ەلوردانىڭ دوستىق ۇيىندە "ماما" فوتوكورمەسى اشىلدى. ەكسپوزيتسيادا كوپ بالالى انالاردىڭ فوتوسۋرەتتەرى, سونىمەن قاتار وتباسى قۇندىلىقتارىن بەينەلەيتىن سۋرەتتەر قويىلعان. كورمەنىڭ اشىلۋىنا وتباسىنا قامقورلىق پەن بەلسەندى قوعامدىق جۇمىستى قاتار الىپ جۇرگەن انالار قاتىستى.
"سىزدەرگە وتباسى ينستيتۋتى مەن قوعامداعى بىرلىكتى نىعايتۋعا قوسقان ۇلەستەرىڭىز ءۇشىن العىسىمىز زور. سىزدەرگە تاعزىم, قۇرمەتتى ايەلدەر, انالار! زور دەنساۋلىق پەن ساتتىلىك تىلەيمىن", دەدى اكىمنىڭ باس ينسپەكتورى, ايەلدەر ءىسى جانە وتباسىلىق-دەموگرافيالىق ساياسات جونىندەگى كوميسسيا حاتشىسى ءمولدىر بولەباەۆا.
سونداي-اق شارا بارىسىندا انالار كەڭەسىنىڭ ەڭ بەلسەندى مۇشەلەرى قازاقستان حالقى اسسامبلەياسىنىڭ 25 جىلدىعىنا ارنالعان مەدالمەن ماراپاتتالدى.
"باسشىلىعىمىزدىڭ اتىنان انالار كەڭەسىنىڭ مۇشەلەرىنە مەدال تاپسىرعىم كەلەدى. بۇل ءارتۇرلى ەتنيكالىق توپتاردىڭ وكىلدەرى. سىزدەرگە جەنكەشتىلىك ەڭبەك ءۇشىن راحمەت!", دەدى نۇر-سۇلتان قالالىق قحا حاتشىلىعىنىڭ مەڭگەرۋشىسى ءلاززات قۇسايىنوۆا.
فوتوكورمەگە قاتىسۋشىلار مۇنداي شارالاردىڭ ۇرپاق تاربيەسىندە ماڭىزدىلىعىن اتاپ ءوتتى. ەسكە سالا كەتەيىك, قازاقستاندا وتباسى كۇنى قىركۇيەكتىڭ ءار ەكىنشى جەكسەنبىسىندە اتاپ وتىلەدى.
