شىلدەنىڭ باسىندا ىندەتكە شالدىعۋشىلاردىڭ كۇرت ارتۋىنا بايلانىستى قالاداعى بارلىق ەمحانا مەن اۋرۋحانا قىزمەتكەرلەرى پروۆيزورلىق گوسپيتالدارعا ۋاقىتشا جۇمىلدىرىلىپ, مۇنىمەن ءبىر كەزدە ءوز جۇمىس ورىندارىندا ەڭبەكاقىلارى ساقتالاتىنى ۋادە ەتىلگەن. الايدا پاندەميا كەزىندە ناۋقاستاردىڭ ءومىرىن قۇتقارعان مەليتسينا قىزمەتكەرلەرىنىڭ قولدارىنا ءۇش ايدان بەرى ەشتەڭە تيمەگەن.
وسى جاعدايعا بايلانىستى وبلىستىق دەنساۋلىق ساقتاۋ باسقارماسىنىڭ باسشىسى سامات دانياروۆ پەن مىندەتتى الەۋمەتتىك مەديتسينالىق ساقتاندىرۋ قورىنىڭ اقتوبە وبلىسى بويىنشا ديرەكتورى باتىربەك نۇرعاليەۆ تۇسىنىك بەردى. ىندەت ءورشىپ جاتقان كەزدە ورنىنان ءوز ەركىمەن كەتكەن اسەت قاليەۆتىڭ ورنىنا جاقىندا عانا تاعايىندالعان سامات دانياروۆ تولەمدەردىڭ كەشىكتىرىلۋىنە مەديتسينالىق قىزمەتكە تولەنەتىن تاريفتەردىڭ وزگەرتىلۋىنە بايلانىستى تەحنيكالىق كىدىرىستەر سەبەپ بولدى دەيدى. ونىڭ ايتۋىنشا, بۇگىن COVID-19 جانە ۆيرۋستىق پنەۆمونيا ءورشىپ تۇرعاندا پروۆيزورلىق ورتالىقتاردا جۇمىس ىستەگەن قىزمەتكەرلەرگە ماۋسىم –شىلدە ايىنا تيەسىلى تولەمدەر اۋدارىلدى, ەندى از كۇندە تامىز ايىنىڭ قارىزدارى تولىق وتەلمەكشى.
"ماسەلە پروۆيزورلىق گوسپيتالداردى قارجىلاندىرۋداعى قيىندىقتارعا بايلانىستى تۋىندادى. سەبەبى, بيىلعى شىلدەگە دەيىنگى قولدانىستاعى ەمدەۋ تاريفتەرى مەديتسينالىق مەكەمەلەردىڭ بارلىق شىعىندارىن وتەگەن جوق. پاندەميا باستالعاندا دەنساۋلىق ساقتاۋ ءمينيسترىنىڭ بۇيرىعىمەن 1 شىلدەدەن باستاپ پروۆيزورلىق ستاتسيونارلارداعى ەمدەۋ تاريفتەرى قايتا قارالىپ, وزگەرىستەردىڭ مەديتسينالىق اقپاراتتىق باعدارلاماعا ەنگىزىلۋى ۋاقىت الدى" - , دەدى مىندەتتى الەۋمەتتىك مەديتسينالىق ساقتاندىرۋ قورىنىڭ اقتوبە وبلىسى بويىنشا ديرەكتورى باتىربەك نۇرعاليەۆ.
اقتوبە وبلىسى
