جالپى, بيىل الماتى وبلىسىندا اۋىل شارۋاشىلىعى داقىلدارىنىڭ ەگىس القابى 7 مىڭ گەكتارعا ۇلعايىپ, 968,6 مىڭ گەكتاردى قۇراعان بولاتىن. ءمالىم بولعان دەرەككە سايكەس, ديقاندار 263 مىڭ گەكتارعا ەگىلگەن ءداندى-ماساقتى داقىلدىڭ 56 پايىزىن ورىپ ۇلگەرگەن. الدىن الا ەسەپتەۋ بويىنشا 438 مىڭ توننا ءداندى داقىل جينالىپ, گەكتارىنا شاققانداعى ورتاشا ونىمدىلىك 16,7 تسەنتنەردى قۇراۋدا. ال ورىلعان استىقتى سىيىمدىلىعى 771 مىڭ توننا بولاتىن 265 استىق قويماسى قابىلداپ جاتىر ەكەن. ونىڭ ەكەۋى استىق ساقتاۋ ءۇشىن ارنايى ليتسەنزيا العان, بۇل قويمالارعا 58,6 مىڭ توننا استىق سىيادى.
سونىمەن قاتار وبلىستىڭ شارۋا قوجالىقتارى كارتوپ داقىلىن جيناۋعا دا كىرىستى. بيىل ورتاشا ونىمدىلىك 176,1 تسەنتنەردى قۇراپ وتىر, بۇل وتكەن جىلعا قاراعاندا ءسال جوعارى. قازىرگە دەيىن كارتوپ ەگىلگەن 40,3 مىڭ گەكتار القاپتىڭ 8,6 مىڭ گەكتارى جينالىپ, ودان 150,8 مىڭ توننا ءونىم الىنعان. مۇنان بولەك, ەگىلگەن قىستىق جانە جازدىق داقىلدىڭ 42,9 مىڭ تونناسى ورىلىپ, قامباعا قۇيىلدى, ءونىمنىڭ كولەمى وبلىسقا قاجەتتى مولشەردىڭ 54,1 پايىزىن قۇرايدى.
جالپى جەتىسۋدىڭ ءتول داقىلى قانت قىزىلشاسى ەكەنى ايان. بيىل 16,1 مىڭ گەكتار القاپقا ءتاتتى ءتۇبىر تۇقىمى سەبىلگەن بولاتىن. بۇيىرسا, بۇدان 500 مىڭ توننا ءونىم الىپ, 48 مىڭ توننادان استام دايىن قانت شىعارۋ جوسپارلانعان. قازىر وبلىس قىزىلشا جيناۋ ناۋقانىنا تولىق دايىن. اقسۋ جانە كوكسۋ قانت زاۋىتتارى ءونىم قابىلداۋعا كىرىسپەك, ال قانت قىزىلشاسىن قازۋ جۇمىسى قىركۇيەكتىڭ ەكىنشى جارتىسىندا باستالادى.
ەگىن وراعىنىڭ توقتاۋسىز ءجۇرىپ, ءونىمدى دەر كەزىندە جيناپ الۋى ءۇشىن وبلىس اكىمدىگى تاراپىنان بارلىق شارا جاسالۋدا. ناۋقان باستالعانعا دەيىن بارلىق تەحنيكا جوندەلىپ, استىق جيناۋعا 1409 كومباين, 180 مەحانيكالىق قىرمان, 260 استىق تيەگىش, 203 ءدان ۋاتقىش, 160 استىق تازالاۋ ماشينالارى مەن 249 اۆتوتارازى جۇمىسقا كىرىسكەن ەكەن. ال ءونىم جيناۋ ناۋقانىن دەر كەزىندە اياقتاۋ ءۇشىن ەنەرگەتيكا مينيسترلىگى بولگەن 19,1 مىڭ توننا ديزەلدىك وتىن دا كەزەڭ كەزەڭىمەن شارۋاشىلىقتارعا جەتكىزىلۋدە. ديقاندار دا جەڭىلدەتىلگەن باعادا بەرىلەتىن جانارمايعا قاراپ وتىرماي, ءوز قاراجاتتارىنا قاجەتتى ءونىمدى ساتىپ الۋدا. بۇگىنگە دەيىن 5 مىڭ توننا جانار-جاعارماي العان ەكەن.
قىرداعى ەڭبەكشىل قاۋىم قىستىق مال ازىعىن دايىنداۋعا دا جانتالاسىپ جاتىر. قازىرگە دەيىن 2 ملن توننادان استام ءشوپ جانە 983,7 مىڭ توننا باسقا دا مال ازىعى جينالعان. بۇل ءىستىڭ باسى-قاسىندا قاراتال اۋدانىنىڭ شارۋالارى دا ءجۇر. اۋداندا بۇگىندە 97 مىڭ توننا جوڭىشقا جينالعان. جالپى مال ازىعىنا قاجەت 109,5 مىڭ توننا ءشوپ جيناۋ جوسپارلانعان. سونداي-اق 42,3 مىڭ توننا پىشەندەمە, 29,5 مىڭ توننا سابان, 13,5 مىڭ توننا جەمدىك ازىق ازىرلەنگەن.
– بەس گەكتار جەرگە وسكەن ءشوپتى شاۋىپ, تايلاپ جاتىرمىز. بيىل قىردا قۋاڭشىلىق بولدى. جاۋىن-شاشىن دا از ءتۇستى. ازىرگە 1 مىڭ وراما ءشوپ جينادىق. شابىندىقتا ءالى 500-گە جۋىق وراما شىعاتىن ءشوپ جاتىر. ءوزىمنىڭ ازىن-اۋلاق مالىم بار. اۋىلدا 5-6 باس جىلقى, 2-3 باس سيىر, 30 باسقا جۋىق قوي-ەشكى ۇستايمىن. ارتىلعان ءشوپتى كەتكەن شىعىندى جابۋ ءۇشىن ساتامىن, – دەيدى قاراتال اۋدانىنداعى «ك.دۇيسەنباەۆا» شارۋا قوجالىعىنىڭ باسقارۋشىسى جاندوس گيسانوۆ.
الماتى وبلىسى
