ۆەلوساياحاتشى ۇزاق ساپارىن قىزىلوردا قالاسىنان باستاپ, تەكەلى قالاسىنا دەيىن 20 كۇندە جەتكەن. 13 جاسىنان ۆەلوسيپەدتى سەرىك ەتكەن ارۋ 2014 جىلدان بەرى وسى سپورت تۇرىمەن اينالىسىپ, شەت مەملەكەتتەردىڭ 13 قالاسىندا بولىپ ۇلگەرگەن. اقمارال بۇل جەرگە ارنايى تەكەلى قالاسىندا ورنالاسقان «بۇرقانبۇلاق» سارقىراماسى مەن تاۋلى ايماقتاردى كورۋ ءۇشىن كەلگەنىن جاسىرمادى.
– اسەم تابيعاتى كورگەن جاننىڭ تاڭدايىن تامساندىراتىن اسپانمەن تالاسقان تاۋلارى, جاسىل جەلەكتى باۋلارى جانعا دا, مالعا دا قۇتتى مەكەن. جەتىسۋدىڭ جاقۇتىنداي قورا, شاجا, تەكەلى جانە قاراتال وزەندەرى بىرىمەن ءبىرى جالعاسا تاۋلى ولكەنىڭ ءسانىن كەلتىرە, سىلدىراي اعادى. مەنىڭ جانىما جاقىن وسى كورىنىس. ىندەت جايلاعان شاقتا, بارىنشا قاۋىپسىزدىگىن ەسكەرىپ ۆەلوسيپەدپەن جولعا شىقتىم. بالا كۇنىمدە وسى مەكەندى كورسەم دەپ ارماندايتىنمىن. تەكەلىنىڭ تۇمسا تابيعاتى جانعا شۋاق, بويعا قۋات سىيلايدى ەكەن. شارشاعانىمدى ۇمىتىپ تا كەتتىم. ساپار ساتىمەن بولدى دەپ ويلايمىن, – دەيدى ا.ءماجيتوۆا.
ونىڭ ايتۋىنشا, بۇل يگى باستاماعا مۇرىندىق بولعان ۆەلوسپورت سالاسىن دامىتىپ جۇرگەن تەكەلىلىك «Velotravel Tekeli» تۋريستىك ورتالىعى. ورتالىق جىل سايىن ءداستۇرلى تۇردە وسىنداي شارالار ۇيىمداستىرىپ, قالانىڭ ءساندى نىساندارى مەن عاجايىپ تابيعاتىن قوناقتارعا تاماشالاتادى. بۇل بالالار مەن جاسوسپىرىمدەردى مەملەكەتتىك پاتريوتتىق جانە ەكولوگيالىق ينتەرناتسيونالدىق تاربيەلەنۋىنە جاعداي جاسايدى. الىستان كەلگەن قوناقتى الدىنان شىعىپ كۇتىپ العان تەكەلى قالاسىنىڭ اكىمى باقتيار ونەرباەۆ مۇنداي يگى باستامالار ىشكى ءتۋريزمنىڭ دامۋىنىڭ نەگىزگى تەتىگى ەكەنىن ايتادى.
«تەكەلى قالاسىنىڭ تابيعي لاندشافتى مەن كليماتتىق ەرەكشەلىگى قالا مەن ونىڭ ماڭايىندا ءتۋريزمدى دامىتۋعا زور مۇمكىندىك بەرەدى. سوندىقتان تۋريستىك سالا الماتى وبلىسى باسشىلىعىنىڭ ايرىقشا نازارىندا. قازىرگى كەزدە وبلىس اكىمى اماندىق باتالوۆتىڭ تاپسىرماسىنا سايكەس ارنايى تۋريستىك شارالار كوپتەپ ازىرلەنىپ, تۋريستىك بازالار مەن باسقا دا تۋريستىك نىسانداردىڭ قۇرىلىسىنا ينۆەستور تارتۋ ءىسى جولعا قويىلدى. بۇل باعىتتاعى جۇمىس كەلەر جىلى دا جالعاستىرىلادى», دەيدى ب.ونەرباەۆ.
ءوز كەزەگىندە تەكەلى قالاسى اكىمى بىرنەشە شاقىرىمدى ارتقا تاستاپ, ۇلكەن تاۋەكەلمەن ساپارلاعان ۆەلوساياحاتشى اقمارالعا العىس ايتىپ, ماراپات ۇسىندى.
ايتا كەتەيىك, قىزىلوردا مەن تەكەلى قالالارىنىڭ اراسى 1400 شاقىرىمدى قۇرايدى. ۇزاق جول تالدىقورعان, الماتى, تاراز, شىمكەنت, تۇركىستان قالالارى ارقىلى وتەدى.
