مەديتسينا • 16 قىركۇيەك، 2020

جان جىلۋى دا ەم

15 رەت كورسەتىلدى

ەل تىلەگىن تىلەگەن ەلگەزەك جاننىڭ ەڭبەگى كەيدە كورىنە بەرمەيتىنى دە بار. ايتسە دە، تىرشىلىكتىڭ توڭىن نازىك جۇرەگىنىڭ جىلۋىمەن جىلىتىپ، بەلى اۋىرىپ، بالتىرى سىزداعاندارعا قالتقىسىز قىزمەت كورسەتەتىن مەدبيكە ەڭبەگى ۇشان-تەڭىز.

قىزمەت بارىسى تۋرالى از-كەم سويلەسۋگە كەلىسكەن بولاتىنبىز. جۇمىسىنىڭ جاي-جاپسارىن سۇراماق بولدىق. ەڭبەگىن دە. ومىرلىك ماقسات-مۇراتىن دا. ايتسە دە، قالالىق ەم­حانانىڭ مەدبيكەسى بايان يزمايلوۆانىڭ بۇگىندە ۋاقىتى تىم تاپشى بولىپ شىقتى. ايتۋىنا قا­راعاندا، ەكى بىردەي قارت ادامنىڭ دەنساۋلىعىن تەكسەرىپ، قاراپ شىعۋى كەرەك. جا­سى ۇلكەن ادامدار ۇزاق كۇتكەندى ۇناتا بەرمەيدى. سودان سوڭ سىرقاتتانىپ قالعان ءۇش بالاعا بارماق. وسىلاي جالعاسا بەرەتىن سىڭايلى. تىلشىگە تابانىنان تاۋسىلىپ ەڭبەك ەتىپ جۇر­گەن جايىن ءتىس جارىپ ايتۋعا ىقىلاس بولعانىمەن، ۋاقى­تى جەتپەيدى.

كەيىپكەرىمىز قىزمەت ەتەتىن ەمحانانىڭ №226 ۋچاسكەسىندە 1800 ادام تىر­كەلگەن ەكەن. ادام كوپ بولعان سوڭ اۋرۋ دا از ەمەس. ونىڭ ۇستىنە جامان تۇماۋ جان القىمنان العان ساتتە ايرىقشا ساق بولماسا تاعى بولمايدى. سوندىقتان حابار تيىسىمەن الىپ-ۇشىپ جەتەدى. بەينەبىر پەندەنىڭ پەرىشتەسى ىسپەتتى.

– اۋرۋ ازابىن ارقالاپ، توسەك تارتىپ جاتقان جان­نىڭ كوڭىلى كۇيزەلۋى دە مۇمكىن، – دەيدى مەدبيكە، – سول ساتتە ەم-دومىڭ بىلاي تۇرسىن، ءبىر اۋىز جىلى ءسوزىڭ­نىڭ ءوزى قۋات بەرەدى.

سىرقاتتانعان جانعا جىلى سوزىمەن، جان جىلۋىمەن دەمەۋ بولىپ، ءۇمىت ءجىبىن بەكەمدەۋگە بارىنشا ­كۇش سالىپ كەلە جاتقان بايان قۋانىشبايقىزى كوك­شەتاۋ مەديتسينا ۋچي­ليششەسىن ءتامامداپ، ەڭبەك جولىن باستاعالى دا تابانى كۇرەكتەي وتىز جىل وتە شىعىپتى.

– ۇنەمى قاۋىرت قيمىل ۇستىندە جۇرەتىن مەديتسينا قىزمەتكەرلەرىنىڭ ءوتىنىشىڭدى قۇلاق قويىپ تىڭداپ، مۇقيات قاراۋىنىڭ ءوزى سىرقاتىڭدى پىشاقپەن سىلىپ تاستاعانداي اسەر ەتەدى، – دەيدى قالا تۇرعىنى نۇرلان الپىسباەۆ، – ادام كوڭىلى ءبىر اۋىز جىلى سوز­دەن ءوسىپ قالادى عوي. ءبىز­دىڭ ۋچاسكەدەگى مەديتسينا قىز­مەتكەرلەرىنىڭ ءمىنسىز قىزمەتى اۋىز تولتىرىپ ايتۋعا ابدەن لايىقتى.

جىلى جۇزىنەن مەيىرىم شۋاعى ەسەتىن، ال ءار سوزىنەن جانعا جايلى قۋات تارايتىن ول ءبىلىمدى تاجىريبەمەن ۇشتاستىرىپ، قيىندىعى مول، جاۋاپكەرشىلىگى جو­عارى جۇمىسىمەن ادام­دار­دىڭ اق العىسىن ارقالاپ كەلەدى. ايتۋىنا قاراعاندا، ەل كوڭىلىنەن شىعۋ ءۇشىن ءبى­­لىم مەن تاجىريبە ازدىق ەتەدى. ارينە ول دا كەرەك،­ ايتسە دە ەڭ باستىسى ءوز ماماندىعىڭا دەگەن شەك­سىز سۇيىسپەنشىلىك. سوندا عانا ىستەگەن ىسىڭنەن ناتيجە شىعىپ، ءوز قىزمەتىڭە ءوزىڭ­نىڭ كوڭىلىڭ تولىپ، مارقايۋىڭ مۇمكىن. سەنەن دەمەۋ ىزدەگەن، سەنەن جاردەم تىلەگەن اينالاداعى ادامدار دا كوڭىل كۇيىڭدى، ىقىلاسىڭ مەن ىزەتىڭدى جازا باسپاي تانىپ، سەزىنىپ تۇرادى. مىنە، سۇيىسپەنشىلىكتىڭ كەرەك جەرى وسى. اسىلىندا بار زەيىنىڭ، ىقىلاسىڭ مەن پەيىلىڭ اۋعاندا عانا ەكى ارادا كوزگە كورىنبەيتىن سەزىنۋ پايدا بولماق.

– ءبىز ەرەسەكتەرمەن قا­تار بالالارمەن دە جۇ­مىس ىستەيمىز عوي، ۇلكەن ادامدار قاي جەرى اۋىرىپ تۇرعانىن تاپ-تۇيناقتاي ەتىپ ايتىپ بەرە السا، سا­بيلەر ولاي تۇسىندىرە المايدى. سول ءۇشىن مەدبيكە ەڭ ءبىرىنشى جاقسى پسيحولوگ بولۋعا ءتيىس، – دەيدى بايان قۋانىشبايقىزى.

ەڭبەگىنە باعا بەرەتىن دە پەرىشتە بالالاردىڭ پەيىلى ەكەن. وزىنە سالسا، ودان ارتىق اتاق پەن قۇرمەتتىڭ ەش قاجەتى جوق. جوعارى ساناتتى مەدبيكە اتانۋى ۇجىمدا، ەڭ باستىسى، ەل ىشىندە سىيلى بولۋى دا ءوزى ءاۋ باستا قالاپ العان ماماندىعىنا دەگەن سۇيىسپەنشىلىگى.

 

كوكشەتاۋ

 

سوڭعى جاڭالىقتار

اشىقتىق – قوعام دامۋىنىڭ كەپىلى

ايماقتار • بۇگىن، 13:00

دوللار قايتا قىمباتتادى

ەكونوميكا • بۇگىن، 12:18

ۇقساس جاڭالىقتار