قوعام • 15 قىركۇيەك، 2020

جاھاندى جايلاعان جەگى

18 رەت كورسەتىلدى

فرانتسيادا ءبىر كۇندە پاندەميا باستالعالى بولماعان رەكوردتى اۋرۋ كورسەتكىشى تىركەلدى، دەپ حابارلايدى اتالعان ەلدىڭ دەنساۋلىق ساقتاۋ مينيسترلىگىنىڭ ءباسپاسوز قىزمەتى.

تاۋلىك ىشىندە 10 561 ادامعا اۋرۋدىڭ جۇعۋى فرانتسۋزداردى ۇرەي­لەندىرىپ تاستاعانداي. قىر­كۇيەك­تىڭ 11-دە 9843 جاننىڭ ۆيرۋس جۇقتىر­عانى انىقتالعاندا جيى­رىلعان حالىق، ەندى بۇل كورسەت­كىشتىڭ تاعى 718 ادامعا كوبەيىپ كەتكەنىنە الاڭداۋشىلىق بىلدىرۋدە.

 

العاشقى رەكوردتى اۋرۋ تىركەل­گەن 11 قىر­كۇيەكتە فرانتسيا پرەمەر-ءمينيسترى جان كاستەكس ەلدەگى COVID-19-دىڭ وسىمىنە قىنجىلا وتىرىپ، بارشا حالىقتى الەۋمەتتىك قاشىقتىققا مۇقيات بولۋدى، ساق­تىق شارالارىن قاتاڭ ۇستانىپ، ۆيرۋس­قا تەست تاپسىرۋعا شاقىردى. ال تا­مىز­دىڭ سوڭىندا پاريج بيلىگى قالا تۇر­عىندارىنا تەگىس تۇمشا تاعىپ ءجۇرۋدى مىندەتتەگەن ەدى. ءتىپتى جۇگىرۋگە شىقسا دا تاعۋ قاجەت.

 * * *

ۇلىبريتانيادا SARS-CoV-2-كە قارسى ۆاكتسينا ازىرلەۋدەگى اعىلشىن-شۆەد بىرلەسكەن جوباسى توقتاپ قالعان بولاتىن. REGNUM اگەنت­تىگى AstraZeneca فارم­كومپانياسىنىڭ وكسفورد ۋنيۆەرسيتەتىمەن وداقتاسا قولعا الى­نىپ، بىراق ءبىراز ۋاقىتقا توق­تا­تىلعان جۇمى­سى قايتا جالعاس­تى دەگەن حابار تاراتتى.

وعان سەبەپ بولعان COVID-19-عا قار­سى ۆاكتسينا ازىرلەۋدە تاجىريبەدەن ءوتىپ جۇرگەن ءبىر ەرىكتىنىڭ اۋىرىپ قا­لۋى ەدى. بۇل – ەرىكتى اعزا­سىنا ۆاكتسي­نا تيگىزگەن جاناما اسەر بولۋى مۇم­كىن دەپ دەرەۋ تاجىريبە توقتاتىلعان بولا­تىن. الايدا ەلدەگى دارىلەر مەن مەدي­تسي­نالىق ماق­ساتتاعى زاتتاردىڭ ساپاسىن قاداعالايتىن اگەنت­تىك (MHRA) ۆاك­تسينانىڭ زيانسىزدىعى تۋرالى قور­­ىتىندى جاساپ، ۆاكتسينانىڭ ءارى قا­راي­­ تاجى­ريبەدەن وتۋىنە جول اشىپتى.

 * * *

ۆەنەسۋەلا بيلىگى وسىعان دەيىنگى ىشكى جانە سىرتقى اۋە قاتىناس­تارىن توقتاتقان شەشىمىن تاعى دا ۇزارتتى.

پاندەميانىڭ لاتىن امەريكاسى ەلدەرىنە تىرناعىن قاتتى باتىرعانى ءمالىم. وسىعان دەيىن دە سىرتتان ادام كەلۋىنە شەكاراسىن نىقتاعان ەل، ەندى ونى ءارى قاراي سوزا ءتۇسۋ قاجەت دەگەن ۇيعارىمعا كەلگەن كورىنەدى. اۋە قاتىناستارىن 30 كۇنگە شەكتەگەن شارا قازان ايىنىڭ 12-ىنە دەيىن جالعاساتىن بولدى. بۇل تەك ادامداردىڭ ەلگە كىرىپ-شىعۋىنا قاتىستى، ال گۋمانيتارلىق جانە پوشتا مەن جۇك تاسۋعا ەش كەدەرگى جوق دەيدى ەل ۇكىمەتى.

 * * *

برازيليا حالقىنىڭ ەڭسەسىن باسقان ەپيدەميا قۇرساۋىن بوساتار ەمەس. وتكەن تاۋلىكتە 814 ادام كوز جۇمعان.

جالپى، 131 210 برازيليالىق ىندەتتىڭ قۇربانى بولدى. ەلدە SARS-CoV-2 جۇقتىرعاندار 4  315  687 ادامدى قۇراپ، لاتىن امەريكاسىنداعى بارلىق سىرقاتتىڭ تەڭ جارتىسى ءبىر برازيليادان شىعىپ وتىر. سوڭ­عى دەرەكتەرگە قاراعاندا، وڭتۇس­تىك امەريكا قۇرلىعىنداعى ۆيرۋس جۇق­تىرعاندار سانى 8 ميلليوننان اسىپ جىعىلعان.

 * * *

سانكت-پەتەربۋرگ بيلىگى COVID-19-بەن كۇرەس ءۇشىن قوسىمشا ستاتسيو­نارلار اشۋعا ءماجبۇر بولدى.

سەماشكو اتىنداعى №38 كوپ­بەيىندى اۋرۋحانا ينفەكتسيالىق ستاتسيونار قىزمەتىن اتقارۋعا كوشتى. بۇل جايىندا سانكت-پەتەربۋرگ دەنساۋلىق ساقتاۋ كوميتەتىنىڭ ءباسپاسوز قىزمەتى حابارلادى.

REGNUM اگەنتتىگى اتالعان كلي­ني­كانىڭ وسىمەن ەكىنشى رەت ءوز بەيى­نىن وزگەرتىپ وتىرعانىن جازادى. ال­عا­شىندا اۋرۋحانا قابىرعاسىندا 1550 پاتسيەنت ەمدەلىپ شىعىپ، ءوزىنىڭ قالىپتى جاعدايداعى قىزمەتىنە ورال­عان مەكەمە ەگەر قاجەت بولسا قايتادان ينفەكتسيالىق ستاتسيونارعا اۋىسۋ مۇم­كىندىگىن ەسكەرگەن. سول ۋاقىت تۋدى، كلينيكا ەكىنشى رەت SARS-CoV-2-گە قارسى كۇرەسكە جۇمىلدى.

رەسەي فەدەراتسياسىنىڭ قۇرا­مىنداعى وزگە ايماقتار ىشىنەن ىندەت تارالۋى بويىنشا نەۆا بويىن­داعى اسەم قالا الدىڭعى ورىنعا شىعىپ، وتكەن تاۋلىكتە 23 پاتسيەنت ومىرمەن قوشتاسىپتى. جالپى، پە­تەر­بۋرگ بويىنشا كۆي-دەن اجال قۇش­قاندار سانى 2630 ادام بولىپ، ءولىم كورسەتكىشى جونىنەن ماسكەۋدەن كەيىن تۇر.

 

 

 

سوڭعى جاڭالىقتار

شىرقاۋ شىڭى شوقاننىڭ

رۋحانيات • كەشە

ۇقساس جاڭالىقتار