ارتىق ءوندىرىس. داعدارىس ءسان الەمىنىڭ باستى ماسەلەسى – ارتىق ءوندىرىستىڭ بار ەكەنىن كورسەتىپ بەردى. بۇعان دەيىن برەندتەر جىلىنا التىدان سەگىزگە دەيىن كوللەكتسيالار شىعارۋعا ۇيرەنىپ العان ەدى. بىراق جاڭا ەكونوميكالىق جاعداي بۇرىنعىداي استا-توك جيىنداردىڭ مۇمكىن ەمەس ەكەنىن ايقىنداپ وتىر. امەريكالىق ءسان ديزاينەرلەرى كەڭەسى (CFDA) جانە بريتاندىق ءسان كەڭەسى (BFC) ءسان يندۋسترياسىنىڭ قاتىسۋشىلارىنا ۇندەۋ تاستادى جانە جاڭا جاعدايعا بەيىمدەلۋ بويىنشا بىرقاتار ۇسىنىستار بەردى. مالىمدەمەدە رەفورمانىڭ ءارتۇرلى باعىتتارى, سونىڭ ىشىندە ءوندىرىستى باسەڭدەتۋ, ارتىق ءوندىرۋدىڭ الدىن الۋ ماقساتىندا تۇتىنۋشىلاردىڭ قاجەتتىلىكتەرىنە مۇقيات قاراۋ, سونداي-اق كوللەكتسيالاردىڭ سانىن جىلىنا ەكىگە دەيىن ازايتۋ, ودان گورى ساپالى بۇيىمدار جاساۋ قاجەتتىگى ايتىلعان. حاتتا 2021 جىلعى كوكتەمگى كوللەكتسيالار ۆيرتۋالدى فورماتتا كورسەتىلەتىنى بەلگىلەنگەن. كارانتين شەكتەۋلەرى الىنعاننان كەيىن, الەمدىك ءسان كۇنتىزبەسىنە سايكەس CFDA جانە BFC ءسان كورسەتىلىمدەرىن ءسان استانالارىنىڭ بىرىندە وتكىزۋدى ۇسىنىپ وتىر.
ءسان ءراسىمى ۆيرتۋالدى فورماتتا سىنالۋدا. بەلگىلى ديزاينەر, ءسان جانە توقىما مۋزەيىنىڭ قۇرۋشىسى, «ZHUZBAY» برەندىنىڭ اۆتورى ايجان ءجۇزباي ەندىگى جەردە ءسان برەندتەرى ستاندارتتى جانە ۇيرەنشىكتى ماتا مەن ماتەريالدارعا بالاما ىزدەي باستاعانىن ايتادى.
– قازىر ەستەتيكا مەن فۋنكتسيونالدىلىقتى قامتاماسىز ەتەتىن جوعارى تەحنولوگيالىق ماتەريالداردى جاساۋ, قولدانۋ باستى باعىتتاردىڭ بىرىنە اينالدى. جاڭا تەحنولوگيالار اۋقىمىندا قولدانىلاتىن جانە قورشاعان ورتاعا زيان كەلتىرەتىن جاڭا تالشىقتاردى, توقىما ماتەريالدارىن, ارلەۋ ماتەريالدارىن جاساۋعا كوبىرەك كوڭىل بولەدى دەپ كۇتىلۋدە. سونداي-اق ءبىزدىڭ ەلدە دە نانوتەحنولوگيا مەن عىلىمعا نازار اۋدارىپ, قاراجات مولىنان ءبولىنۋ كەرەك. مەن توقىما ءوندىرىسى بويىنشا ماگيسترلىك ءبىلىم الدىم, سول كەزدەگى نانو ماتا جوبامدى «QAZDETEX» جشس-ءى نەگىزىندە ءارى قاراي كاسىبي تۇردە جالعاستىرىپ كەلەمىن, – دەيدى ايجان ءجۇزباي.
ونىڭ ايتۋىنشا, لوندون, ميلان جانە پاريجدەن شىققان ءساندى برەندتەر كارانتين كەزىندە تىكەلەي ەفيردەن سالەم جولداپ, كورەرمەندەر تاراپىنان ونداعان ميلليون پىكىر جيناعان. «يتاليانىڭ ۇلتتىق ءسان پالاتاسى (Camion Nazionale della Moda) SS’21 ەرلەر توپتاماسى مەن SS’21 ايەلدەر توپتاماسىن تىكەلەي ەفيردە كورسەتەتىنىن مالىمدەدى. وسىلايشا, ميلان مەن پاريجدە وتەتىن ءسان اپتالىقتارىنىڭ ءداستۇرلى كەزەگى اياقاستى وزگەردى. ەندى بارلىعى باسقاشا بولادى», دەيدى ول. ونداعان جىلدار بويى ءسان يندۋسترياسىندا جۇمىس ىستەپ كەلە جاتقان تاجىريبەلى ماماننىڭ ايتۋىنشا, الەمدىك تاجىريبەدە ديزاينەرلەردىڭ سالوندارى كاسىبي كورسەتىلىمدەر ورنى بولىپ سانالادى. ال پوستكەڭەستىك ەلدەردە بۇل تەك ساۋدا نۇكتەلەرى رەتىندە قاراستىرىلۋى باسىم. سوندىقتان كاسىبي كورمە زالىن قۇرۋ كەزىندە ديزاينەرلەردى عانا ەمەس, ساتىپ الۋشىلاردى دا تارتۋ قاجەت.
– قازاقستاندا جەڭىل ونەركاسىپتى دامىتۋ ءۇشىن سالىقتىق جەڭىلدىكتەر جاساۋ, سونداي-اق قاجەتتى مولشەردە وندىرە المايتىن ماتالار مەن اكسەسسۋارلاردىڭ يمپورتىنا كەدەندىك باجدى ازايتۋ نەمەسە ءتىپتى الىپ تاستاۋ قاجەت. سەبەبى كەدەن باجى تاۋاردىڭ نەگىزگى باعاسىن ءوسىرىپ, تاۋاردىڭ تەز ساتىلۋىنا كەسىرىن تيگىزەدى. بۇل شەشىمدەردى ورىنداۋ قىسقا مەرزىمدە مۇمكىن ەمەس, وعان ناقتى, جۇيەلى قادامدار كەرەك, – دەيدى ايجان ءجۇزباي.
ەىدۇ باس حاتشىسى انحەل گۋرريا پاندەميادان تۋىنداعان ەكونوميكالىق قۇلدىراۋمەن تاعى بىرنەشە جىل كۇرەسۋگە ءماجبۇر بولامىز دەگەن ەدى. كەيبىر دەرەككوزدەرگە سۇيەنسەك, پاندەمياعا بايلانىستى ينتەرنەت ساتىلىمى قىتاي نارىعىندا 15-25%-عا, ەۋروپادا 5-20%-عا, اقش-تا 30-40%-عا تومەندەگەن. قازاقستاندىقتار اراسىندا دا بولشەك ساۋدا كولەمىندە ايتارلىقتاي وزگەرىس بار. Ranking.kz-ءتىڭ حابارلاۋىنشا, تەك ءساۋىردىڭ وزىندە وتكەن جىلدىڭ سايكەس كەزەڭىمەن سالىستىرعاندا ساتۋ كولەمى 495,7 ملرد تەڭگەگە (40,9%) تۇسكەن كورىنەدى.
ءسان يندۋسترياسى باسەڭدەگەن تۇستا شەكتەۋلى كوللەكتسيالار سانى ازايىپ, داعدارىستان وتە الماعان كوپتەگەن جەرگىلىكتى برەندتەر جۇمىسىن توقتاتاتىنى بەلگىلى. ال ءىرى برەندتەر ايماقتارداعى دۇكەندەر سانىن قىسقارتادى دەپ بولجانۋدا. كوروناۆيرۋستىڭ اسەرىنەن ءسان يندۋسترياسى قانداي وزگەرىستەرگە ۇشىراسا دا, جاڭا جاعدايعا بەيىمدەلۋ وڭاي سوقپاي تۇر. ءسان ساراپشىسى دەۆيد راتموكو اتاپ وتكەندەي, وقشاۋلانۋ ەرەجەلەرى تاعى بىرنەشە جىلعا سوزىلار بولسا, ءسان يندۋسترياسى 20 جىل بۇرىنعى كەبىنە قايتا ورالۋى مۇمكىن.
