بۇدان بىرنەشە كۇن بۇرىن سانكت-پەتەربۋرگتەگى «ەكسپەريمەنت» تەاترى قازاقتىڭ كورنەكتى جازۋشى-دراماتۋرگى دۋلات يسابەكوۆتىڭ «ەسكى ۇيدەگى كەزدەسۋ» اتتى پەساسىن ساحناعا شىعاردى. نەۆا جاعالاۋىنداعى قالانىڭ ونەر ۇجىمى بۇل درامالىق تۋىندىدان تۋعان قويىلىمدى «ترانزيتنىي پاسساجير» دەپ اتادى.
بۇدان بىرنەشە كۇن بۇرىن سانكت-پەتەربۋرگتەگى «ەكسپەريمەنت» تەاترى قازاقتىڭ كورنەكتى جازۋشى-دراماتۋرگى دۋلات يسابەكوۆتىڭ «ەسكى ۇيدەگى كەزدەسۋ» اتتى پەساسىن ساحناعا شىعاردى. نەۆا جاعالاۋىنداعى قالانىڭ ونەر ۇجىمى بۇل درامالىق تۋىندىدان تۋعان قويىلىمدى «ترانزيتنىي پاسساجير» دەپ اتادى.
«ەسكى ۇيدەگى كەزدەسۋ» – دۋلات يسابەكوۆتىڭ كەڭىنەن تانىلعان پەسالارىنىڭ ءبىرى. وسى كەزگە دەيىن ول قازاقستاندى بىلاي قويعاندا, الەمنىڭ كوپتەگەن ەلدەرىنىڭ تەاتر ساحنالارىندا تابىستى قويىلىپ ۇلگەرگەن. بۇل جولى تالانتتى جازىلعان تۋىندىعا رەسەيلىك رەجيسسەرلەر نازار اۋدارىپتى.
پەساعا وزەك ەتىپ الىنعان وقيعالار وتكەن عاسىردىڭ 80-جىلدارىندا الماتى قالاسىندا ورىن العان. شىعارمانىڭ باس كەيىپكەرى اراعا 20 جىل سالىپ, ءوزىنىڭ بۇرىنعى پاتەرىنىڭ تابالدىرىعىنان اتتايدى. وسىندا كەلىپ, ونىڭ جاڭا تۇرعىندارىمەن تانىسادى. مىنە, سولاردىڭ ديالوگتارى ارقىلى دراماتۋرگ زاماننىڭ وزەكتى ماسەلەلەرىن سۋىرتپاقتاپ العا شىعارادى. ادامداردىڭ قاتىگەزدىگى, مەيىرىمسىزدىگى, ءبىر-بىرىنە نەمقۇرايدىلىعى اڭگىمەنىڭ نەگىزگى ارقاۋىنا اينالادى.
جازۋشى كوتەرگەن سول پروبلەمالار كۇنى بۇگىن دە ءوزىنىڭ اكتۋالدىلىعىن جويعان جوق. مۇنى سانكت-پەتەربۋرگتەگى قويىلىم تاعى دا بايقاتتى. جۇرتشىلىق سپەكتاكلدى وتە جىلى قابىلدادى. سوندىقتان دا كورەرمەن قاۋىم قويىلىم اياقتالعاننان كەيىن بىردەن تاراپ كەتپەي, ونداعى كوتەرىلگەن ماسەلەلەردى قىزۋ تالقىلادى.
جالپى, «ەسكى ۇيدەگى كەزدەسۋ» – دۋلات يسابەكوۆتىڭ نەۆا جاعاسىنداعى قالا تەاترلارىندا قويىلىپ وتىرعان ءۇشىنشى پەساسى. بۇعان دەيىن بۇل تۋىندى كورەيا, تۇركيا, بولگاريا جانە ازەربايجان سياقتى ەلدەر ساحنالارىندا قويىلعان بولاتىن. جاقىن ارادا ول لوندون تورىنەن دە كورىنەدى دەپ كۇتىلۋدە.
مۇرات ايتقوجا.
