قورعانىس ءمينيسترىنىڭ ءبىرىنشى ورىنباسارى – قر قك باس شتابى باستىعى گەنەرال-لەيتەنانت مۇرات بەكتانوۆتىڭ باسشىلىعىمەن جۇمىس توبى "ارميا-2020" حالىقارالىق اسكەري – تەحنيكالىق فورۋمىنا قاتىستى. بيىل فورۋمنىڭ باستالۋى ارميا حالىقارالىق ويىندارىنىڭ اشىلۋىمەن تۇسپا-تۇس كەلدى. فورۋمعا ستاتيكالىق كورمە ەكسپوزيتسيالارى, دەمونستراتسيالىق جانە عىلىمي-ىسكەرلىك باعدارلامالار كىردى.
قازاقستاندىق دەلەگاتسيا قارۋ-جاراق پەن اسكەري تەحنيكانى دامىتۋدىڭ نەگىزگى باعىتتارىمەن تانىستى. قورعانىس-ونەركاسىپ كەشەنىنىڭ ءىرى ءوندىرۋشى وكىلدەرىمەن كەزدەسۋلەر وتكىزدى. سونىمەن قاتار, قازاقستان تاراپىنا قارۋ-جاراق پەن اسكەري تەحنيكانىڭ جەكەلەگەن ۇلگىلەرى كورسەتىلدى.
اتاپ ايتقاندا, دەمونستراتسيا ۇشقىشسىز ۇشۋ اپپاراتتارىن قولدانۋ سالاسىنا قاتىستى بولدى. اۋە بارلاۋ كەشەندەرى مەن ۇشقىشسىز اپپاراتتاردى تابۋ, انىقتاۋ مەن الىپ ءجۇرۋدىڭ جەكە جۇيەلەرىن, ۇشقىشسىز ۇشۋ اپپاراتىنان قولدان جاسالعان جارىلعىش قۇرىلعىلاردى قاشىقتىقتان انىقتاۋ كەشەنىن, برونعا قارسى بۇيىمداردى ۇسىنعان. سونىمەن قاتار, ينجەنەرلىك تۇرعىدان العاندا, قاشىقتىقتان تازارتۋ ماشيناسى ۇلكەن قىزىعۋشىلىق تۋدىرۋدا. ول زىمىران كەشەنىنىڭ قۇرامىنا كىرىپ ونىڭ جاۋىنگەرلىك پاترۋلدەۋ باعىتىندا قاۋىپسىزدىگىن قامتاماسىز ەتەدى. بۇل تىزىمگە سونداي-اق ورتا اۋە شابۋىلىنا قارسى قورعانىستىڭ سوڭعى جۇيەلەرى دە كىردى. فورۋمعا قاتىسۋشىلار ءبىزدىڭ دەلەگاتسياعا مەملەكەتتىك باسقارۋ ورگاندارى ءۇشىن باعدارلامالىق-اپپاراتتىق كەشەندەردى, اقپاراتتىق قاۋىپسىزدىك جانە بايلانىس جۇيەلەرىن ازىرلەۋ, ءوندىرۋ, ەنگىزۋ سالاسىنداعى كاسىپورىندار مۇمكىندىكتەرىن تانىستىردى.
