جولداۋدا, ەڭ الدىمەن, مەملەكەتتىك باسقارۋ سالاسىن رەفورمالاۋ ماسەلەسىنە كوڭىل ءبولىنۋى تەگىن ەمەس. سەبەبى قولعا العان جاڭعىرتۋلاردى مەملەكەتتىك اپپاراتتاعى وزگەرىستەرسىز جۇزەگە اسىرۋ مۇمكىن ەمەس ەكەنى بەلگىلى. بۇل, اسىرەسە, پاندەميا كەزەڭىندە انىق بايقالدى. مەملەكەتتىك اپپارات نەگىزسىز ماقساتتاردى كوزدەمەي, ازاماتتاردى الاڭداتقان ناقتى ءارى وزەكتى ماسەلەلەردى شەشۋگە جۇمىلۋ كەرەك. ءوز كەزەگىندە قازاقستاندىقتار قابىلدانعان شەشىمدەردىڭ ءمانى مەن ماڭىزىن تەرەڭ ءتۇسىنۋى قاجەت. قازىرگى تاڭدا قوعام تۇسىنىكتى جانە ءتيىمدى مەملەكەتتىك باستامالار مەن باعدارلامالاردى تالاپ ەتۋدە. سوندىقتان ۇتىمدى ۇلتتىق جوبالار فورماتىنا كوشۋ دەر كەزىندە قولعا الىنىپ وتىر.
پرەزيدەنت جولداۋىندا جاڭا جاعدايداعى ەكونوميكالىق دامۋ ماسەلەسىنە باسا ءمان بەرىلگەن. باسەكەلەستىكتىڭ, شاعىن جانە ورتا بيزنەستىڭ وركەندەۋى تابيعي رەسۋرستارعا تاۋەلدىلىكتى تومەندەتۋ ارقىلى ەكونوميكانى كۇشەيتۋ, ازاماتتاردىڭ باستامالارىن دامىتۋ, حالىقتىڭ ءومىر ءسۇرۋ ساپاسىن ارتتىرۋعا جاعداي جاساۋ سياقتى ءۇش بىردەي ماڭىزدى مىندەتتى ورىنداۋعا مۇمكىندىك بەرەدى.
مەملەكەت باسشىسى وڭىرلەردى دامىتۋ ماسەلەسىنە دە ەرەكشە توقتالدى. پارلامەنت دەپۋتاتتارىنىڭ وبلىستارعا ساپارى كەزىندە وزەكتى پروبلەمالاردى شەشۋ جولدارى پىسىقتالىپ, ازاماتتاردىڭ ۇسىنىستارى تىڭدالعان بولاتىن. جولداۋداعى وڭىرلەردى دامىتۋعا ارنالعان باسىمدىقتاردى ىسكە اسىرۋ جانە ولاردى ساپالى زاڭدارمەن قامتاماسىز ەتۋ ءبىزدىڭ پالاتامىزدىڭ جۇمىسىنداعى نەگىزگى باسىمدىقتاردىڭ ءبىرى بولىپ سانالادى. سەبەبى سەناتورلار وڭىرلەردىڭ وكىلى رەتىندە زاڭ شىعارۋ ورگانىندا ايماقتاردىڭ مۇددەسىن قورعايدى.
قۇقىق قورعاۋ جانە سوت جۇيەسىندەگى رەفورمالار دا ودان ءارى جالعاسادى. پرەزيدەنتىمىزدىڭ جاڭعىرۋ باعدارىندا ادام قۇقىعى زور ماڭىزعا يە. ونى وسى سالاداعى بارلىق ولقىلىقتاردى وزگەرتۋگە جانە جويۋعا ارنالعان تىڭ باستامالاردان انىق بايقايمىز.
مەملەكەت باسشىسىنىڭ الەۋمەتتىك باعىتتاعى, ونىڭ ىشىندە ءبىلىم بەرۋ جانە دەنساۋلىق ساقتاۋ سالالارىن دامىتۋعا ارنالعان باستامالارىن دا زاڭنامالىق تۇرعىدان قامتاماسىز ەتۋ كەرەك. وتكەن ايلاردا بۇل باعىتتار بويىنشا جۇمىس ءتاسىلىن قايتا جانداندىرۋ قاجەت ەكەنىنە كەزەكتى رەت كوز جەتكىزدىك. بۇل رەتتە كەيبىر ماسەلەلەردى ءبىلىم مەن مەديتسينانىڭ تيىمدىلىگىن ارتتىراتىن ۇتىمدى تسيفرلاندىرۋ جانە مەملەكەتتىك قىزمەت تۇرلەرىن الۋدى بارىنشا جەڭىلدەتۋ ارقىلى شەشۋگە بولادى. سونداي-اق جولداۋدا سوڭعى كەزدەرى قوعامدا قىزۋ تالقىلانىپ جۇرگەن ەكولوگيالىق ءبىلىم جانە جانۋارلاردى قورعاۋ ماسەلەسى دە نازاردان تىس قالماعان.
سونىمەن قاتار پرەزيدەنتىمىزدىڭ بىرقاتار ستراتەگيالىق ماسەلەلەردى قوعامنىڭ تالقىلاۋىنا شىعارۋى وتە ماڭىزدى. ونىڭ ىشىندە اكىمدەردى سايلاۋ, پەتيتسيا قۇرۋ, جەرگىلىكتى ءوزىن-ءوزى باسقارۋدى رەفورمالاۋ جانە شەشىم قابىلداۋ ۇدەرىسىنە ازاماتتاردىڭ كوپتەپ قاتىسۋىن قامتاماسىز ەتۋ ماسەلەلەرى بار. مۇنىڭ ءبارى «حالىق ۇنىنە قۇلاق اساتىن مەملەكەت» تۇجىرىمداماسىنىڭ ءارى قاراي جۇزەگە اسىرىلا بەرەتىنىن بىلدىرەدى.
وسىنداي ناقتى باستامالاردى ەسكەرىپ, پرەزيدەنت جولداۋى جان-جاقتى پىسىقتالعان, قازاقستاننىڭ داعدارىستان كەيىنگى دامۋ باعىتىن جانە ۇلتتىق باسىمدىقتاردى انىقتاپ بەرگەن قۇجات دەپ ايتۋعا تولىق نەگىز بار. جولداۋدا ەكونوميكانى قالپىنا كەلتىرۋگە جانە ازاماتتاردىڭ تۇرمىس ساپاسىن ارتتىرۋعا ارنالعان ناقتى شارالار قاراستىرىلعان. الداعى ۋاقىتتا مەملەكەت باسشىسىنىڭ بارلىق باستاماسىن ىسكە اسىرۋ ءۇشىن ءتيىستى زاڭدار قابىلدانادى. بۇل جاڭا سەسسيادا دەپۋتاتتار جۇمىسىنىڭ نەگىزگى باسىمدىعى بولىپ سانالادى.
