"پرەزيدەنت قاسىم-جومارت توقاەۆتىڭ تاپسىرماسىنا سايكەس, سونىمەن بىرگە ەلدە تابيعاتقا قارسى قاستاندىق ارەكەتتەرىنىڭ ءجيى ورىن الۋىنا بايلانىستى اكىمشىلىك قۇقىقبۇزۋشىلىق تۋرالى كودەكستىڭ قورشاعان ورتانى لاستاۋعا قاتىستى تۇستارىنا وزگەرىستەر دايىندالدى", دەدى ول مەملەكەت باسشىسىنىڭ جولداۋىن جۇزەگە اسىرۋعا قاتىستى وتكەن بريفينگتە.
ءمينيستردىڭ سوزىنشە, ەندى كوپشىلىك تۇتىناتىن قوعامدىق ورىنداردى بىلعاۋ ارەكەتتەرىنە, قالالار مەن ەلدى-مەكەندەردەگى جاسىل جەلەككە زيان كەلتىرۋگە, سۋ رەسۋرستارىن قورعاۋ ەرەجەسىن, ورمانداعى ءورت قاۋىپسىزدىگى تالاپتارى مەن سانيتارلىق ەرەجەلەردى بۇزۋعا, ورمان فاۋناسىن جويعان نەمەسە زيان كەلتىرۋگە جانە ورمانعا قوقىس, حيميالىق زاتتار تاستاۋعا, باسقا دا ورمان قورىنا كەلتىرىلگەن زالالعا قاتىستى ايىپپۇلدار قۇنى ارتپاق.
ايىپپۇل جەكە تۇلعالار ءۇشىن 10 اەك-تەن 20 اەك-كە, ورتا جانە ءىرى بيزنەس وكىلدەرىنە 30 بەن 70 اەك-تەن 75 جانە 500 اەك-كە كوتەرىلەدى. ۆەدومستۆا باسشىسى بريفينگتە سونىمەن قاتار جانۋارلاردى قورعاۋعا قاتىستى جاڭا زاڭ جوباسىنىڭ جۇزەگە اسۋ بارىسى تۋرالى دا ايتىپ ءوتتى.
"زاڭ جوباسى ۇكىمەتكە ەنگىزىلىپ قويدى. وسى جەردە ءتيىستى كەلىسىم وتكەننەن كەيىن جاقىن ۋاقىتتا پارلامەنتكە جىبەرىلەدى", دەدى مينيستر.
زاڭ جوباسىنا دەلفيناريلەردى جابۋ تۋرالى نورما دا ەنگىزىلگەن.
"دەلفيناريلەردى جابۋ تۋرالى نورما قۇجاتتا مىندەتتى تۇردە بولادى. زاڭ جوباسىنىڭ درافتىنە ءتيىستى نورمانى بەكىتتىك. وزدەرىڭىز بىلەتىندەي, سوڭعى كەزدەرى قوعامدىق بەلسەندىلەر مەن حالىقارالىق قوعام قايراتكەرلەرىنەن دەلفيناريلەرگە تىيىم سالۋ تۋرالى ۇندەۋلەر كوپ ءتۇسىپ جاتىر. سوندىقتان وسىنداي نورما جاساپ وتىرمىز. ول تەك دەلفيناريلەرگە قاتىستى ەمەس. جابايى جانۋارلارعا قاتىستى باسقا دا شەكتەۋلەر بار", دەدى م.مىرزاعاليەۆ.
