ءبىلىم • 02 قىركۇيەك، 2020

اسحات ايماعامبەتوۆ مۇعالىمدەردىڭ قوسىمشا ەڭبەك اقىسى تۋرالى ايتىپ بەردى

7160 رەت كورسەتىلدى

ءبىلىم جانە عىلىم ءمينيسترى اسحات ايماعامبەتوۆ مەملەكەت باسشىسىنىڭ جولداۋىنا قاتىستى Facebook جەلىسىندە پىكىر ءبىلدىرىپ، وتاندىق ءبىلىم جانە عىلىم ماسەلەلەرىنە ەرەكشە نازار اۋدارىلاتىنىن ايتتى، دەپ حابارلايدى Egemen.kz.

"پرەزيدەنتتىڭ تاپسىرماسىمەن ۇزدىكسىز ءبىلىم بەرۋ تۇجىرىمداماسىن ازىرلەپ، قاشىقتان وقىتۋ پلاتفورماسى جانە 6 جاسقا دەيىنگى بۇلدىرشىندەردى بالاباقشامەن 100% قامتاماسىز ەتۋ بويىنشا جۇمىس جۇرگىزەمىز.

بۇل رەتتە، الداعى ۋاقىتتا مەملەكەتتىك تاپسىرىستى بالاباقشالارعا قازىرگى قولدانىستاعى جۇيەدەگىدەي ءبىلىم بولىمدەرى نەمەسە باسقارمالارى بولمەيدى"، - دەپ جازدى ول.

مەكتەپكە دەيىنگى ءبىلىم بەرۋ ۇيىمىنا جولداما العان بالالاردىڭ اتا-انالارى كەز كەلگەن بالاباقشانى تاڭدايتىن بولادى. ءمينيستردىڭ ايتۋىنشا، مۇنداي باسەكەلەستىكتىڭ ارقاسىندا كورسەتىلەتىن قىزمەتتەردىڭ ساپاسى دا ارتۋى ءتيىس.

"وسى جىلدىڭ قىركۇيەك ايىنان باستاپ پرەزيدەنتتىڭ تاپسىرماسىمەن پەداگوگتەردىڭ سىنىپ جەتەكشىلىگى جانە داپتەرلەردى تەكسەرگەنى ءۇشىن قوسىمشا اقىسى ەكى ەسە وسەدى، سونداي-اق ماگيسترلىك دارەجەسى ءۇشىن مۇعالىمدەر 27 مىڭ تەڭگە مولشەرىندە اي سايىنعى قوسىمشا اقى الادى.

سونىمەن قاتار، 2021 جىلدىڭ 1 قاڭتارىنان باستاپ مەكتەپ، كوللەدج، قوسىمشا ءبىلىم بەرۋ جانە بالاباقشا پەداگوگتەرىنىڭ لاۋازىمدىق جالاقىسى تاعى دا 25%-عا ارتادى"، - دەدى مينيستر.

پرەزيدەنت جولداۋىندا عىلىم سالاسىن دامىتۋ ماسەلەلەرىنە توقتالدى. ءبىلىم ءمينيسترى وسى رەتتە بىرقاتار جۇمىس اتقارىلاتىنىن جەتكىزدى. جاس عالىمداردىڭ عىلىم سالاسىنا كەلۋىن قامتاماسىز ەتۋ ءۇشىن "جاس عالىم" جوباسى بويىنشا 1000 زەرتتەۋ گرانتى بولىنبەك.

"جەر قويناۋىن پايدالانۋشىلار جۇمساعان شىعىندارىنىڭ 1%-ىن عىلىم مەن تەحنولوگيالاردى دامىتۋعا باعىتتاۋ تۋرالى نورمانىڭ ىسكە اسۋىنا قاتىستى ماسەلەنى عالىمدار ۇزاق ۋاقىت بويى ايتىپ كەلەدى. ەندى وسى ماسەلە دە شەشىمىن تاباتىن بولدى.

بۇل ماسەلە بويىنشا سالا وكىلدەرىنىڭ ۇسىنىستارى پرەزيدەنتتىڭ تاپسىرماسىندا كورسەتىلگەن. ەندى بۇل قاراجات جالپىۇلتتىق عىلىمي باسىمدىقتاردى نەگىزگە الا وتىرىپ، بيۋدجەت ارقىلى اشىق تۇردە بولىنەدى. بۇل عىلىمي زەرتتەۋلەر جۇرگىزۋگە قوسىمشا باعىتتالاتىن قوماقتى قاراجاتقا قاتىستى ەكەنىن اتاپ وتكەن ءجون"، - دەپ جازدى ءبىلىم ءمينيسترى.

ءمينيستردىڭ ويىنشا، جىل سايىن 500 عالىمنىڭ جەتەكشى عىلىمي ورتالىقتاردا عىلىمي تاعىلىمدامادان ءوتۋ باستاماسى ولارعا شەتەلدىك عالىمدارمەن ىنتىماقتاستىق ارقىلى بىرلەسكەن زەرتتەۋلەر جۇرگىزۋگە جانە ءوز كەزەگىندە ولاردىڭ تيىمدىلىگىن ارتتىرۋعا مۇمكىندىك بەرەدى.

"جولداۋدا عالىمداردىڭ وسى ۋاقىتقا دەيىن ۇسىنىپ كەلگەن تاعى ءبىر ماسەلەسى ايتىلدى. ەلىمىزدىڭ عىلىمي-تەحنولوگيالىق دامۋى بويىنشا جەكە باعدارلامالىق قۇجات ازىرلەنەدى. ونىڭ نەگىزگى ەرەجەلەرىن قالىپتاستىرۋ كەزىندە سالا وكىلدەرىمەن كەڭەيتىلگەن كەڭەستەر وتكىزەمىز جانە وندا حالىقارالىق تاجىريبە ەسكەرىلەدى"، - دەپ جازدى ول.

سوڭعى جاڭالىقتار

ۇقساس جاڭالىقتار