بۇگىن ماڭعىستاۋ وبلىسى مەن حورەزم وبلىسى اكىمدىكتەرىنىڭ وكىلدەرى مەن ەكى ەلدىڭ اۋە كومپانيالارى وكىلدەرىنىڭ قاتىسۋىمەن بەينەكونفەرەنتسيا ءوتتى. وندا اقتاۋ مەن ۇرگەنىش اراسىندا اۋە رەيسىن اشۋ جايى تالقىلاندى. قالالار اراسىنداعى بارىس-كەلىستى جانداندىرۋ " ۇلى جىبەك جولى" جوباسى اياسىندا جۇزەگە اسادى.
ماڭعىستاۋ وبلىسىنىڭ ينۆەستيتسيالار جانە ءتۋريزمدى دامىتۋ باسقارماسىنىڭ باسشىسى نۇربەك ايتجانوۆ قوس ەل اراسىندا اۋە رەيستەرىن اشۋ ءۇشىن ماڭعىستاۋ وبلىسى دايىن ەكەنىن جەتكىزدى.
"قازاقستان-وزبەكستان ىنتىماقتاستىعىن بارلىق سالادا جانداندىرۋعا جانە ودان ءارى دامىتۋعا ماڭعىستاۋ ءوڭىرىنىڭ باسشىلىعى اتىنان تۇراقتى رەيستەردىڭ اشىلۋىنا قولداۋ بىلدىرەتىنىمىزدى جەتكىزەمىن. ەكى قالا اراسىنداعى اۋە قاتىناسى قاشان اشىلاتىنى وزبەكستان تاراپى تولىقتاي دايىن بولعاندا بەلگىلى بولادى", دەدى ول.
اقتاۋداعى وزبەكستاننىڭ باس كونسۋلى نوديرجان تۋرگۋنوۆ ەكى ەل اراسىنداعى تۋريزم سالاسىنىڭ دامۋىنا وڭ اسەر ەتەنىنە سەنىم ءبىلدىردى.
"بۇگىنگى كەزدەسۋ وڭىرارالىق ىنتىماقتاستىقتى جاڭا دەڭگەيگە كوتەرۋدىڭ جەمىستى الاڭى بولاتىنىنا, ۇرگەنىش پەن اقتاۋ اراسىندا تۇراقتى رەيستەردىڭ اشىلۋى وزبەكستان مەن قازاقستان اراسىندا تۋريزم سالاسىنىڭ دامۋىنا ىقپال ەتەتىنىنە سەنىم بىلدىرەمىن", دەدى باس كونسۋل.
بەينەكونفەرەنتسيا بارىسىندا اقتاۋ حالىقارالىق اۋەجايىنىڭ ديرەكتورى سەلچۋك كيلەدجي مەن ونىڭ ورىنباسارى مەرۋەرت جولدىباەۆا قوس ەلدىڭ تۋريستىك الەۋەتىن ارتتىرۋ باعىتىندا جاڭا جوبا ۇسىندى.
"الەمنىڭ تۇكپىر-تۇكپىرىنەن كەلگەن جولاۋشىلار, تۇركى تاريحىنا قىزىعۋشىلىق تانىتقاندار ىستامبۇل ارقىلى اقتاۋعا, اقتاۋدان ۇرگەنىشكە ۇشىپ كەتە الادى. حيۋانىڭ سۇلۋلىعىن كورىپ, ءارى قاراي بۇحارا, سامارقاند, تاشكەنت, تۇركىستان جانە ءۇرىمشى قالالارىنا بارۋعا مۇمكىندىك الادى. بۇل تۋريستىك باعىت ۇلكەن سۇرانىسقا يە بولادى دەگەن سەنىمدەمىز. وسىلايشا, اقتاۋ قالاسى ءتۋريزمنىڭ حابىنا اينالادى", دەدى مەرۋەرت جولدىباەۆا.
سونداي-اق, قازاقستان مەن وزبەكستاننىڭ تاريحي قالالارىن قامتيتىن بىرلەسكەن تۋريستىك مارشرۋتتار مەن باعدارلامالاردى ازىرلەۋ تۋرالى ۇسىنىس ايتىلدى.
