ZOOM قوسىمشاسى ارقىلى وتكەن كونفەرەنتسياعا ەمحانا دارىگەرلەرى, سونداي-اق 10 شاقتى جۇكتى ايەل قاتىستى. ولار تومەندەگى سۇراقتار بويىنشا اقىل-كەڭەس پەن جاۋاپ الدى:
- COVID-19 ينفەكتسياسى بولعان جاعدايدا "كەسار تىلىگىن" جاساۋ كەرەك پە؟
- ۆيرۋس ۇرىققا انادان بەرىلە مە؟
- كوروناۆيرۋس ينفەكتسياسىنان قالاي ساقتانۋعا بولادى؟
دارىگەرلەردىڭ ايتۋىنشا, COVID-19 ۆيرۋسى بار جۇكتى ايەلدەرگە "كەسار تىلىگىن" جاساۋ مىندەتتى ەمەس. بوسانۋ پروتسەسىندە حيرۋرگيالىق ءتاسىلدى تەك اكۋشەرلىك كورسەتىلىمدەر مەن بەلگىلەر بولعان كەزدە عانا جاسالادى. شەت مەملەكەتتەردىڭ تاجىريبەسى كورسەتكەندەي, ۆيرۋس جۇقتىرعان انالاردان تۋىلعان بالالار ۆيرۋسقا وڭ ناتيجەسىن بەرگەن جوق. ال, كوروناۆيرۋستى جۇقتىرماس ءۇشىن جەكە گيگيەنا مەن ماسكا رەجيمىن ساقتاۋ قاجەت.
جۇكتى ايەلدە تومەندەگى بەلگىلەر پايدا بولعان كەزدە دەرەۋ مەديتسينالىق كومەككە جۇگىنۋى كەرەكتىگىن دارىگەرلەر ەسكەرتەدى:
- دەنە قىزۋىنىڭ جوعارى بولۋى
- جوتەل
- تىنىس الۋدىڭ قيىنداۋى
- السىزدىك
- باس اۋرۋى
- بۇلشىق ەتتەردىڭ اۋىرسىنۋى
- جۇرەك اينۋى
- قۇسۋ
- ديارەيا
مەديتسينا ماماندارى مۇنداي اقىل-كەڭەستەردى ءار 10 كۇن سايىن وتكىزۋدى جوسپارلاپ وتىر. دارىگەرلەردىڭ كەلەسى ونلاين-كونفەرەنتسياسى مۇگەدەك جاندارمەن وتەدى.
قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.
