قازىرگى تاڭدا وسى ستراتەگيا بويىنشا قويىلعان مىندەتتەر ورىندالىپ كەلەدى. ماسەلەن, مەملەكەتتىك قىزمەت سالاسىنداعى سىبايلاس جەمقورلىققا قارسى جۇمىس نەگىزىنەن 2015 جىلى قابىلدانعان جەمقورلىققا قارسى كۇرەس جونىندەگى زاڭ, مەملەكەتتىك قىزمەتكە قاتىستى زاڭ, مەملەكەتتىك قىزمەتتىڭ ەتيكالىق كودەكسى ارقىلى جۇزەگە استى.
سونداي-اق 2016 جىلدان بەرى ەلىمىزدە «قوعامدىق باقىلاۋ» قىزمەتى جۇمىس ىستەيدى. بۇل جوبا ۇكىمەتتىك ەمەس ۇيىمداردى تارتۋ ارقىلى مەملەكەتتىك جانە جەكە سەكتورداعى سىبايلاس جەمقورلىق ارەكەتىن انىقتاۋعا ارنالعان.
بۇدان بولەك, جوعارىدا اتالعان زاڭدار ارقىلى جەكە سەكتور سالاسىنداعى جەمقورلىقتى باقىلاۋ دا العاش رەت جولعا قويىلدى. سىبايلاس جەمقورلىققا قارسى ستراتەگيانى جۇزەگە اسىرۋ ناتيجەسىندە قۇقىق قورعاۋ جانە سوت جۇيەسىندە كادرلاردى تاڭداۋ جەتىلدىرىلدى.
سونداي-اق جەمقورلىقتىڭ زيانى تۋرالى قوعامدى اقپاراتتاندىرۋ ءۇشىن دە كوپتەگەن جۇمىس اتقارىلدى. قازاقستان حالىقارالىق سىبايلاس جەمقورلىققا قارسى ۇيىمدارمەن بەلسەندى ىنتىماقتاستىق ورناتقان.
جالپى العاندا, قازاقستاننىڭ سىبايلاس جەمقورلىققا قارسى ستراتەگياسى مەملەكەتىمىزدىڭ ساياسي, الەۋمەتتىك جانە ەكونوميكالىق جاڭعىرۋىن ءارى قاراي جۇرگىزۋگە قاجەتتى جاعداي جاسايدى. وسى ورايدا, قوعامدىق ىندەتپەن كۇرەس جۇمىسى ەلىمىزدىڭ دامۋىنا سەرپىن بەرىپ, ينۆەستيتسيا تارتۋ الەۋەتىن دە ىلگەرىلەتەدى. قورىتا ايتقاندا, پرەزيدەنتىمىز اتاپ وتكەندەي, سىبايلاس جەمقورلىققا قارسى جۇيەلى جۇمىس جۇرگىزۋ قوعامدا كەز كەلگەن جەمقورلىق ءتۇرىن ايىپتاۋ مادەنيەتىن قالىپتاستىرادى.
سليامجار احمەتجاروۆ,
پرەزيدەنت جانىنداعى قازاقستان ستراتەگيالىق زەرتتەۋلەر ينستيتۋتى الەۋمەتتىك-ساياسي زەرتتەۋلەر ءبولىمىنىڭ عىلىمي قىزمەتكەرى
