سۋرەتتەر پرەزيدەنتتىڭ ءباسپاسوز قىزمەتىنەن الىندى
كەزدەسۋدە باس پروكۋرور قازاقستان پرەزيدەنتىنىڭ داعدارىسقا قارسى شارالاردى جۇزەگە اسىرۋ كەزىندە زاڭدىلىقتى ساقتاۋ جونىندە بەرگەن تاپسىرمالارىنىڭ ورىندالۋ بارىسى تۋرالى اقپارات بەردى.
عيزات نۇرداۋلەتوۆ جول جوندەۋگە جانە الەۋمەتتىك ينفراقۇرىلىم نىساندارىن سالۋعا باعىتتالعان 130 تەندەر وتكىزۋ كەزىندە زاڭسىزدىقتار انىقتالعانىن ايتتى. سونىڭ ارقاسىندا 16,5 ميلليارد تەڭگە كولەمىندەگى بيۋدجەت سوماسى ساقتالىپ قالعان. سونىمەن قاتار «جۇمىسپەن قامتۋدىڭ جول كارتاسى» باعدارلاماسى اياسىندا جالعان جۇمىسپەن قامتۋدىڭ 6 مىڭ فاكتىسى بەلگىلى بولعان.
باس پروكۋرور ءدارى-دارمەك دايىنداۋ بويىنشا بىرقاتار زاڭ بۇزۋشىلىقتاردىڭ جولى كەسىلگەنى جايىندا باياندادى. ونىڭ ايتۋىنشا, ءدارى-دارمەكتەردى ءوز قۇنىنان جوعارى باعامەن ساتىپ الۋ, مەملەكەتتىك ساتىپ الۋ پروتسەدۋرالارىنىڭ جۇيەلى تۇردە بۇزىلۋى, ءتيىمسىز جوسپارلاۋ مەن باعانى بۇرمالاۋ فاكتىلەرى انىقتالعان. قۇقىق قورعاۋ ورگاندارى زاڭسىز اينالىمنان 400 000 بۋما ءدارى-دارمەك پەن جالپى سوماسى 1 ميلليارد تەڭگەنى قۇرايتىن 12 ميلليون مەديتسينالىق بەتپەردە تاركىلەگەن.
سونداي-اق عيزات نۇرداۋلەتوۆ قىلمىس دەڭگەيىنىڭ 35%-عا قىسقارعانىن اتاپ ءوتتى. ال ۇرلىق جاساۋ, توناۋ, بۇزاقىلىق جانە زورلاۋ ەكى ەسە ازايعان.
پروكۋرورلار ازاماتتاردىڭ قۇقىقتارىن قورعاۋ ماقساتىندا بيىل 54 ادامعا قاتىستى دالەلسىز قوزعالعان قىلمىستىق ءىستى توقتاتقان, سونىمەن قاتار قىزمەتتىك مەكەمەلەر مەن يزولياتورلاردان 500 ادام بوساتىلعان. پروكۋرورلاردىڭ ناقتى جۇمىسىنىڭ ناتيجەسىندە 585 ازاماتقا قاتىستى سوت شەشىمدەرى زاڭعا سايكەستەندىرىلگەن.
مەملەكەت باسشىسى قاسىم-جومارت توقاەۆ ءتارتىپ بۇزۋشىلىقتاردىڭ الدىن الىپ, كىنالىلەردى جازالاۋدا ناقتى ءىس-قيمىل قابىلداۋ ارقىلى داعدارىسقا قارسى شارالاردىڭ جۇزەگە اسۋىن باقىلاۋدى جالعاستىرۋ كەرەك دەپ تاپسىردى. بۇدان بولەك پرەزيدەنت قۇقىق قورعاۋ ورگاندارىنىڭ قىلمىسپەن كۇرەس قىزمەتىن ۇيلەستىرۋدى كۇشەيتۋ قاجەت ەكەنىن اتاپ ءوتتى.
