قىتاي دارىگەرلەرى ەستىگەن ادامدى ەستەن تاندىراتىن تاعى ءبىر وزگەشە وپەراتسيا جاساپ شىقتى. بۇل جولى ولار ادامنىڭ بەتىن كەۋدەسىنە ورناتىپ بەردى. وسى تۋرالى حابارلاعان Segodnya.ua اگەنتتىگى دارىگەرلەردىڭ بۇل قادامعا ەكسپەريمەنت رەتىندە بارعانىن دا جازادى.
ەلدىڭ وڭتۇستىك-شىعىسىنداعى فۋتسزيان پروۆينتسياسىندا قاراپايىم وتباسىنان شىققان 17 جاسار سيۋي دزيانمەي ەسىمدى قىز بۇدان 12 جىل بۇرىن, 5 جاسىندا بەتىن كۇيدىرىپ العان ەكەن. سول زارداپتان ونىڭ يەگى, قاباعى مەن وڭ قۇلاعى قاتتى زاقىمدانىپتى. بىراق 10 جىل بويى قىزدىڭ اتا-اناسى ونىڭ ەمدەلۋىنە قاجەتتى قاراجات تاپپاي قينالىپ كەلگەن. سوندىقتان ولار وتكەن جىلى دارىگەرلەر تاراپىنان بولعان ۇسىنىسقا امالسىز تاۋەكەل ەتكەن. ءبىر جاقسىسى, وتا ايتارلىقتاي ءساتتى جاسالعان. ناتيجەسىندە قىزدىڭ كەۋدەسىنە جاڭا بەت قوندىرىلعان.
بۇل وتە كۇردەلى وپەراتسيا ەكى كەزەڭمەن جۇرگىزىلگەن. دارىگەرلەر ءبىرىنشى قىزدىڭ جامباسىنان تەرى الىپ, ونى سول يىعىنىڭ تومەن جاعىنا ورناتادى. سوسىن جاڭا تەرى ءوسىپ, تولىق قالىپتاسىپ بولعان سوڭ دارىگەرلەر ونى قىزدىڭ بەتىنە تىگىپ بەرەدى.
قىتايدا بۇعان ۇقساس تاعى ءبىر وپەراتسيا وسىنىڭ الدىندا جاسالعان بولاتىن. سول جولى اسپان استى ەلىنىڭ تابيبتەرى جول اپاتىنان جاراقات العان جاس جىگىتكە جاڭا مۇرىن قويىپ بەرگەن ەدى.
ايدار ورىسباەۆ.
