينالىم بەرەكەسى 35 تسەنتنەرگە جۋىقتاپ وتىر. شىنتۋايتىندا، بۇل – وڭىردەگى ەڭ وزىق كورسەتكىشتىڭ ءبىرى. قۇر­ع­اقشىلىققا ءتوزىمدى، ىستىق­تان ىقپايدى. ءدال بيىلعىداي جىلى ەگەتىن-اق تۇقىم. ەرتە كوكتەمدە «بوەۆچانكا»، «ورال-ءسىبىر» قاتتى بيداي تۇقىمىن قۇنارلى توپىراققا سىڭىرگەن ديقاندار قوڭىر كۇزدە ماۋەلەپ وسكەن ەگىن وراعىنىڭ جەمىسىن كورۋدە. وراقتىڭ العاشقى ون كۇنىندە اتباسار ەلەۆاتورى مەن سەرىكتەستىكتىڭ ءوز قويماسىنا 30 مىڭ توننادان استام ساپالى استىق قۇيىلدى.

– سوڭعى جىلدارى ال­قاپ كولەمىن كوبەيتتىك. اگروتەح­نيكالىق شارالاردى وزىق عىلى­مي جەتىستىكتەرمەن ۇشتاستىرا جۇرگىزۋگە ءمان بەرەمىز، – دەيدى سەرىكتەستىكتىڭ باس ديرەكتورى الەكسەي دجەيرانوۆ، – ەكى جىلدا ءبىر رەت دەمالدىرامىز. 30 پايىزىن پارعا قالدىرىپ، تىڭعىلىقتى وڭدەپ، تىڭايتامىز. ونسىز بولمايدى عوي. ەسەسىنە بيدايدىڭ قامىرلىلىعى 38 پايىزعا جەتىپ وتىر. ساپالى استىققا سۇرانىستىڭ دا كوپ بولاتىنى بەلگىلى.

سەرىكتەستىكتىڭ ەگىستىك القاپ­تارىندا قوستانايدا جينالاتىن 13 «ەسىل» كومباينى بيداي باستىرۋدا. ءبىر قۋانتارلىعى، كومباين تىزگىنىن كىلەڭ جاس­تار ۇستاعان ەكەن. سوڭعى جىل­دارى شارۋاشىلىقتاردا مەحانيزا­تورلاردىڭ جەتىسپەيتىندىگى تۋرالى ماسەلە ءجيى كوتەرىلىپ ءجۇر. ال بۇل سەرىكتەستىكتە ىلكىدەن قا­لىپتاسقان ەڭبەك ءداستۇرى جاق­سى جالعاسىن تاۋىپتى. جاس­تاردىڭ بەينەتتى ەڭبەككە ۇم­تىلۋى جالاقىنىڭ مولدىعى جانە قولايلى جاعدايدىڭ جا­سال­عاندىعىنان شىعار دەپ توپ­شىلادىق.

– تالاي جىلدان بەرى كۇزگى وراقتا كومباينشى بولىپ جۇ­مىس ىستەيمىن. ءار كۇندىك جوسپارىمدى ءۇش ەسەدەن اسىرا ورىندايمىن. كۇن سايىن 60 مىڭ تەڭگەدەن تولەيدى، – دەيدى وزات كومباينشىنىڭ ءبىرى نيكولاي پوتالچاك، – دەنى ساۋ ادامعا نا­عىز تابىس تاباتىن ۋاقىت ەمەس پە؟

اۋدان ديقاندارى ەگىن ورا­عىن كۇن اشىق بولسا، بىرەر كۇن­نىڭ ىشىندە اياقتاماق. ورتاشا ەسەپپەن گەكتار بەرەكەسى 10 تسەنت­نەر­دەن اينالۋدا. بيىل 424 مىڭ گەكتار القاپتا ءدان سەپكەن اتباسارلىق ديقانداردىڭ كوڭىلى كوتەرىڭكى. جاز قاباعىنا قاراعاندا، ءونىم مۇلدە از بولار دەپ توپشىلاعان. تامىزدىڭ سو­ڭىندا ەكى رەت جاۋعان جاڭبىر بيدايدىڭ بىتىك وسۋىنە سەپ بولىپتى.

ەگىن وراعىن ۋاقتىلى ورىنداۋ مىقتى مەحانيزاتور مەن الىمدى تەحنيكاعا دا بايلانىستى. اۋدانداعى استىق ال­قاپ­تارىندا قازىر 284 كومباين، 60-تان استام تراكتور، 58 جۇك كولىگى پايدالانىلۋدا. جەكەلەگەن شارۋاشىلىقتاردا جاپ-جاقسى ءونىم بار. بيىل 12 مىڭ گەكتار جەرگە ءدان سىڭىرگەن «پولتاۆكا-20» شارۋاشىلىعى نەبارى ەكى اپتانىڭ ىشىندە كۇزگى دالا جۇمىستارىن مارەسىنە جەتكىزدى. شارۋاشىلىق باسشى­لارىنىڭ ايتۋلارىنا قاراعاندا، جاۋاپتى ناۋقان الدىندا تەحنيكا مۇقيات جوندەلىپ، قاتارعا قوسىلعان ەكەن. ونىڭ ۇستىنە ءونىم كولەمى دە ويداعىداي. گەكتار بەرەكەسى 16 تسەنتنەردەن اينالۋدا.

 

اقمولا وبلىسى،

اتباسار اۋدانى

 

سوڭعى جاڭالىقتار

اراق ساتىلمايتىن اۋدان

ايماقتار • كەشە

ۇقساس جاڭالىقتار