بۇل تۋرالى ونلاين رەجىمدە وتكەن تامىز ءماسليحاتىندا مالىمدەگەن ءوڭىر باسشىسى جەڭىس قاسىمبەك بيىل وبلىسىمىزداعى مۇعالىم ماماندىعىنىڭ بەدەلىن كوتەرۋ ءۇشىن "قاراعاندى وبلىسىنىڭ ءبىلىم بەرۋ سالاسىنىڭ قۇرمەتتى پەداگوگى" اتتى ءتوس بەلگىسىنىڭ بەكىتىلگەنىن اتاپ ءوتتى.
– بۇل ماراپات ۇزدىك پەداگوگتارعا تاپسىرىلادى. ونىڭ يەگەرلەرىنە 400 اەك مولشەرىندە اقشالاي سىياقى تولەنەدى – بۇل ءبىر ميلليوننان استام تەڭگە. اتالعان ماراپاتتىڭ ءبىرىنشى يەگەرلەرىن سىزدەردىڭ كاسىبي مەرەكەلەرىڭىز – مۇعالىمدەر كۇنىنە وراي انىقتايمىز, دەدى وبلىس اكىمى.
جالپى, مەملەكەت پەن جەرگىلىكتى اتقارۋشى بيلىكتىڭ ءبىلىم بەرۋ جۇيەسىنە دەگەن ەرەكشە نازارى مەن ناقتى قامقورلىعىن اتاپ ءوتۋ كەرەك. مىسالى, وسى جىلدىڭ 1 قاڭتارىنان باستاپ مۇعالىمدەردىڭ ەڭبەكاقىسى ورتا ەسەپپەن 25%-عا ءوستى. "ديپلوممەن اۋىلعا!" باعدارلاماسى اياسىندا شالعايداعى ەلدى مەكەندەرگە بارىپ جۇمىس ىستەۋگە نيەت بىلدىرگەن جاس ماماندارعا 70-تەن 100 اەك مولشەرىنە دەيىن كوتەرمە ەڭبەكاقى تاعايىندالدى. ستۋدەنتتەردىڭ دە شاكىرتقاسى ءوسىپ, ول 25%-عا دەيىن ۇلعايتىلعان.
سونىمەن قاتار, تامىز كەڭەسىندە وبلىس اكىمى وڭىردەگى ء بىلىم بەرۋ سالاسىنىڭ ينفراقۇرىلىمىن دامىتۋ تۋرالى دا كەڭىنەن اڭگىمەلەدى. ايتا كەتۋ كەرەك, بيىل وبلىستاعى مەكتەپتەردى, بالا باقشالار مەن كوللەدجدەردى جوندەۋگە بۇرىن-سوڭدى بولىپ كورمەگەن قارجى – 16,8 ملرد تەڭگە ءبولىندى. مىسالى, بۇل قاراجات وتكەن جىلعىمەن سالىستىرعاندا, شامامەن ءۇش ەسەدەي ارتىق. بۇدان بولەك, بيىل وبلىستىڭ قالالارىندا مەكتەپ وقۋشىلارىنىڭ زاماناۋي ستاندارتتارعا ساي جابدىقتالعان ەكى جاڭا سارايى اشىلماقشى.
بيىل كوروناۆيرۋس پاندەمياسىنا بايلانىستى, شۇعىل تۇردە قاشىقتان وقىتۋ جۇيەسىنە كوشكەن ۇستازدار قاۋىمى جەرگىلىكتى اتقارۋشى بيلىك تاراپىنان قولداۋسىز قالعان جوق. ورتاق مۇددە جولىنداعى بىرلەسە ءىس-قيمىل ەتكەن ارەكەتتەر ءوز جەمىسىن بەرىپ, ءوڭىردىڭ ۇستازدار قاۋىمى بۇل سىناقتان دا ابىرويمەن ءوتتى. وسىعان وراي, جاڭا وقۋ جىلىنىڭ قارساڭىندا وبلىستىڭ 160 مۇعالىمى ۆەدومستۆولىق ماراپاتقا يە بولدى جانە ون پەداگوگ وبلىس اكىمىنىڭ «العىس حاتىن» الدى.
بيىلعى تامىز ءماسليحاتىنىڭ جاڭا وقۋ جىلىنىڭ ەرەكشەلىكتەرىنە ارنالعانىن ايتا كەتۋ ءلازىم. وسى تۇرعىدان كەلگەندە, كونفەرەنتسياعا قاتىسۋشىلار قاشىقتان وقىتۋدى ۇيىمداستىرۋ جانە ءبىلىم ساپاسىن ارتتىرۋ ماسەلەلەرىن تالقىلادى. قالالىق جانە اۋىلدىق مەكتەپ وقۋشىلارىنا ارنالعان جاڭا ءبىلىم جوبالارى ۇسىنىلدى.
ەسكە سالار بولساق, بيىل ءبىلىم بەرۋ قىزمەتكەرلەرىنىڭ ءداستۇرلى تامىز ءماسليحاتى Zoom پلاتفورماسىندا جانە Facebook الەۋمەتتىك جەلىسىندە ونلاين رەجىمدە ءوتتى. وعان ءبىلىم قىزمەتكەرلەرى, اتا-انالار قوعامداستىعىنىڭ جانە ۇكىمەتتىك ەمەس ۇيىمدارىنىڭ وكىلدەرى بار, بارلىعى ون مىڭنان استام ادام قاشىقتان قاتىستى. تامىز ءماسليحاتىنا ارنالعان جيىن جەرگىلىكتى Saryarqa تەلەارناسىنىڭ تىكەلەي ەفيرىندە جانە YouTube-تا كورسەتىلدى.
