روبوت – ادامنىڭ دوسى
ۆيرۋس شارتاراپتى شىرعالاڭعا تۇسىرگەندە الەمدىك مەديتسينانىڭ ابىگەرگە تۇسكەنى بار. ىندەتپەن كۇرەس جولىندا ءبىراز مەديتسينا قىزمەتكەرى ايانباي تەر توكتى. وسى ءبىر سىن ساعاتتا تەحنولوگيالىق مۇمكىندىكتەر ولاردىڭ جۇمىسىن ءبىر سەرپىلتىپ تاستادى. قازىر الەم ەلدەرى دەنساۋلىق ساقتاۋ سالاسىنىڭ روبوتتاندىرۋ پروتسەسىن جەدەلدەتۋگە كىرىستى. ماسەلەن, وسى جىلدىڭ ءساۋىر ايىنىڭ سوڭىندا رەسەيدە بولمەنى دەزينفەكتسيالاۋشى روبوت پايدا بولدى. سبەربانك بۇل اقىلدى قۇرىلعىنى ەۋروپالىق مەديتسينالىق ورتالىقتا سىناق رەجيمىندە ىسكە قوستى. ونىڭ قۋاتتى ۋلترافيولەت شامدارى ينفەكتسيانىڭ 99,99%-ىن, سونىڭ ىشىندە كوروناۆيرۋستى جويۋعا قاۋقارلى. ماماندار 10 مەديتسينالىق كابينەت پەن ستاتسيونارداعى 6 پالاتانى دەزينفەكتسيالاۋ ءۇشىن بۇل روبوتقا ءبىر ساعات جەتكىلىكتى ەكەنىن ايتادى. اتالعان قۇرىلعىنى ديسپلەي جانە داۋىستىق حابارلامالار ارقىلى قاشىقتان باسقارۋعا بولادى.
سونداي-اق بەلگيادا ادامداردىڭ دەنە تەمپەراتۋراسىن ولشەپ, جەكە قورعانىس قۇرالدارىنىڭ بولۋىن باقىلايتىن Zora Bots اتتى اقىلدى قۇرىلعىلار ازىرلەندى. ونى جاساپ شىققان مامانداردىڭ پىكىرىنشە, كوروناۆيرۋسپەن كۇرەستە ەڭ الدىمەن ونىڭ تارالۋىن بولدىرماۋ ماڭىزدى. مەدقىزمەتكەرلەردىڭ جۇمىسىن جەڭىلدەتكەن بۇل روبوتتار پاتسيەنتتەرگە قاجەتتى زاتتار مەن ءدارى-دارمەكتەردى بايلانىسسىز جەتكىزۋ ءۇشىن دە قولدانىلادى.
ال يتالياندىقتار كوروناۆيرۋستان ەمدەلىپ جاتقان ناۋقاستارعا ءوز تۋىستارىمەن بەينە بايلانىس ورناتۋعا كومەكتەسەتىن double Robotics روبوتتارىن ىسكە قوستى. اۋىرعان شاقتا جاقىن ادامداردىڭ جانىڭدا بولۋى نەمەسە ولاردىڭ پسيحولوگيالىق قولداۋى ىندەتتى ەڭسەرۋگە تيتتەي دە بولسىن سەبەپكەر بولاتىنى بەلگىلى. وسىنداي جاقسى نيەتپەن double Robotics روبوتتارى ەكى ارانى جالعاپ, پاتسيەنتتىڭ كوڭىلىن باعاتىن كورىنەدى. ول سونىمەن قاتار ناۋقاستار مەن مەديتسينالىق مەكەمە قىزمەتكەرلەرى اراسىندا دەلدال رەتىندە قىزمەت ەتەدى ەكەن.
پاندەميا كەزىندە كارانتين تالاپتارىن قاتاڭ ساقتاپ, ۇيدە بولعان تۇرعىندار ءۇشىن تاپسىرىسىن جەتكىزىپ بەرۋ قىزمەتى قارقىن الدى. بۇل ۋاقىتتا ءار ۇيگە قاجەتتى زاتتى جەدەل ءارى بايلانىسسىز جەتكىزۋ ماڭىزدى بولدى. مۇنى ەسكەرگەن بريتانيانىڭ Starship كومپانياسىنىڭ روبوت قۇراستىرۋشىلارى كۋرەرلىك قىزمەت اتقاراتىن روبوتتار جاساپ شىعارعان. ولار ميلتون كەينس قالاسىنىڭ تۇرعىندارىنا ازىق-ت ۇلىك جانە تاعى دا باسقا قاجەتتى زاتتاردى جەتكىزىپ وتىرادى. كومپانيا وكىلدەرى بۇل قىزمەت ۇلىبريتانيانىڭ ۇلتتىق دەنساۋلىق ساقتاۋ قىزمەتىنىڭ قىزمەتكەرلەرى ءۇشىن مۇلدەم تەگىن كورسەتىلگەنىن ايتادى.
سمارتفوندار ءسىزدىڭ دەنساۋلىعىڭىز تۋرالى اقپارات بەرەدى
ەۋروپالىق ونەرتاپقىشتار COVID-19-دى جۇقتىرۋ تىزبەگىن باقىلاۋعا مۇمكىندىك بەرەتىن pepp-PT ءموبيلدى قوسىمشاسىن ىسكە قوستى. پايدالانۋشىلاردىڭ سمارتفوندارى Bluetooth سىمسىز تەحنولوگياسىنىڭ كومەگىمەن دەرەكتەر الماسىپ وتىرادى. ونىڭ جۇمىس ىستەۋ ءتارتىبى وتە وڭاي. بويىنان كوروناۆيرۋس ينفەكتسياسى انىقتالعان ازامات مەديتسينالىق مەكەمەدە جاسالعان QR كود-تى pepp-PT ءموبيلدى قوسىمشاسىنىڭ كومەگىمەن سكانەرلەيدى. بۇدان سوڭ ءانونيمدى اقپارات ورتالىق سەرۆەرگە جىبەرىلەدى. قوسىمشا جانىڭىزدا كوروناۆيرۋس جۇقتىرعان ادامنىڭ بار-جوعىنان حابار بەرەدى. ەگەر سوڭعى ەكى اپتا ارالىعىندا ۆيرۋس جۇقتىرعان اداممەن 15 مينۋتتان ارتىق بايلانىستا بولساڭىز, تەلەفونىڭىزعا بىردەن ءتيىستى حابارلامالار مەن ۇسىنىستار كەلەدى. ادامدار اراسىندا ىندەتتىڭ تارالۋىن شەكتەۋ مەن اۋرۋدىڭ الدىن الۋ ءۇشىن جاسالعان بۇل قوسىمشا ادام كوپ شوعىرلانعان ەۋروپالىقتار ءۇشىن ءبىراز كومەكتەسىپ جاتقان كورىنەدى.
سول سياقتى گەرمانيادا روبەرت كوح ينستيتۋتىنىڭ زەرتتەۋشىلەرى كوروناۆيرۋستىڭ تارالۋى تۋرالى اقپارات بەرەتىن ينتەراكتيۆتى كارتالار جاساعان. سونداي-اق سمارت-ساعاتتار مەن فيتنەس-بىلەزىكتەردىڭ يەلەرى ءۇشىن جۇرەكتىڭ سوعۋ جيىلىگى مەن ۇيقى جانە بەلسەندىلىك دەڭگەيى سىندى كورسەتكىشتەردى ۇنەمى دياگنوستيكالاپ وتىراتىن قوسىمشا ازىرلەنگەن. بۇل قوسىمشانى جۇكتەۋ ارقىلى دەنساۋلىعىڭىزدىڭ جاي-كۇيىن باقىلاپ وتىرۋعا بولادى. ەگەر پارامەترلەردىڭ بىرەۋى وزگەرگەن بولسا, بۇل دەنساۋلىعىڭىزدا قانداي دا ءبىر كىنارات بارىن بىلدىرەدى.
COVID-19 دياگنوستيكاسى مەن ونىڭ الدىن الۋداعى يننوۆاتسيالىق شەشىمدەر
2020 جىلدىڭ اقپان ايىندا قىتايلىق Infervision كومپانياسى كومپيۋتەرلىك توموگرافيا سۋرەتتەرىنەن سovid-19-دى انىقتايتىن اقىلدى دياگنوستيكا جۇيەسىن ىسكە قوستى. نەيروندىق جەلى ادامنىڭ كت سۋرەتىن دەرەكقورداعى سۋرەتتەرمەن سالىستىرا وتىرىپ, كوروناۆيرۋس بەلگىلەرىن انىقتايدى. مۇنداي كومپيۋتەرلىك تەحنولوگيا قىتايدىڭ 30-دان استام كلينيكاسىنا ەنگىزىلگەن. بۇل دارىگەرلەر جۇكتەمەسىن ازايتۋعا ايتارلىقتاي مۇمكىندىك بەرىپ وتىر. قاۋىپتى ىندەتتىڭ ەڭ العاشقى وشاعى دا وسى قىتايدا تىركەلگەن ەدى. بۇگىندە مۇندا ۆيرۋس جۇقتىرعاندار سانى ەداۋىر ازايىپ كەلەدى. بۇگىندە بۇل ەلدە 90 231 ادام ىندەت جۇقتىرعان. دارىگەرلەردىڭ تىنىمسىز ەڭبەگى مەن ءتۇرلى يننوۆاتسيالىق تەحنولوگيالاردىڭ ارقاسىندا قىتاي مەديتسيناسى كوروناۆيرۋس ينفەكتسياسىن بىرتە-بىرتە جەڭىپ كەلەدى.
ناۋرىز ايىنىڭ سوڭىندا رەسەيلىك Connectome.ai ستارتاپى كاسىپورىندارداعى بيولوگيالىق قاۋىپسىزدىكتى باقىلايتىن قۇرىلعىنى ۇسىندى. اقىلدى قول جۋعىش ددۇ ۇسىنىستارىنا سايكەس, قول جۋ ساپاسىن باقىلايدى. ول كاسىپورىنداعى قىزمەتكەرلەردىڭ بەت-الپەتى مەن ءىس-ارەكەتىن تاني وتىرىپ, جەكە قورعانىس قۇرالدارىنىڭ بار جوعىن دا تەكسەرە الادى. مامانداردىڭ ايتۋىنشا, سانيتارلىق جانە قاۋىپسىزدىك تالاپتارىن ساقتاماعاندار ءۇشىن وندىرىسكە كىرۋ اۆتوماتتى تۇردە بۇعاتتالادى. جۇيەنىڭ جۇمىس ءپرينتسيپى بەينە-اناليتيكا جانە جاساندى ينتەللەكتكە نەگىزدەلگەن سوڭ, ونى الداۋ مۇمكىن ەمەس كورىنەدى. مۇنداي اقىلدى قول جۋعىش تەحنولوگيالار رەسەيدىڭ, اسىرەسە تاماق ونەركاسىبى كاسىپورىندارىندا بەلسەندى تۇردە ەنگىزىلىپ جاتىر. بۇل ەلدە, سونداي-اق Promobot Thermocontrol + تەرمينالدارى كەڭىنەن قولدانىلۋدا. تەرمينال عيماراتقا كىرگەن قىزمەتكەرلەردىڭ دەنە تەمپەراتۋراسىن جاناسۋسىز ولشەۋگە مۇمكىندىك بەرەدى. يننوۆاتسيالىق قۇرىلعى 5 مينۋت ىشىندە 0,2 گرادۋسقا دەيىنگى دالدىكپەن 5 سم-گە دەيىنگى قاشىقتىقتا قاجەتتى ولشەۋلەردى جاساي الادى. سونداي-اق ول ادامداردىڭ داۋىستارى مەن سۋرەتتەرىن دەرەكتەر بازاسىندا ساقتايدى. عيماراتقا بوگدە ادامدار كىرگەن جاعدايدا دەرەكتەردى بىردەن كۇزەت قىزمەتىنە جىبەرىپ وتىرادى.
قاراپ وتىرساق, پاندەميا ءبىراز تۇسىنىكتىڭ تونىن تەرىس اينالدىردى. COVID-19 دەنساۋلىق ساقتاۋ سالاسىن تسيفرلاندىرۋعا سەرپىن بەردى. ادامزات جاڭا ءومىر ءسۇرۋ دەڭگەيىنە اياق باستى. يننوۆاتسيالىق ترەندتەردى قولدانۋ ءومىرىمىزدىڭ ءبىر بولشەگىنە اينالدى. «باسقا تۇسسە, باس باقشىل» دەمەكشى, ادام بالاسى بۇل كۇندەردى دە ارتتا قالدىرارىنا ءشۇبام جوق.
