پارلامەنت • 26 تامىز، 2020

نۇرلان نىعماتۋلين: ءماجىلىس ازاماتتىق قوعام مەن سىندارلى ۇسىنىستار ءۇشىن ءاردايىم اشىق

905 رەت كورسەتىلدى

ءماجىلىس توراعاسى نۇرلان نىعماتۋلين دەپۋتاتتىق كورپۋستىڭ زاڭ جوبالارىمەن جۇمىس ىستەۋ بارىسىندا ساراپشىلار قاۋىمداستىعىمەن ءوزارا ءىس-قيمىلدى نىعايتۋ قاجەتتىگى تۋرالى ايتتى، دەپ حابارلايدى Egemen.kz قازاقپاراتقا سىلتەمە جاساپ. 

بۇل تۋرالى پالاتا سپيكەرى بەلگىلى قازاقستاندىق ساياساتتانۋشىلارمەن جانە ساراپشىلارمەن كەزدەسۋىنە تالقىلادى، دەپ حابارلايدى ءماجىلىستىڭ رەسمي سايتى. نۇرلان نىعماتۋلين ءماجىلىستىڭ ازاماتتىق قوعام مەن سىندارلى ۇسىنىستار ءۇشىن ءاردايىم اشىق ەكەنىن ايتىپ، ساراپشىلار قاۋىمداستىعى وكىلدەرىنىڭ زاڭ جوبالارىمەن جۇمىس ىستەۋدەگى تاجىريبەسىنە توقتالدى. بۇلار ەڭ الدىمەن، الەۋمەتتىك، ەكونوميكالىق سالالاردى جەتىلدىرۋگە جانە مەملەكەت باسشىسىنىڭ ساياسي رەفورمالارىن ىسكە اسىرۋعا ارنالعان زاڭدار.

ءماجىلىس توراعاسىنىڭ ايتۋىنشا، ساراپشىلاردىڭ ۇسىنىستارى مەن پىكىرلەرى ەلىمىزدى دامىتۋعا جانە حالىقتىڭ ءال-اۋقاتىن ارتتىرۋعا باعىتتالعان ساپالى زاڭداردى دايىنداۋ ءۇشىن ماڭىزدى.

- ءبىزدىڭ ۇستانىمىمىز بارلىعىنا بەلگىلى – ول ءاردايىم زاڭ شىعارۋشىلىق جۇمىس بارىسىندا ساراپشىلار تاراپىنان ايتىلعان ۇسىنىستار مەن پىكىرلەردى بارىنشا ەسەپكە الۋ. ءبىز زاڭ جوبالارىمەن جۇمىس ىستەۋ كەزىندە سىزدەردىڭ باعالارىڭىز بەن تۇجىرىمدارىڭىزعا سۇيەنۋ ءۇشىن ساراپشىلار قاۋىمداستىعىمەن ۇنەمى بايلانىستا بولۋعا نيەتتىمىز، – دەدى نۇرلان نىعماتۋلين.

سونداي-اق، ءماجىلىس توراعاسى دەپۋتاتتاردىڭ زاڭ شىعارۋ جۇمىسى كەزەكتى پارلامەنتتىك سەسسيالار اراسىنداعى كەزەڭدە دە جالعاساتىنىنا نازار اۋداردى. نۇرلان نىعماتۋلين اتاپ وتكەندەي، قازىر ءماجىلىستىڭ زاڭنامالىق قورجىنىندا 72 زاڭ جوباسى بار بولسا، ونىڭ 21-نە دەپۋتاتتاردىڭ وزدەرى باستاماشى بولعان.

ءماجىلىس سپيكەرى الداعى سەسسيادا دەپۋتاتتاردىڭ زاڭ شىعارۋ قىزمەتىنىڭ باسىم باعىتتارى تۋرالى ايتا كەلىپ، مەملەكەت باسشىسى قاسىم-جومارت توقاەۆتىڭ پارلامەنتتىك سەسسيانىڭ اشىلۋىندا جوسپارلانىپ وتىرعان حالىققا جولداۋىنىڭ ورىندالۋىن زاڭنامالىق قولداۋدى قامتاماسىز ەتۋدىڭ ماڭىزدىلىعىن اتاپ ءوتتى

الداعى ۋاقىتتا دەپۋتاتتارعا اۋىلدىق، اۋداندىق، قالالىق دەڭگەيدەگى بيلىكپەن جاۋاپكەرشىلىكتى كەڭەيتۋ ماسەلەلەرى بويىنشا ەكولوگيالىق كودەكس جوباسىمەن دە جۇمىس ىستەۋ مىندەتى تۇر. ءوز كەزەگىندە كەزدەسۋگە قاتىسۋشىلار «جايىلىمدار تۋرالى» زاڭدى ءتيىمدى قولدانۋ، جەكە تۇلعالاردىڭ بانكروتتىعى جانە حالىقتىڭ نەسيەلەندىرىلۋى مەن قوعامدىق كەڭەستەردىڭ جۇمىسى سياقتى بىرقاتار ماسەلەلەردى كوتەردى. وتىرىس بارىسىندا سىبايلاس جەمقورلىققا قارسى زاڭنامانى كۇشەيتۋ جونىندەگى جۇمىستا دەپۋتاتتىق كورپۋس پەن ساراپشىلار قوعامداستىعىنىڭ ىنتىماقتاستىعىنا ەرەكشە نازار اۋدارىلدى.

نۇرلان نىعماتۋلين دەپۋتاتتىق كورپۋس پەن ساراپشىلار قاۋىمداستىعىنىڭ ىنتىماقتاستىعىنىڭ ناتيجەسىندە اۋقىمدى پىكىرلەردى ەسكەرە وتىرىپ، ساپالى زاڭ جوبالارىن قابىلداۋعا بولاتىنىنا سەنىم ءبىلدىردى.



سوڭعى جاڭالىقتار

مەرەكە قارساڭىندا ماراپاتتالدى

ايماقتار • بۇگىن، 13:58

6 مامىرعا ارنالعان ۆاليۋتا باعامى

ەكونوميكا • بۇگىن، 11:16

«چەلسي» فينالعا شىقتى

سپورت • بۇگىن، 10:48

ۇقساس جاڭالىقتار