ەرنات مەلس ۇلى باستاعان ۆەلوشاباندوزدار 2 قىركۇيەكتە نۇر-سۇلتاننان شىعىپ, ەرەيمەنتاۋ, ەكىباستۇز, پاۆلودار, سەمەي قالالارىن باسىپ ءوتىپ, 11 قىركۇيەكتە جيدەبايداعى «اباي-شاكارىم» ماۆزولەي كەشەنىنە جەتىپ توقتاعان. ۆەلوشەرۋدىڭ ماقساتى – ابايدىڭ ونەگەلى ءومىرىن, باي مۇراسىن ناسيحاتتاۋعا اتسالىسۋ, جاستاردى ەلدى, جەردى سۇيۋگە ۇندەۋ جانە حالىقتى سالاماتتى ءومىر سالتىن ۇستانۋعا شاقىرۋ ەدى.
ۆەلوشاباندوزدار ەلدى مەكەندەردى باسىپ قانا وتكەن جوق, تابان تىرەگەن ءار قالانىڭ تاريحىن تانۋعا تىرىستى. تۇرعىندارىمەن, شەجىرەشىلەرمەن اڭگىمە تارقاتىستى.
– ابايتانۋشى عاريفوللا ەسىم اققۋلىنىڭ تۋماسى ەكەنىن بىلمەيدى ەكەنبىز. ءبىز سول اۋىلدا قوندىق, ەلمەن اڭگىمەلەستىك. سەمەيگە 38 شاقىرىم جەتپەي سول جاعىمىزدا 1800 جىلدارى سالىنعان مەشىت كورىندى. سۇراستىرساق, عيمارات ءبىر شەگەسىز سالىنعان ەكەن, – دەيدى اعىلشىن ءتىلىنىڭ وقىتۋشىسى-اۋدارماشى ەرنات مەلس ۇلى.
ال الاش استاناسى – سەمەيگە جەتكەن ازاماتتار اباي ەسكەرتكىشىنە گۇل شوقتارىن قويدى, مۇراجايلاردى ارالادى. تانىم كوكجيەكتەرىن كەڭەيتتى. ۆەلوشاباندوزداردىڭ ايتۋىنشا, اۋىرىپ ەم ىزدەگەنشە سالاماتتى ءومىر سالتىن ۇستانىپ, اۋىرمايتىن جول ىزدەگەنىمىز ابزال. ءار ادام جۇمىسىنا, سەرۋەنگە ۆەلوسيپەدپەن شىقسا ۋاقىتىن دا, اقشاسىن دا ۇنەمدەيدى. البەتتە دەنساۋلىعىن نىعايتۋعا زور اسەرىن تيگىزەدى.
ۆەلوشاباندوزداردى اباي ەلى قۇشاق جايا قارسى الدى. مۇندا ولار ابايدىڭ رۋحىن سەزىنىپ, ومىرىمەن, شىعارماشىلىعىمەن تانىسادى, وزدەرى دە تاريحتى ناسيحاتتاۋعا ۇلەس قوسادى.
شىعىس قازاقستان وبلىسى
