ءۇش جىل بۇرىن ۇكىمەت قۇرامىنداعى 16 مينيسترلىكتىڭ تورتەۋى ءوز سايتتارىن ورىسشا اتاعانىن حابارلاعان ەدىك. سول ماقالادا ءسوز بولعان دەنساۋلىق ساقتاۋ مينيسترلىگى, ىشكى ىستەر مينيسترلىگى, اۋىل شارۋاشىلىعى مينيسترلىگى جانە مادەنيەت جانە سپورت مينيسترلىگى سايتتارىنىڭ دومەندىك اتاۋىن وزگەرتكەن ەكەن. بۇگىندە العاشقى ەكەۋى قازاق تىلىندەگى نۇسقانى تاڭداسا (dsm, qriim) كەيىنگىلەرى اعىلشىن تىلىندەگى اتاۋدى قولدانۋدى دۇرىس كورگەن (moa, mcs).
دومەندىك اتاۋىن قازاق تىلىندە جازعان مينيسترلىكتەر قاتارىندا ادىلەت مينيسترلىگى – adilet.gov.kz, ەڭبەك جانە حالىقتى الەۋمەتتىك قورعاۋ مينيسترلىگى – enbek.gov.kz, سونداي-اق اقپارات جانە قوعامدىق دامۋ مينيسترلىگى – qogam.gov.kz. قالعانى تۇگەلدەي اعىلشىن تىلىندە.
وسى ورايدا, مىنا ماسەلەنى ايتا كەتكەن ءجون. ۇكىمەت قۇرامىنداعى مينيسترلىكتەر مەن وبلىس اكىمدىكتەرىنىڭ سايتتارى قازىرگى تاڭدا ءبىر دومەندىك اتاۋعا (gov.kz) بىرىكتىرىلگەن. ياعني بۇكىل ۆەب-رەسۋرس ءبىر شاڭىراق استىنا جينالعاندىقتان, مينيسترلىكتەردىڭ سايتتارىندا بىرىزدىلىك بار.
ءۇش جىل بۇرىنعى ماقالادا ايتىلعان وبلىس اكىمدىكتەرىنىڭ ينتەرنەت-رەسۋرستارىنىڭ دومەندىك اتاۋى وزگەرمەگەن, سول قالپى. ماسەلەن, شىعىس قازاقستان وبلىسى – akimvko, قاراعاندى وبلىسى – karaganda دومەندىك اتاۋىن قولدانعان.
سونداي-اق جوعارىدا ايتىلعان ماقالادا جوعارعى سوتتىڭ (sud.gov.kz), ۇلتتىق قاۋىپسىزدىك كوميتەتىنىڭ (knb.kz), قازاقستان رەسپۋبليكاسى پرەزيدەنتىنىڭ ءىس باسقارماسىنىڭ (udp-rk.kz – ۋپراۆلەنيە دەلامي پرەزيدەنتا رك), قازاقستان رەسپۋبليكاسى كاسىپوداقتار فەدەراتسياسىنىڭ (fprk.kz – فەدەراتسيا پروفسويۋزوۆ رك) مەن بىرىڭعاي جيناقتاۋشى زەينەتاقى قورىنىڭ (enpf.kz – ەدينىي ناكوپيتەلنىي پەنسيوننىي فوند) دومەندىك اتاۋلارى ورىس تىلىندە جازىلعانىن حابارلاعان ەدىك. سودان بەرى ءۇش جىل وتسە دە, «باياعى جارتاس ءبىر جارتاستىڭ» كەرى كەلىپ تۇر.
مينيسترلىكتىڭ دومەندىك اتاۋلارىنداعى جاعداي ءبىرشاما تۇزەلگەنىمەن, ولارعا قاراستى كوميتەتتەر ءالى كۇنگە ورىس ءتىلدى دومەنگە شەڭگەلدەپ جابىسىپ العان سىڭايلى. ماسەلەن, قارجى مينيسترلىگىنىڭ قارجى مونيتورينگى كوميتەتى (kfm.gov.kz – كوميتەت پو فينانسوۆومۋ مونيتورينگۋ), تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ كوميتەتى (kkkbtu – كوميتەت كونتروليا كاچەستۆا ي بەزوپاسنوستي توۆاروۆ ي ۋسلۋگ), يندۋستريالىق دامۋ جانە ونەركاسىپتىك قاۋىپسىزدىك كوميتەتى (comprom – كوميتەت يندۋستريالنوگو رازۆيتيا ي پرومىشلەننوي بەزوپاسنوستي), قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتى (kds – كوميتەت پو دەلام سترويتەلستۆا ي جيليششنو-كوممۋنالنوگو حوزيايستۆا) سەكىلدى بىرقاتار كوميتەت بار. تەرروريزمگە قارسى ورتالىقتىڭ سايتى دا ورىسشا اتاۋدى تاڭداۋدى ءجون كورگەن ەكەن (antiterrosticheskiy-centr).
بۇكىل مينيسترلىكتەر مەن اكىمدىكتەر سايتى ءبىر شاڭىراق استىنا جيىلعانىمەن, ءالى كۇنگە كەي بولىمدەردە اقپارات تولىق ەمەس. ماسەلەن, پاۆلودار وبلىسى اكىمدىگىنىڭ ينتەرنەت-رەسۋرسىنداعى «جالپى اقپارات» بولىمىندە اكىمدىك تۋرالى ورىسشا جازىلعان. ال «ونەركاسىپ جانە بيزنەس» بولىمىندە مۇلدەم اقپارات جوق. پاۆلودار ەل ەكونوميكاسىنداعى جەتەكشى وبلىستارىنىڭ ءبىرى سانالادى. وڭىردە ونەركاسىپ تە, بيزنەس تە قىزۋ ءجۇرىپ جاتقانى تۇسىنىكتى. بىراق وبلىس اكىمدىگىنىڭ سايتىندا بۇل جونىندە اقپارات بولماۋى تاڭعالدىرادى.
سونداي-اق بۇكىل مينيسترلىكتەر مەن اكىمدىكتەردىڭ سايتتارىن اشقاندا ينتەرنەت-رەسۋرستار نەگىزىنەن ورىسشاعا بەيىمدەلگەنىن اڭعارۋ قيىن ەمەس. ماسەلەن, «جالپى اقپارات» ءبولىمىن اشقاندا شەكەسىندە «وبششايا ينفورماتسيا» دەپ تۇرۋى, ءتىلدى قازاقشاعا اۋىستىرعاندا «سكاچيۆانيە يازىكوۆ» دەپ شىعۋى بۇكىل سايتقا ءتان كەمشىلىك بار ەكەنىن انىق اڭعارتادى.
وبلىس سايتتارىنىڭ جايى تۇسىنىكتى بولعان سوڭ, اۋدان اكىمدىكتەرىنىڭ سايتىن شولىپ شىققان ەدىك. بىرنەشە ۆەب-رەسۋرستى اقتارعاننان كەيىن قالعانىن اشۋعا جۇرەك داۋالامادى. ماسەلەن, جامبىل وبلىسىنىڭ بايزاق جانە مويىنقۇم اۋداندارى سايتتارىنىڭ اتاۋى ورىسشا جازىلعان. «اكيمات بايزاكسكوگو رايونا» دەگەن جازۋ قازاق تىلىنە اۋىستىرساق تا, ورىس تىلىنە اۋىستىرساق تا وزگەرمەدى. ونىڭ ۇستىنە, ينتەرنەت-رەسۋرستاردىڭ قالاي بولسا سولاي جاسالعانى كوزگە انىق كورىنىپ تۇر.
نەگىزى ءبىز ايتقان ماسەلەلەردى شەشۋ وڭاي شارۋا. دومەندىك اتاۋ مەن ونى ءبىر جىلعا سوزدىرتۋ قۇنى قىمبات ەمەس. قازاق تىلىندەگى بولىمدەردەگى اقپاراتتى تولتىرۋ دا كوپ قاراجات پەن ۋاقىت تالاپ ەتپەيتىنى دە تۇسىنىكتى.
مەملەكەتتىك مەكەمەلەردىڭ قىزمەتى ينتەرنەتتەگى ۆەب-رەسۋرستارىنداعى كەمشىلىكتەرمەن باعالانبايتىنى تۇسىنىكتى. ءتىلدىڭ ماسەلەسى دە دومەندىك اتاۋدى قازاقشالاۋمەن شەشىلمەيتىنى بەلگىلى. بىراق قازاقستاننىڭ مەملەكەتتىك ءتىلى قازاق ءتىلى ەكەنىن ەسكەرسەك, جوعارىدا ايتىلعان مينيسترلىكتەر مەن اكىمدىكتەر انا تىلىمىزگە قۇرمەتپەن قاراسا, وڭ قادام بولار ەدى.
