تۇمشانىڭ ەرەكشەلىگى, ونى تاققان ادام اۋرۋ جۇقتىرامىن دەپ قورىقپاستان تاماعىن دا ىشە بەرەدى. ديزاينەرلەردىڭ تاپقىرلىعى – تۇمشانى جەلپۋىش ءتارىزدى جاساۋىندا. قاتتى قاعازدان جاسالعان تۇتقاعا بەكىتىلگەن, ءتورت بۇرىشتى ەتىپ كەرىلگەن قورعانىش قاباتى بار تۇمشامەن اۋىز بەن مۇرىندى قالقالاپ, تاماق ىشۋگە دە, اڭگىمەلەسۋگە دە بولادى, بۇل ادامداردىڭ قالىپتى تىرلىككە كوشۋىنە كومەگىن تيگىزەدى, دەپ ەسەپتەيدى ونى ويلاپ تابۋشىلار.
جوبا اۆتورى ماساكو ساساكي ء«بىز SARS-CoV-2 تۋدىرعان قولايسىزدىقتى ازايتىپ, جاڭا بازالىق ەتيكەتتى كيوتودان باستاپ ورناتقىمىز كەلەدى», دەگەن وي ايتتى. الايدا بۇل تۇمشا ادامنىڭ قول قيمىلىن شەكتەپ, ىڭعايسىزدىق تۋدىرادى دەگەن پىكىرلەر دە بار كورىنەدى.
جاڭا تۇمشانى 20 ادام تەستىلەۋدەن وتكىزگەندە قولدانۋشىلار وزدەرىن اۋرۋدان قورعانۋ تۇرعىسىنان جاقسى سەزىنگەنىن ايتىپتى.
* * *
فرانتسيانىڭ تەڭىزدەگى يەلىگى – جاڭا كالەدونيانىڭ بيلىگى ارحيپەلاگتا شەكاراداعى قوسىمشا شەكتەۋ شارالارىن 2021 جىلدىڭ 27 ناۋرىزىنا دەيىن سوزۋ جايىندا شەشىم قابىلداعانى جايلى Le Figaro جازدى.
جاڭا كالەدونيا تىنىق مۇحيتتاعى ۆيرۋستان زارداپ شەكپەي تىنىش جاتقان ايماقتىڭ قاتارىنان. ارحيپەلاگتاعى 270 مىڭ تۇرعىننىڭ اراسىنان بۇگىنگە دەيىن بار-جوعى 23 ادامنان SARS-CoV-2 تىركەلگەن. وعان پاندەميا جاريالانعالى ارالدارعا حالىقارالىق اۋە قاتىناستارىنىڭ ازايۋى جانە كەلگەن جانداردىڭ وتەلدەرگە توقتاپ, ەكى اپتالىق وقشاۋلانۋدى ساقتاۋى سەبەپ بولعان. ارحيپەلاگقا كەلگەن ءار ادامعا تەست قورتىندىسىن كورسەتۋ مىندەتتەلىپ, كەتەرىندە تاعى دا تەكسەرىلۋدەن ءوتۋى مىندەتتەلگەن. بۇل قاعيداتتىڭ قاتاڭ ساقتالۋى جاڭا كالەدونيا حالقىن اۋرۋدان ساقتاۋعا كومەكتەستى دەگەن جەرگىلىكتى بيلىك وسى ءتارتىپتى كەلەر جىلدىڭ ناۋرىزىنا دەيىن ۇزارتقان.
* * *
ەو وداققا مۇشە مەملەكەتتەر ازاماتتارىنىڭ توقتاۋسىز بارىپ-كەلۋىنە بولاتىن ەلدەردىڭ جاڭا ءتىزىمىن جاسادى دەپ حابارلايدى بوسنيالىق Dnevni avaz اگەنتتىگى.
جاڭا تىزىمگە بالقان تۇبەگىنىڭ باتىسىن جايلاعان بىرقاتار مەملەكەتتەر كىرمەي قالعان كورىنەدى. اتالعان تىزىمنەن بوسنيا مەن گەرتسەگوۆينانى تاپپاعان باتىس ءباسپاسوزى ءتىزىم ەو دەڭگەيىندە مىندەتتى تۇردە ورىندالۋى قاجەت دەگەن قۇجات ساناتىنا سانالماعانىمەن, مۇشە-مەملەكەتتەر ونىڭ اياسىنان شىقپايدى دەپ ەسەپتەيدى. الايدا قۇجاتتا كەيبىر ەلدەر قاي ەلدىڭ ازاماتىن ۆيرۋسقا قارسى تەست كورسەتىلىمىنە قاراي كىرگىزۋگە ۇيعارىم شىعارۋىنا ەرىكتى ەكەنى اتاپ وتىلگەن.
ەو رۇقسات بەرىپ, داڭعىل جول اشقان مەملەكەتتەر قاتارىنا اۋستراليا, كانادا, گرۋزيا, جاپونيا, ماروككو, جاڭا زەلانديا, رۋاندا, وڭتۇستىك كورەيا, تايلاند, تۋنيس, ۋرۋگۆاي جانە قىتاي ەنگەن. اقپاراتتا بەيجىڭنىڭ دە ەو ەلدەرى ازاماتتارى ءۇشىن شەكاراسىن اشۋعا ۋادە بەرگەنى جازىلعان ەكەن.
* * *
ارگەنتينادا تاۋلىك ىشىندە 10 504 ادامنىڭ اۋرۋ جۇقتىرعانى تىركەلگەن.
ەلدىڭ دەنساۋلىق ساقتاۋ مينيسترلىگىنىڭ سايتىندا جاريالانعان اقپاراتقا سۇيەنگەن REGNUM 428 239 ادامنىڭ SARS-CoV-2 تىرناعىنا ىلىنگەنىن جازادى. كەشەگى كۇنى 259 پاتسيەنت وسى اۋرۋ سالدارىنان كوز جۇمىپ, ىندەت باستالعالى 8919 ارگەنتينالىقتىڭ تىنىسى توقتاعان كورىنەدى.
لاتىن امەريكاسىنداعى كوپتەگەن ەلدەر ۆيرۋستان كوز اشا الار ەمەس. الەم بويىنشا برازيليا ەكىنشى ورىنعا شىعىپ, وسى قۇرلىقتى مەكەندەگەن مەملەكەتتەر قاتارى ەكونوميكالىق قيىندىقتارعا تاپ بولىپ جاتىر.
* * *
پاندەميا باستالعالى 20 مىڭنان استام ازاماتىنان ايىرىلعان كولۋمبيا ۇكىمەتى كارانتين تالاپتارىن بوساتقان.
دەنساۋلىق ساقتاۋ مينيسترلىگى ءباسپاسوز قىزمەتىنىڭ حابارلاۋىنا قاراعاندا, ەلدە 20 052 ادام ىندەتتەن اجال قۇشىپ, 624 069 ازاماتتىڭ اۋرۋ جۇقتىرعانى تىركەلگەن. ال ءدال وسى ۋاقىتتا, 133 155 پاتسيەنت اۋرۋمەن ارپالىسىپ جاتقاندا بيلىك بىرقاتار ايماقتاردا كارانتين تالاپتارىن بوساڭداتۋدى, ءتىپتى الىپ تاستاۋدى كوزدەگەن. شەكتەۋ تەك اۋرۋ بەلسەندىلىگى جوعارى وڭىرلەردە عانا ساقتالادى, ال قالعان ايماقتار ساقتىق شارالارىن ۇستانا وتىرىپ قالىپتى تىرشىلىككە كوشەدى دەلىنگەن.
