ەڭ الدىمەن بولە اتارىمىز – پرەزيدەنت اڭگىمەنىڭ القيسساسىندا-اق جاھاندا جاڭا جاعداي قالىپتاسقانىن, قازىرگى كەزەڭنىڭ كۇردەلىلىگىن, ادامزاتتىڭ مىلتىقسىز مايدانداعى كۇرەسى ءالى جالعاسىپ جاتقانىن, سىن ساعاتتا جۇدىرىقتاي جۇمىلساق قانا كوزگە كورىنبەيتىن جاۋدى جەڭەتىنىمىزدى, ۇكىمەتتىڭ و باستاعى قاتەلىكتەردەن ساباق الا بىلگەنىن, احۋال جاقسارىپ قالدى ەكەن دەپ بويدى بوساڭسىتۋعا بولمايتىنىن سىعىمداپ ايتىپ ءوتتى دە, قازاقستاننىڭ پاندەمياعا بايلانىستى قاندايلىق عالامات قارجى بولۋگە شاماسى كەلگەنىن ناقتى دەرەكتەرمەن دايەكتەپ, از ءسوزدىڭ استارىندا-اق مۇنىڭ ءوزى مەملەكەت مىعىمدىعىنىڭ ايقىن ايعاعى ەكەنىن اڭعارتىپ كەتتى. سوندىقتان دا ءبىز توقاەۆتىڭ بارلىق رەسپۋبليكالىق دەڭگەيدەگى جولداردى 2025 جىلعا دەيىن قايتا جوندەپ شىعۋدى, ۇزىندىعى 24 مىڭ شاقىرىمدىق جولداردى سەرۆيسپەن قامتاماسىز ەتىپ ءبىتۋدى تاپسىرعانىنا تاڭدانعان جوقپىز. بىلايشا قاراعاندا, تاڭدانساق تاڭداناتىنداي. جولدار بار ما – بار, كولىكتەر ءجۇرىپ جاتىر ما – ءجۇرىپ جاتىر, جۇك تاسىلىپ جاتىر ما – تاسىلىپ جاتىر, بۇعان دەيىن قانشا جىل جوندەلمەگەن جولدار تاعى ءبىراز جىل جوندەۋسىز تۇرا تۇراتىنىن جاقسى بىلەمىز. مەملەكەت ەكونوميكانىڭ كۇرەتامىرىنا بەس جىل بويى تريلليونداعان تەڭگەلەر تابا الادى ەكەن, دەمەك, قارا اسپاندى سۋعا الدىرا سويلەيتىن ەش ءجونىمىز جوق. ءبىر ءوزىنىڭ ىشكى جالپى ءونىمىنىڭ كولەمى ورتالىق ازياداعى ءتورت كورشىنىڭ ىشكى جالپى ءونىمىنىڭ كولەمىن قوسقانداعىدان اسىپ تۇسەتىن قازاقستانىمىزدىڭ الەۋەتى ءالى دە كۇشتى. ەل ىرگەسى بەرىك. پرەزيدەنت قاسىم-جومارت توقاەۆتىڭ قازىرگىدەي داعدارىستى داۋىردە دە سەنىمدىلىك ستراتەگياسىنداي ساليقالى جولداۋ جاساۋى جاسامپازدىق جولىنىڭ جالعاسا بەرەتىنىنە كامىل سەندىرەدى.
ەل باسشىسىنىڭ مەملەكەتتىك باسقارۋدىڭ جاڭا مودەلىن جاساۋ, رەفورمالار بويىنشا پرەزيدەنت كەڭەسىن قۇرۋ, مەملەكەتتىك اپپاراتتى 25 پايىزعا ىقشامداۋ جونىندەگى ءبىراز جۇرت جىلدارعا سوزىلادى دەپ شامالاپ جۇرگەن, تالايلار اياقسىپ كەتەر دەپ ۇمىتتەنىپ جۇرگەن جۇمىستى شەنەۋنىكتەر سانىن بيىل 10 پايىزعا, كەلەسى جىلى 15 پايىزعا قىسقارتۋ ارقىلى باس-اياعى ەكى جىلدا ءبىتىرىپ تاستاۋ تۋرالى ايتقاندارى ابدەن كوكەيگە قونادى. سولاي ەتۋگە بولاتىنىن پاندەميا كەزىندەگى ونلاين وتىرىستاردىڭ ءوزى-اق كورسەتىپ بەردى. قالىپتاسقان جاڭا جاعدايدا ەكونوميكالىق دامۋدى قامتاماسىز ەتۋ ءۇشىن كىرىستى ءادىل ءبولۋ, جەكە كاسىپكەرلىكتى قولداۋ, ادال باسەكەلەستىكتى كۇشەيتۋ, ەڭبەك ونىمدىلىگىن ارتتىرۋ, ادام كاپيتالىن كۇشەيتۋ, جاسىل ەكونوميكانى جولعا قويۋ, نەگىزدەلگەن شەشىمدەردى عانا قابىلداۋ سياقتى باعىتتاردى بەلگىلەۋ دە ورىندى. اقشا-كرەديت ساياساتىنا سەنىمدىلىكتى كوتەرۋ, جالپاق جۇرتقا تۇسىنىكتى بولاتىنداي سالىق ساياساتىن جۇرگىزۋ جونىندە دە جاقسى ايتىلدى. وزىمىزگە ەرەكشە اسەر ەتكەن جاي – ءاربىر التىنشى جاس وتباسىنىڭ سان ءتۇرلى سەبەپتەرگە بايلانىستى بالالى بولا الماي جۇرگەنىنە اسا الاڭداۋ! بۇل – ناعىز مەملەكەتتىك ماسەلە. قيىندىقتار شىعادى, جويىلادى, داعدارىستار كەلەدى, كەتەدى. سولارمەن جاعالاسىپ جۇرگەندە ادامعا ءبىر-اق رەت سىيلاناتىن ءومىر وتە بەرەدى, وتە بەرەدى... ومىردەگى قىزىقتاردىڭ قىزىعىن – پەرزەنت قىزىعىن وتانداستارىمىزدىڭ بارىنشا كوبىرەك كورۋى ءۇشىن بارىنشا بەلسەندى الەۋمەتتىك ساياسات جۇرگىزۋدى ءبىزدىڭ ارقايسىمىز قۋانا-قۋانا قولدايتىنىمىز انىق. «دەموكراتيا بىزدە قيلى-قيلى قيىندىقتار تۋعىزباي قويماۋى دا مۇمكىن, ولاردى شەشۋگە دە بىزگە دەموگرافيا كومەككە كەلۋى عاجاپ ەمەس» دەگەندى كەزىندە جەتىسكەننەن جازباعانىمىز تاعى انىق. اينالامىزداعى اعايىندارعا, شەشىلمەگەن ماسەلەسى بىزدەن ارتىق بولماسا كەم تۇسپەيتىن تۋىسقاندارىمىزعا قاراعاندا حالقىمىزدىڭ تابيعي ءوسىمى سىن كوتەرمەيتىنىن اشىق ايتاتىن كەز كەلگەن ەدى.
اتتىڭ جالىنداعى, تۇيەنىڭ قومىنداعى اڭگىمە عوي دەگەننىڭ وزىندە, جولداۋدا ەرتەڭگە قالدىرمايتىن, ارنايى ايتپاي تۇرا المايتىن تاعى ءبىر تاقىرىپ بار. ول – ۇلتتىڭ جاڭا بولمىسى. توقاەۆ حالىقتىڭ الدىنداعى قازىرگى ماسەلەنىڭ ماسەلەسىن وسىلايشا تۇيىندەدى. ەرىنبەي ەڭبەك ەتسەك, تەمىردەي تارتىپكە باعىنساق, ادىلەتتىڭ اق جولىنان اينىماساق, ادالدىقتى, ادامدىقتى تۋ ەتىپ ۇستاساق, ۇقىپتىلىقتى ۇمىتپاساق, تياناقتىلىقتان تانباساق, ىسىراپشىلدىق پەن داڭعازالىقتان, بوسسوزدىلىك پەن ماقتانشاقتىقتان ارىلساق, ءبىز المايتىن قامال دا بولمايدى, ءبىز تاپپايتىن امال دا بولمايدى. پرەزيدەنت وسىنى ايتتى. پرەزيدەنت حالىقتى جاڭا جاعدايدا جاڭاشا ويلاۋعا, جاڭاشا جۇمىس ىستەۋگە شاقىردى. مەملەكەت باسشىسى ەلىمىزدىڭ ەڭ كۇردەلى مىندەتتەردى شەشە الاتىنىن ايتىپ وتىر. ەندىگى ءسوز ەلدىڭ وزىندە. ول ءسوزدىڭ ەلدىڭ ءسوزى بولارىنا سەنەمىز.
ساۋىتبەك ابدراحمانوۆ,
ءماجىلىس دەپۋتاتى
