الەۋمەتتىك-ەكونوميكا سالاسىنىڭ دامۋ بارىسى قالاي؟

ەلىمىزدىڭ مەملەكەت قايراتكەرى جاقسىبەك قۇلەكەەۆ: "سوڭعى ءبىر جىل ىشىندە پرەزيدەنت قاسىم-جومارت توقاەۆتىڭ جولداۋىندا ايتىلعان ماسەلەلەردى جۇزەگە اسىرۋ ماقساتىندا ەلىمىزدە قوعامدىق باقىلاۋ مەن ازاماتتىق ەركىندىكتى كۇشەيتۋگە، "حالىق ۇنىنە قۇلاق اساتىن مەملەكەت" تۇجىرىمداماسىن ىسكە اسىرۋ اياسىندا بيلىكتىڭ ەسەپ­تىلىگىن قامتاماسىز ەتۋگە، قىلمىستىق زاڭنامانى ىزگىلەن­دىرۋگە، پارلامەنتتە وپپوزيتسيانىڭ مىندەتتى تۇردە بولۋىن زاڭ­داستىرۋعا باعىتتالعان كوپتەگەن جۇمىس اتقارىلدى. بۇل قازاقستان قوعامىن ودان ءارى دەموكراتيالاندىرۋعا باعدار العانىمىزدىڭ جارقىن كورىنىسى. وسىلايشا، بىلتىر­عى جولداۋدا ايتىلعان قوعامدىق جاڭعىرۋعا قاتىستى تارماق­تاردىڭ بارلىعى تولىق ىسكە استى"، دەيدى ول.

سونداي-اق الەۋمەتتىك-ەكونوميكالىق سالاداعى اتقارىلعان ىستەر از ەمەستىگىن دە قوسا كەتتى.

"كوروناۆيرۋس پاندەمياسى پرەزيدەنت جولداۋىندا ايتىلعان ەكونوميكالىق باستامالاردى جۇزەگە اسىرۋ بارىسىنا ءبىرشاما تۇزەتۋلەر ەنگىزدى. سونىڭ ناتيجەسىندە ەلدىڭ ەكونوميكاسى مەن حالىقتىڭ الەۋمەتتىك جاعدايىن جاقسارتۋعا باعىتتالعان شارالار بۇرىن-سوڭدى بولىپ كورمەگەن اۋقىمدى سيپاتقا يە بولدى. ايتالىق، حالىقتى قولداۋعا جانە بيزنەستى قورعاۋعا باعىتتالعان شارالار پاكەتى بيىل 6 ترلن تەڭگەدەن اسىپ، ءىجو-ءنىڭ 8،7 پايىزىن قۇرادى. ول، بىرىنشىدەن، دەنساۋلىق ساقتاۋ جۇيەسىنىڭ ينفراقۇرىلىمىن نىعايتۋعا، پاندەميانىڭ تارالۋىنا قارسى جۇمىستارعا تىكەلەي ارالاسقان مەديتسينا قىزمەتكەرلەرىن ماتەريالدىق ىنتالاندىرۋعا جۇمسالدى. ەكىنشىدەن، بيزنەس سۋبەكتىلەرىنىڭ، اسىرەسە شاعىن جانە ورتا بيزنەس نىساندارىنىڭ ەكونوميكالىق بەلسەندىلىگىن قالپىنا كەلتىرۋگە، جۇمىسسىزدار قاتارىنىڭ كوبەيىپ كەتۋىنە جول بەرمەۋگە، سونىمەن قاتار تابىس كوزىنەن ايرىلعان ازاماتتاردى الەۋمەتتىك قولداۋعا باعىتتالدى. 11،5 مىڭ شاعىن جانە ورتا بيزنەس نىسانىنا جانە 1،6 ملن ادامعا كرەديتتىك «دەمالىس» بەرىلدى. بيزنەستىڭ سالىق تولەمدەرىن تولەۋ مەرزىمى شەگەرىلدى، 8 پايىزدىق جىلدىق مولشەرلەمەمەن نەسيە الۋعا جاعداي جاسالدى. 4 جارىم ملن-عا تارتا ادامعا ەكى اي كولەمىندە الەۋمەتتىك تولەماقى بەرىلدى، 1 ملن 600 مىڭعا جۋىق ادامنىڭ كوممۋنالدىق شىعىندارى وتەلدى"، دەيدى جاقسىبەك قۇلەكەەۆ.

جاقسىبەك قۇلەكەەۆتىڭ پىكىرىنشە، شەتەلدىك جانە وتاندىق جۇمىس­شى­لاردىڭ الەۋمەتتىك جاعدايىن تەڭەلتۋ ءۇشىن جۇيەلى جۇمىستار قولعا الىنعان. شەتەلدىك جۇمىس كۇشىن تارتۋ پروتسەسىن باقىلاۋ كۇشەيتىلدى، جەرگىلىكتى جانە شەتەلدىك جۇمىسكەرلەردىڭ ەڭبەك جانە الەۋمەتتىك قورعالۋىنا قاتىستى ايىرماشىلىقتاردى جويۋعا كوڭىل ءبولىندى. 2020 جىلى شەتەلدىك جۇمىس كۇشىنە كۆوتا 40 پايىزعا، ياعني 49 مىڭ ادامنان 29 مىڭعا ازايدى. وسى باعىتتاعى جۇمىستاردىڭ ناتيجەسىندە ءار سالاداعى وتاندىق ەڭبەككەرلەردىڭ تابىسى كوتەرىلدى، ەڭبەكاقى تولەۋ مەن الەۋمەتتىك قامسىزداندىرۋعا قاتىستى ديسكريميناتسيا بار ۇجىمدارداعى شيەلەنىس دەڭگەيى تومەندەگەنىن تىلگە تيەك ەتتى.

"جالپى العاندا پرەزيدەنتتىڭ ەكونوميكالىق جانە الەۋمەتتىك باعىتتاعى تاپسىرمالارى جۇزەگە استى دەۋگە نەگىز بار"، دەيدى مەملەكەت قايراتكەرى.