بىرىنشىدەن مەملەكەتتىك قىزمەتتەگى وزگەرىستەر تۋرالى ايتقانى كوڭىلگە قونىمدى. راسىندا پاندەميا كەزىندە كوپتەگەن مەكەمە قىزمەتكەرلەرى قاشىقتان جۇمىس ىستەدى. ءونىمدى جۇمىس ىستەدى. سونىڭ وزىندە جۇمىستارى تۇرالاپ قالعان جوق. جەرگىلىكتى جەرلەردەگى بيلىك وكىلدەرى جوعارعى جاققا جالتاقتاماي وزدىگىنەن جاۋاپتى ءارى دۇرىس شەشىم قابىلداپ جاتقانىن كوردىك. ياعني, پرەزيدەنت ايتقانداي, مەملەكەتتىك قىزمەتتە وڭتايلاندىرۋ كەرەكتىگىن كارانتين ۋاقىتى دالەلدەدى. بۇل شەشىم مينيمالدى جالاقىعا جاۋاپتى جۇمىس اتقارىپ جۇرگەن قىزمەتكەرلەر ءۇشىن ءتيىمدى بولماق. البەتتە, تالاپتى كۇشەيتىپ, قىزمەت ساپاسىن ارتتىرا ءتۇسۋ كەرەك. ونىڭ ۇستىنە مەملەكەتتىك قىزمەتتىڭ ستاتۋسى كوتەرىلىپ, سىبايلاس جەمقورلىققا تۇساۋ بولادى.
تاعى ءبىر نازار اۋدارعىم كەلگەن ماسەلە, «حالىق ۇنىنە قۇلاق اساتىن مەملەكەت» قۇرۋدى قولعا العانى. ماسەلەن, ءماسليحاتتىڭ ماڭىزى قانداي؟ شىنتۋايتىنا كەلگەندە, ءماسليحات جۇمىسى زاڭ جۇزىندە بولعانىمەن ماڭىزدى ماسەلەلەردى شەشە بەرمەيدى. ەندى جولداۋدان كەيىن جەرگىلىكتى باسقارۋ جۇيەسى جۇمىس ىستەي باستايتىن شىعار.
پرەزيدەنت جولداۋىندا دەنساۋلىق ساقتاۋ سالاسىن دا نازارىنان تىس قالدىرمادى. ءوزىم الپىستان اسىپ بارا جاتقان سوڭ بۇل ماسەلەنى دە دەن قويىپ تىڭدادىم. دارىگەرلەر ءبىر اۋرۋىڭدى ەمدەسە, بىرەۋىن قوزعاپ الىپ جاتاتىنى جاسىرىن ەمەس. ەندى پرەزيدەنت اتاپ كورسەتكەندەي, زەينەتاقى قورىنداعى قارجىنى ەمگە جۇمساپ جاتساق قۇبا-قۇپ بولار ەدى. ۇلت دەنساۋلىعىن ساقتاۋ ءۇشىن بۇل ۇلكەن مۇمكىندىك. سول سياقتى زەينەتاقى قورىنا جينالعان اقشانى ءۇي الۋعا دا پايدالانىپ جاتسا, كوپتەگەن وتباسى باسپانا ماسەلەسىن شەشەر ەدى. اسىرەسە جاس وتباسىلارعا ءتيىمدى بولماق.
جولداۋدا كوتەرىلگەن بىرقاتار باستامانىڭ ءبىرى – شاعىن جانە ورتا بيزنەستىڭ جاعدايىن جاقسارتۋ. وزدەرىڭىز بىلەسىزدەر, شىعىستا تاۋ-كەن ونەركاسىبى دامىعان. بىراق الدە دە دامي ءتۇسۋ كەرەك. بىلايشا ايتقاندا, تەمىردى بالقىتىپ ەكسپورتتاي بەرمەي, وڭدەپ ءونىمىن ساتساق, مەملەكەتتىڭ ەكونوميكاسىنا اناعۇرلىم پايداسىن تيگىزەر ەدى.
قورىتا كەلگەندە پرەزيدەنتىمىز داعدارىس جاعدايىندا اتقارىلاتىن ءىس-شارالاردىڭ جوسپارىن ەگجەي-تەگجەيلى باياندادى. جۇزەگە اسۋى ءار قازاقستاندىققا تىكەلەي بايلانىستى.
ولەگ چەرنىشوۆ,
«تالداۋ جانە بولجاۋ ينستيتۋتى» جشس ديرەكتورى
وسكەمەن
