"تەمىرتاۋداعى جەكە ەكولوگيالىق مامانعا قاتىستى ايتسام, بۇعان دەيىن مۇنداي تاجىريبە بولعان ەمەس. بىراق ءبىر اي بۇرىن قالا جۇرتشىلىعىمەن كەزدەسكەن كەزدە بۇل ماسەلە تاعى كوتەرىلدى. ءبىز ماسەلەنى شەشتىك. ەكولوگيالىق پروبلەمالاردى كوزبەن كورىپ, سەزىنەتىن جانە جەدەل اقپارات جىبەرەتىندەي, تەمىرتاۋدا تۇراتىن جانە جۇمىس ىستەيتىن جەكە ەكولوگيالىق ينسپەكتور ءبولىپ وتىرمىز. ءسويتىپ, بۇل ماسەلە شەشىلدى", دەدى م.مىرزاعاليەۆ تۇرعىندار مەن قوعام قايراتكەرلەرىنىڭ وتىنىشتەرى تۋرالى ايتا كەلىپ.
كەزدەسۋدە قالانىڭ قوعام قايراتكەرلەرى ەكولوگيا مينيسترلىگىمەن بىرلەسىپ, تەمىرتاۋداعى ەكولوگيالىق پروبلەمالاردى شەشۋدىڭ جول كارتاسى جوباسىن تالقىلادى. شارا بارىسىندا تۇرعىندار سونىمەن قاتار اينالاسىندا ەمەس, قالانىڭ ىشىندە اعاش وتىرعىزۋ ماسەلەسىن سۇرادى.
"تەمىرتاۋ تۇرعىندارىنىڭ سۇرانىسى تۇسىنىكتى. وتكەن جىلى ءبىز "Aرسەلور ميتتال تەمىرتاۋمەن" 500 مىڭ اعاش وتىرعىزۋ تۋرالى كەلىسكەنبىز. بۇل ماڭىزدى جوبا, ول قالانىڭ عانا ەمەس, ءوڭىردىڭ دە ءسانى بولۋى ءتيىس. وسى ءساتتى پايدالانىپ, تەمىرتاۋ قالاسىنىڭ اكىمىنەن قالادا ءتيىستى جەر تەلىمىن ءبولۋ مۇمكىندىگىن قاراستىرۋدى سۇرايمىن. ءبىز وندا كومپانيامەن جانە جۇرتشىلىقپەن بىرگە وسى اعاشتاردى قالادا وتىرعىزايىق», - دەدى مينيستر.
تاعى ءبىر تالقىلانعان نەگىزگى تاقىرىپ – اتموسفەرالىق اۋا مەن كاسىپورىن ەميسسيالارىنىڭ جاي-كۇيى تۋرالى.
ەكولوگيا مينيسترلىگىنىڭ باسشىسى ەكولوگيالىق كودەكس جوباسىنا ەلىمىزدەگى كاسىپورىنداردىڭ وزىق قولجەتىمدى تەحنولوگيالاردى ەنگىزۋ نورماسى ەنگىزىلگەنىن ەسكە سالدى.
"بۇل ەۋروپالىق تاجىريبە. سونىڭ ارقاسىندا ەۋروپا شىعارىندىلاردى 94% تومەندەتە الدى. دەگەنمەن بۇل پروتسەستىڭ جەدەل ورىندالمايتىنى تۋرالى بىردەن ەسكەرتكىم كەلەدى. ەۋروپادا ول ءۇشىن 15 جىل قاجەت بولعان. ءتيىستى ستاندارتتار مەن انىقتامالىق كىتاپشالاردى دايىنداۋعا 3-4 جىل ۋاقىت كەتەدى. ال بارلىق زاۋىتتى وسىنداي وقت-عا اۋىستىرۋ 2025 جىلدان باستالادى. وعان كوشۋ ءۇشىن كاسىپورىندارعا 10 جىل بەرىلەدى. ەگەر كومپانيا وقت جۇيەسىنە كوشپەسە, وندا بۇل جاعدايدا شىعارىندى ءۇشىن تولەم 2, 4, 8 ەسە وسەدى. سونىمەن بىرگە مەملەكەت ەميسسيا تولەۋدەن باس تارتادى. ياعني, مەملەكەت, سالىستىرمالى تۇردە ايتقاندا, كاسىپورىنداردىڭ وقت ەنگىزۋ شىعىنىن بولىسەدى. بىراق ءبىز زاڭدىق تۇرعىدا وقت ەنگىزىلەتىن 2035 جىلدى كۇتىپ وتىرعىمىز كەلمەيدى. بۇل جۇمىستى ءبىز بىلتىر باستاعانبىز, ەندى ونى ءارى جالعاستىرامىز", دەدى م. مىرزاعاليەۆ.
قالا جۇرتشىلىعىنىڭ بارلىق ۇسىنىستارى تەمىرتاۋ قالاسىنىڭ ەكولوگياسىن جاقسارتۋ جونىندەگى جول كارتاسىنا ەنگىزىلەدى.
