ادامنىڭ ويلاعانى بولا بەرمەيتىن ءتارىزدى. كىندىك قانى تامعان پودگورنىي اۋىلىنىڭ جانىندا بيىك شوقى بار. شوقى ۇستىنە شىقساڭىز, جاقسىنىڭ جالپاق دالاسى الاقانعا سالعانداي كورىنەدى. اسىرەسە سارىالا كۇزدە كورگەن جاقسى. سان تۇسكە بويانىپ, سارى ساعىم ويناپ تۇرعان كەڭ دالادا جانارىڭدى توقتاتاتىن قاراسىن از. قۇددى بىرەۋ ۇشى-قيىرىنا كوز جەتپەيتىن جالپاق دالانى الدەنەشە ءتۇرلى بوياۋمەن بوياپ تاستاعانداي كورىنەتىن. وسى ءبىر سۋرەت كوكىرەگىندە جاتتالىپ قالىپتى. بالا دا بولسا دالانىڭ كەڭدىگىن تۇيسىنگەن. سارى ساعىمنىڭ ارعى جاعىندا قانداي تىرشىلىك بار ەكەن, كىمدەر تۇرىپ جاتىر ەكەن دەپ ويلايتىن. بىلمەككە قۇمار كوڭىلمەن تەزىرەك ەرجەتسەم, كورۋگە مۇمكىندىك بۇيىرار دەۋشى ەدى.
بۇيىرمادى. جەتىنشى سىنىپتا وقىپ جۇرگەندە كوز الدى كىرەۋكەلەنىپ, جانار وتى سۋالا باستادى. بۇل وڭىردە بالالاردىڭ كوز دارىگەرى دە جوق قوي. اۋدان, وبلىس ورتالىعىنان مەدەت ىزدەگەن. بىراق سىرقاتتىڭ ءتۇپ سەبەبى انىقتالمادى. انىقتالماعان سوڭ ەمدەۋ دە مۇمكىن ەمەس. بالا قيال كوڭىلدە بۇيىعىپ قالا بەردى. كوك اسپاندا قىران قۇستاي زاۋلاماق تۇگىل قارا جەردى نىق باسىپ ءجۇرۋدىڭ ءوزى ارمانعا اينالدى.
ايتسە دە مۇقالعان جوق. تاعدىردىڭ سالعان ىسىنە تاستاي بەرىك بولدى. ورتا مەكتەپتى اياقتاعان سوڭ ماسساج كۋرسىنا تۇسكەن. از ۋاقىتتىڭ ىشىندە ادام دەنەسىندەگى اعزاعا اسەر ەتەتىن نۇكتەلەرىن, وعان اسەر ەتۋ جولدارى سياقتى قىر-سىرىن مەڭگەرىپ الدى. تولايىم زەرتتەگەن ادامعا بۇل ءبىرتۇتاس عىلىم ەكەن. ەندىگى ماماندىق وسى تاراپتا بولعان سوڭ جاتپاي-تۇرماي ىزدەنۋگە تۋرا كەلگەن. ەكىنشى توپتاعى مۇگەدەك الەكساندر فەدورچۋك وسىلايشا اۋدان ورتالىعىنداعى سپورت مەكتەبىنىڭ بىلدەي قىزمەتكەرى بولىپ شىعا كەلدى.
جاقسى اۋدانىندا سپورت ءتاپ-ءتاۋىر دامىپ, كەڭ ءورىس جايىپ تۇر. بۇقارالىق سپورتقا جەرگىلىكتى كاسىپكەرلەر دە كوڭىل بولەدى. جاقسىداعى سپورت مەكتەبى وبلىستاعى ماڭدايالدى ۇجىمنىڭ ءبىرى. اسىرەسە بوكسشىلار مەن بالۋاندار اۋدان اتىن شىعارىپ تۇر. الەم چەمپيونى دينا جولامانوۆانىڭ جالعىز ءوزى نەگە تۇرادى. ديناعا ەلىكتەگەن بوكسشى قىزدار وبلىستىق, رەسپۋبليكالىق جارىستاردا توپ جارىپ ءجۇر. ساشانىڭ مىندەتى – جاتتىقتىرۋشىلارمەن بىرگە سپورتشىلاردى دايىنداۋ. جەڭسە مەنىڭ دە ۇلەسىم بار دەگەندەي شاتتىققا بولەنەدى.
– ادام ەشقاشان ۇنجىرعاسى ءتۇسىپ, مويىماۋى كەرەك دەپ بىلەمىن, – دەيدى ساشا, – ەشكىمگە ماسىل بولماي, العا ۇمتىلساڭ عانا تابىسقا جەتەسىڭ. مەن جاقسىنىڭ سپورتشىلارىنا جاناشىر جان رەتىندە جان-تانىممەن قىزمەت ەتكەندى قالايمىن. ولاردىڭ جالاۋى جەلبىرەسە, باپتاۋعا اتسالىسقان مەنىڭ دە مەرەيىم ءوسىپ قالادى. بۇل جەر جاستاردىڭ قاجىر-قايراتى, كۇش-قۋاتى اتويلاپ تۇرعان ورىن. سوندىقتان سپورت مەكتەبىنىڭ قابىرعاسىنىڭ وزىنەن-اق كوكىرەگىمە قاجىر-قايرات قۇيىلعانداي سەزىنەمىن.
وردا بۇزار وتىزداعى ازامات باسىنا تۇسكەن بەسباتپان جۇكپەن جاعالاسىپ-اق كەلەدى. جەڭىلمەك ەمەس. قازىر اق-ادال جۇمىسى ارقىلى اي سايىن ءتاپ-ءتاۋىر ەڭبەكاقى الىپ وتىر. ءوزىنىڭ ايتۋىنا قاراعاندا, جانارىنان جاسقانىپ, جەر تايانىپ قالسا, ازاماتتىعىنا سىن.
ءبىر كەزدە ءوزى كورگىسى كەلگەن, سىرىن ۇققىسى كەلگەن سايىن دالانىڭ سايىپقىران ۇلدارىمەن بىرگە ەڭبەك ەتىپ جاتقانىن تاعدىرىنىڭ تاماشا سىيى دەپ بىلەدى. جاراتقاننان ودان ارتىق نە تىلەسىن؟!
اقمولا وبلىسى,
جاقسى اۋدانى
