ب. ساعىنتاەۆ جاڭا جاعدايدا ەكونوميكالىق دامۋ ماسەلەسىندە قالاعا قاراپايىم «ساۋدا» ەكونوميكاسىنان زياتكەرلىككە كوشۋ قاجەت ەكەنىن اتاپ ءوتتى. بۇرىندارى, «الماتى-2050» ستراتەگياسىندا «قۇرىلىمدىق مانەۆر» ۇسىنىلعان بولاتىن, ونىڭ ماقساتى ەكونوميكانىڭ جوعارى قوسىمشا قۇنى بار سەكتورلارىن دامىتۋ بولاتىن. ولار – قارجى, اكت, كرەاتيۆتى يندۋستريا, تۋريزم, لوگيستيكا جانە ديستريبۋتسيا.
پاندەميا باستالعالى بەرى كاسىپكەرلەردى قولداۋ كۇشەيتىلدى. پرەزيدەنتتىڭ تاپسىرماسىنا سايكەس قولداۋ شارالارىنىڭ تەتىكتەرى كەڭەيتىلەدى.
قالا تۇرعىندارىنىڭ الەۋمەتتىك ماسەلەلەرىن شەشۋگە ەرەكشە نازار اۋدارىلادى. تۇرعىن ءۇي قۇرىلىسى سالاسىندا تاياۋداعى 5 جىل ىشىندە (2021-2025) 16,5 مىڭ مۇقتاج وتباسىلاردى پاتەرمەن قامتاماسىز ەتۋ جوسپارلانعان. مىسالى, وسى كەزەڭ ارالىعىندا 363,2 مىڭ شارشى مەتر جالدامالى تۇرعىن ءۇي نەمەسە ينجەنەرلىك-كوممۋنيكاتسيالىق ينفراقۇرىلىمى بار 6487 پاتەر سالۋ جوسپارلانعان. «باقىتتى وتباسى» باعدارلاماسى اياسىندا 5 مىڭعا جۋىق پاتەر پايدالانۋعا بەرىلەدى.
پرەزيدەنت جاريالاعان «اڭساعان ءسابي» باعدارلاماسى اياسىندا قوعامدىق دەنساۋلىق ساقتاۋ دەپارتامەنتى ەكۇ-عا كۆوتالار كەزەگىنە اۋديت جۇرگىزەدى. قاجەت بولعان جاعدايدا بۇل ءتىزىم قايتا جاسالىپ, ءسابيلى بولۋعا ءزارۋ وتباسىلارعا ناقتىلى كومەك كورسەتىلەدى.
قالادا 5 جىل ىشىندە بالالاردى مەكتەپكە دەيىنگى تاربيەمەن تولىق قامتۋ ءۇشىن 19 980 ورىندى 419 مەكتەپكە دەيىنگى بالالار مەكەمەلەرىن سالۋ جوسپارلانعان, ونىڭ 413-ءى مەملەكەتتىك, 400-ءى جەكە مەنشىك. سونداي-اق, 6 بالاباقشا سەيسميكالىق جاعىنان كۇشەيتىلىپ, كۇردەلى جوندەۋدەن وتەتىن بولادى.
تاياۋداعى 5 جىل ىشىندە بۇقارالىق سپورتتى دامىتۋ ءۇشىن الماتىلىقتاردى سپورتتىق ينفراقۇرىلىممەن قامتاماسىز ەتۋدى 75,4 پايىزعا دەيىن جەتكىزۋ جوسپارلانعان, بۇل شارا 600 مىڭنان استام قالا تۇرعىنىن قامتيتىن بولادى, ال سپورتپەن جۇيەلى تۇردە اينالىساتىن تۇرعىندار سانىن 33 پايىزعا دەيىن جەتكىزۋ قاراستىرىلعان.
قورشاعان ورتانى قورعاۋ جانە ەكولوگيالىق دامۋ ماقساتىندا Jasyl Almaty اياسىندا جاسىلداندىرۋ جۇمىستارى كۇشەيتىلەدى. سونىمەن قاتار, جەكە سەكتوردى تابيعي گازعا, قالا قازاندىقتارىن شاعىن جانە ورتا قۋاتتىلىققا كوشىرۋ جۇمىستارى جالعاسادى. وسكەلەڭ ۇرپاققا ەكولوگيالىق تاربيە بەرۋگە ايرىقشا نازار اۋدارىلادى.
