سەناتورلار «جول كارتاسى-2020» باعدارلاماسى بويىنشا اعىمداعى جوندەۋدەن ءوتىپ جاتقان سپورت كەشەنىندە بولدى. دەپۋتاتتار اۋىل جولدارىنىڭ جاعدايىمەن دە تانىستى. اكىمدىك وكىلىنىڭ ايتۋىنشا, بيىل سالىنۋى ءتيىس جولداردىڭ جارتىسىنان كوبىنىڭ قۇرىلىسى اياقتالعان. جالپى وڭىردە بيىل «جول كارتاسى-2020» بويىنشا 18 جوبانى ىسكە اسىرۋ كوزدەلىپ وتىر. ولاردىڭ قاتارىندا 4 اۋىز سۋ قۇبىرىنىڭ قۇرىلىسى جانە 10 كوشەنى جوندەۋ جۇمىستارى بار.
دەپۋتاتتار «7-20-25» جانە «5-10-20» مەملەكەتتىك باعدارلاماسى بويىنشا سالىنعان كوپپاتەرلى ۇيلەردىڭ ساپاسىن كورىپ شىقتى. سەناتورلار اتالعان ۇيلەردى شىنايى مۇقتاج جاندار الۋى قاجەت ەكەنىن ايتتى. سونىمەن قاتار اۋدان اكتيۆىمەن كەزدەسۋ بارىسىندا قايتالانۋى مۇمكىن كەزەكتى پاندەمياعا قازىردەن دايىندالۋدىڭ ماڭىزىنا توقتالدى. سەناتور ن.ءجۇسىپ مەملەكەت ىندەتپەن كۇرەسكە قوماقتى بيۋدجەت قارجىسىن بولۋدە, سوندىقتان جەرگىلىكتى اتقارۋشى ورگاندار ولاردىڭ ماقساتتى جۇمسالۋىن قاداعالاۋى قاجەت ەكەنىن ەسكەرتتى.
* * *
ءماجىلىس دەپۋتاتى ب.سماعۇل الماتى وبلىسىنداعى «بايانكول» شەكارالىق زاستاۆاسىنا بارىپ, شەكاراشىلاردىڭ تۇرمىس-تىرشىلىگىمەن تانىستى.
دەپۋتاتتىڭ ايتۋىنشا, كومانديرلەر تۇراتىن ەسكى ۇيلەرگە جوندەۋ جۇرگىزىلىپ, ال قاتارداعى جاۋىنگەرلەرگە ارنالعان ۇيلەردىڭ قابىرعالارىن جىلۋ وقشاۋلاعىش ماتەريالدارمەن قاپتاپ, استىنا ىرگەتاس قۇيىپ, قىستا جىلى, جازدا سالقىن, ونىڭ ۇستىنە الىستان كورىنبەيتىن, جاسىرىن, ۇقىپتى باسپانالار دايىندالۋدا. سونىمەن قاتار ساپار بارىسىندا ول رايىمبەك اۋدانى حالقىمەن كەزدەسىپ, اۋدان ورتالىعىندا بوي كوتەرگەن جاڭا عيماراتتاردى جانە قازىرگى كەزدە قىزۋ جۇمىستار جۇرگىزىلىپ جاتقان قۇرىلىس الاڭدارىنا باردى. قازىرگى ۋاقىتتا اۋدان ورتالىعى نارىنقول اۋىلىندا جەرگىلىكتى تۇرعىندارعا ارنالعان 83 تۇرعىن ءۇي سالىنۋدا. ال مەملەكەتتىك قىزمەتكەرلەر يگىلىگىنە 4 قىزمەتتىك تۇرعىن ءۇي تاپسىرىلماق. سونداي-اق دەپۋتات «جۇمىسپەن قامتۋ جول كارتاسى» نەگىزىندە قىزىلشەكارا اۋىلىنىڭ اۋىز سۋ جۇيەسىن قايتا جاڭعىرتۋعا جانە نارىنقول, جاڭا-تەكەس اۋىلدارىندا كوشەلەردى جارىقتاندىرۋ جۇمىستارى باستالعانىنا ەرەكشە نازار اۋداردى. اۋداننىڭ ينفراقۇرىلىمى دا جاڭعىرۋدا. مۇندا جەرگىلىكتى ماڭىزداعى جولدار دا جونگە كەلتىرىلىپ, جاڭادان توسەلۋدە.
* * *
سەنات دەپۋتاتى د.مۋسين سەمەي قالاسىنا ساپارى بارىسىندا اباي اتىنداعى مۋزەيگە باردى.
قالا اكىمى سەناتورعا تاياۋدا عانا اباي الاڭىن اباتتاندىرۋ جۇمىستارى اياقتالعانىن, سونىڭ ناتيجەسىندە بۇل جەردە ويىن جانە سپورت الاڭدارى اشىلىپ, جاس تالدار وتىرعىزىلعانىن ايتتى. سونداي-اق, اقىن ەسكەرتكىشىن جارىقتاندىرىپ تۇراتىن ارنايى قوندىرعىلار ورناتىلعان. قالادا اباي اتىنداعى تەاترعا دا جوندەۋ جۇمىستارى جۇرگىزىلىپ جاتىر. تەاتر كوركەمدىك جەتەكشىسىنىڭ ايتۋىنشا, عيماراتتىڭ تاريحي كەلبەتى تولىق ساقتالادى. مەرەيتوي اياسىندا اقىن مۋزەيىندە اباي مەن بالالارىنا ارنالعان ەلىمىز بويىنشا العاشقى ەسكەرتكىش ورناتىلادى دەپ جوسپارلانىپ وتىر. سونىمەن قاتار د.مۋسين اباي قۇنانباي ۇلىنىڭ 175 جىلدىعىنا وراي وڭىرلەردىڭ سەمەي قالاسىن كوركەيتۋ تۋرالى ۇكىمەت تاپسىرماسىن قالاي ورىنداپ جاتقانىنا نازار اۋداردى. وسىعان وراي سەناتور وبلىس اكىمدىگى بۇل ماسەلەگە باسا ءمان بەرىپ, اتالعان تاپسىرمانىڭ ورىندالۋىن باقىلاۋعا الۋ كەرەكتىگىن اتاپ ءوتتى.
* * *
ءماجىلىس دەپۋتاتى ي.ارونوۆا قوستاناي وبلىسى بويىنشا جاڭا وقۋ جىلىنا دايىندىق جاعدايىمەن تانىستى.
جەرگىلىكتى ءبىلىم سالاسى ماماندارىنىڭ ايتۋىنشا, وسى جىلى 9,2 ملرد تەڭگە قارجى ءبولىنىپ, 130 نىسانعا كۇردەلى جوندەۋ جۇرگىزىلگەن. ي.ارونوۆا وبلىستىق ۇستازدار قاۋىمىمەن ونلاين كونفەرەنتسيادا قازىرگى كارانتين جاعدايىندا ءبىلىم بەرۋ جۇمىسىن ۇيىمداستىرۋ تاقىرىبىن تالقىلادى. ءمالىم بولعانداي, بارلىق مەكتەپتەردە ساباق قاشىقتىقتان وقىتۋدان باستالادى. ول ءۇشىن بارلىق جاعداي جاسالعان. الايدا, دەپۋتات قاشىقتىقتان وقىتۋدا ءبىلىم بەرۋ ساپاسىنا نۇقسان كەلتىرمەۋگە باسا نازار اۋداردى. ونلاين كەزدەسۋ بارىسىندا ۇستازدار مەن ولاردىڭ وتباسىن الەۋمەتتىك قولداۋ جايى دا نازاردان تىس قالمادى. ناقتى ايتقاندا, كورونوۆيرۋس ىندەتىن جۇقتىرعان مۇعالىمدەردى ساۋىقتىرۋ ماسەلەسى اڭگىمە وزەگىنە اينالدى. ۇستازدار قاۋىمى بيىل تۇڭعىش رەت باستاۋىش سىنىپتار ءۇشىن ۇيىمداستىرىلاتىن «كەزەكشى سىنىپتار» ماسەلەسىنە دەپۋتات نازارىن اۋداردى. ايتۋلارىنشا, جۇكتەمەنىڭ ارتۋىنا بايلانىستى ەڭبەكاقى تولەمىنە قاتىستى نورماتيۆتىك-قۇقىقتىق بازا جوق. دەپۋتات وسى جانە باسقا دا وزەكتى سۇراقتاردى قۇزىرلى ورگاندارمەن بىرلەسىپ شەشۋگە ۋادە ەتتى.
* * *
ءماجىلىستىڭ اگرارلىق ماسەلەلەر كوميتەتىنىڭ توراعاسى ب.وسپانوۆ شىمكەنت قالاسىندا كاسىپكەرلەرمەن كەزدەسىپ, شاعىن جانە ورتا بيزنەستى قولداۋ ماسەلەسىن تالقىلادى.
سونىمەن قاتار ول «Taسساي» يندۋستريالدى ايماعىنا جانە «وڭتۇستىك» ەركىن ەكونوميكالىق ايماعىنا بارعان كەزدە مۇنداي كەزدەسۋلەردىڭ قازاقستاندىقتاردىڭ ءومىرىن جاقسارتۋ ءۇشىن ەل باسشىلىعى قويعان مىندەتتەردى شەشۋدىڭ ماڭىزدىلىعىن اتاپ ءوتتى. دەپۋتاتتىڭ ايتۋىنشا, بيزنەسكە جەڭىلدەتىلگەن نەسيە بەرۋ تاجىريبەسىن, شەتەلدەن اكەلىنەتىن كەيبىر ماتەريالدارعا باجدى تومەندەتۋ, سونداي-اق, كاسىپورىنداردى وندىرىستىك ينفراقۇرىلىممەن قامتاماسىز ەتۋ ماسەلەلەرىنە ەرەكشە ءمان بەرۋ كەرەك. دەپۋتات كاسىپكەرلەردىڭ مەملەكەتتىك باعدارلامالاردى ىسكە اسىرۋدىڭ نەگىزگى باعىتتارى بويىنشا سۇراقتارىنا جاۋاپ بەرىپ, زاڭ جوبالارى تۋرالى جانە الداعى پارتياىشىلىك سايلاۋ, ياعني پرايمەريز تۋرالى ايتتى.
