تاۋلى, قىراتتى ەرەيمەنتاۋ ءوڭىرى ەلىمىزدەگى جوڭعار قاقپاسى, شەلەك, قورداي ءتارىزدى جەل باعىتى ۇنەمى ۇيىتقي سوعىپ, الماسىپ وتىراتىن دالىزدەردىڭ ءبىرى. سول سەبەپتى بۇل جەردە جەل ەنەرگەتيكاسىن ءوندىرۋ الەۋەتى وتە جوعارى. ءتۇپتىڭ تۇبىندە جەل ەنەرگياسى بالاما ەنەرگيا كوزدەرىنىڭ اراسىندا بەلسەندى باسەكەگە تۇسەتىندەي بولۋى كەرەك. قازىرگى تالپىنىس وسى باعىتتاعى قولعا الىنىپ وتىرعان الاپات شارۋالاردىڭ العاشقى قارلىعاشتارى دەسەك تە بولار.
جەل ەنەرگياسىن ارنايى ەلەكتر گەنەراتورلارىنىڭ كومەگىمەن تۇرلەندىرۋ ارقىلى قۋات كوزىن العان كەزدە شيكىزاتتى ساتىپ الۋ – تاسىمالداۋدىڭ, قالدىقتاردى شىعارۋدىڭ قاجەتتىلىگى بولماي قالادى. سول ساتتە ەلەكتر قۋاتىن بەرۋشى كومپانيالاردان دەربەستىككە قول جەتكىزىلەدى جانە ءبىر ارتىقشىلىعى, ەكولوگيانى لاستايتىن قالدىقتاردان ارىلىپ, تابيعي رەسۋرستار ۇنەمدەلەدى. ەلگە دە وتە پايدالى. ماسەلەن, وتىن ەلەكتر قۋاتىنىڭ شىعىندارى ءبىرشاما قىسقارماق. تاعى ءبىر ءتيىمدى جەرى, اتموسفەرالىق جىلۋ دەڭگەيىنە ەشقانداي اسەر ەتپەيدى, ونىڭ ۇستىنە تابيعاتتىڭ وتتەگى قورىن ساقتايدى.
ءدال وسى وڭىردە العاشقى جەل ەلەكتر ستانساسى 2011 جىلى پايدالانۋعا بەرىلىپ, 45 مۆت ەنەرگيا قۋاتىن وندىرە باستاعانىن ايتا كەتۋ كەرەك. بۇل قازاقستانداعى ەڭ العاشقى ونەركاسىپ دەڭگەيىندەگى قۋات كوزدەرىنىڭ ءبىرى بولعانىن دا ەسكە الساق ارتىق بولماس. اتالعان ستانسا 2019 جىلى قۇنى 3,9 ملرد تەڭگە تۇراتىن 169 947 340 كۆت ەلەكتر قۋاتىن ءوندىردى. 2020 جىلدىڭ ءساۋىر ايىنا دەيىن قۇنى 327,1 ملن تەڭگەگە باعالاناتىن 14 422 000 كۆت ەلەكتر قۋاتىن ءوندىرىپ, حالىقتىڭ كادەسىنە جاراتتى. ال ەرەيمەننىڭ ەتەگىندەگى ەل وسىنداي جاقسىلىقتىڭ شاراپاتىن بىرنەشە جىلدان بەرى كورىپ كەلەدى. كەيىن قاتارعا قوسىلعان «Golden Energy Corp» جاۋاپكەرشىلىگى شەكتەۋلى سەرىكتەستىگى بۇرىنعى قۋاتقا ۇستەمەلەپ ۇلەس قوسپاق. جەل ەلەكتر ستانساسىنىڭ قۋاتى – 30 مۆت. جوبا قۇنى 5,6 ملرد تەڭگەنى قۇرايدى. ازىرگە قۇرىلىس جۇمىستارىنىڭ العاشقى كەزەڭى اياقتالىپ, ءۇش تۋربينا قاتارعا قوسىلعان. ەكىنشى كەزەڭدە 25 مۆت قۋات وندىرەتىن 14 تۋربينا ىسكە قوسىلماق. سول كەزدە 12 جۇمىس ورنى اشىلادى.
«Ereymentau Wind Power» جاۋاپكەرشىلىگى شەكتەۋلى سەرىكتەستىگىنىڭ جەل ەلەكتر ستانساسى جالپى قۋاتى 4,8 مۆت بولاتىن 11 تۋربينانىڭ قۇرىلىسىن جۇرگىزۋدە. قازىرگى كەزدە قۇرىلىس-مونتاج جۇمىستارى ورمەك جۇزىنەن اۋدى. ۇستىمىزدەگى جىلدىڭ ەكىنشى توقسانىندا باستالعان قۇرىلىس جۇمىستارى 2021 جىلى تولىق اياقتالادى. ستانسانىڭ قۇرىلىسىنا 160 ادام تارتىلعان. تولىق پايدالانۋعا بەرىلگەن كەزدە تۇراقتى 8 جۇمىس ورنى اشىلادى. وڭىرگە قۇيىلعان ينۆەستيتسيا قۇنى 26,6 ملرد تەڭگەنى قۇرايدى.
جەل ەلەكتر ستانساسى جىلىنا 180 ملن كۆت ەنەرگيا ءوندىرۋدى كوزدەپ وتىر. پايدالانۋعا بەرىلگەننەن كەيىن ءوڭىردى ەلەكتر ەنەرگياسىمەن تۇراقتى قامتاماسىز ەتۋدىڭ سەنىمدى كوزى بولادى ءارى قالا بيۋدجەتىن تولتىرۋعا يگى اسەر ەتەدى. از دا بولسا جۇمىس ورىندارى اشىلىپ, اۋدانداعى جۇمىسسىزدىقتى جويۋعا دا سەپتىگىن تيگىزەدى.
اقمولا وبلىسى,
ەرەيمەنتاۋ اۋدانى
