سايتتاعى مالىمەتتەرگە قاراعاندا, 27 كوشەدە ( ۇلى دالا) تۇران داڭعىلىنان ش.بەيسەكوۆا كوشەسىنە دەيىنگى ۋچاسكەدە ماگيسترالدى جاڭبىر سۋىنا ارنالعان كارىز كوللەكتورىن ورناتۋ جۇمىستارى جۇرگىزىلەدى. جۇمىستار كارىز جۇيەسىنىڭ دۇرىس جۇمىسىن قامتاماسىز ەتۋ, نەگىزگى كوشەلەردى سۋ باسۋدىڭ الدىن الۋ ماقساتىندا جۇرگىزىلەدى. وسىعان بايلانىستى 10 قىركۇيەكتەن 10 قازانعا دەيىن تۇران جانە ۇلى دالا داڭعىلدارىنىڭ قيىلىسىندا كولىك قوزعالىسىن تولىعىمەن جابۋ جوسپارلانىپ وتىر.
"ەلوردا تۇرعىندارى مەن قوناقتارى قالا جولدارىندا كەپتەلىس تۋدىرماس ءۇشىن وزدەرىنىڭ جۇرەتىن باعىتتارىن الدىن الا جوسپارلاۋى قاجەت. كەلتىرىلگەن قولايسىزدىقتار ءۇشىن كەشىرىم سۇرايمىز جانە جوندەۋ جۇمىستارى جۇرگىزىلۋىنە تۇسىنىستىكپەن قاراۋدى سۇرايمىز", – دەپ اتاپ ءوتتى كولىك جانە جول-كولىك ينفراقۇرىلىمىن دامىتۋ باسقارماسىنىڭ وكىلدەرى.
