"بۇگىن 6 قىركۇيەكتە ساعات 17.21-دە اتىراۋ وبلىسىندا قامىس پەن قۇرعاق ءشوپتىڭ جانۋى جويىلدى.
ەستەرىڭىزگە سالا كەتەيىك, اتىراۋ وبلىسىندا اتىراۋ قالاسىنان 30 شاقىرىم قاشىقتىقتا كاسپي تەڭىزىنىڭ جاعالاۋىندا قامىس جانىپ جاتقان بولاتىن. جانۋ ورنى باتپاقتى, وسىمدىكتەردىڭ بيىك بولۋى ءورتتى ءسوندىرۋدى قيىنداتقان ەدى, وسىعان بايلانىستى ارنايى تەحنيكانىڭ ءوتۋ مۇمكىندىگى بولمادى.
شىمكەنت قالاسىنان بارعان "قازاۆياقۇتقارۋ" اق-نىڭ مي-17 تىكۇشاعى جانۋ وشاعىنا 3 توننادان 10 رەت سۋ شاشتى.
سونىمەن قاتار جاعدايعا مونيتورينگ جۇرگىزۋ ماقساتىندا "قازاۆياقۇتقارۋ" اق "ەۆروكوپتەر145" تىكۇشاعىمەن جانۋ اۋماعىن بويلاي ۇشۋ جۇرگىزىلدى.
ءورتتى سوندىرۋگە اتىراۋ وبلىسى تجد, "قازاۆياقۇتقارۋ" اق, ورمان شارۋاشىلىعىنان, جەرگىلىكتى اتقارۋشى ورگانداردان 93 ادام, 23 تەحنيكا جانە 2 تىكۇشاق جۇمىلدىرىلدى", دەلىنگەن حابارلامادا.
