ەلوردا • 18 تامىز، 2020

نۇر-سۇلتاندا №1 قالالىق اۋرۋحانادان ۆيرۋستىق پنەۆمونيامەن اۋىرعان سوڭعى ناۋقاس ەمدەلىپ شىقتى

بۇگىن نۇر-سۇلتانداعى № 1 كوپسالالى قالالىق اۋرۋحاناسىنان كۆي-مەن اۋىرعان سوڭعى ناۋقاس شىعارىلدى. ينفەكتسيالىق ستاتسيونارعا ايەل 4 تامىزدا تۇسكەن. اۋرۋحاناعا جاتقىزار الدىندا تەكسەرىستەن وتكەن ايەلدەن ەكىجاقتى ۆيرۋستىق پنەۆمونيا انىقتالعان. بۇل تۋرالى ەلوردا اكىمدىگىنىڭ ءباسپاسوز قىزمەتىنە سىلتەمە جاساي وتىرىپ Egemen.kz حابارلايدى.

ايىم ءداۋىت

"اۋرۋحاناداعى بارلىق مەديتسينا قىزمەتكەرلەرىنە ريزامىن. جىلى قارىم-قاتىناس تانىتىپ، ناۋقاستار ءۇشىن ۇيدەگىدەي جاعداي جاسادى. دارىگەر تەك دارىمەن ەمەس، جانىمەن دە ەمدەي الاتىنىن سەزىندىم"، دەپ العىس ءبىلدىردى ايەل.

ناۋقاستىڭ ايتۋىنشا، ول 28 شىلدەدە ءوزىن جايسىز سەزىنىپ، ۇيدە ەمدەلگەن. كەيىن دەنساۋلىعى جاقسارماعان سوڭ اۋرۋحاناعا بارعان. ول كلينيكالىق كورسەتكىشتەرگە سايكەس دەرەۋ اۋرۋحاناعا جاتقىزىلدى. ەمدەۋدىڭ تولىق كۋرسى جۇرگىزىلدى.

"1 كوپسالالى قالالىق اۋرۋحانا جۇقپالى اۋرۋلار ستاتسيونارىنا اينالعان ساتتەن باستاپ، 3،8 مىڭنان استام كوروناۆيرۋس ينفەكتسياسى مەن اۋىر جانە ورتاشا پنەۆمونيامەن اۋىراتىن ناۋقاس ەمدەلدى. ولاردىڭ شامامەن 3،5 مىڭى سىرقاتىنان ايىعىپ، ۇيلەرىنە ورالدى"، دەيدى اۋرۋحانانىڭ باس دارىگەرى مارات ءابدۋوۆ.

اتالعان ستاتسيونار جۇمىسىنا بارلىعى 367 دارىگەر جۇمىلدىرىلدى. 18 تامىزدان باستاپ № 1 كوپسالالى قالالىق اۋرۋحانا ينفەكتسيالىق ستاتسيونار رەتىندە ءوز قىزمەتىن توقتاتىپ، شتاتتىق رەجيمدە جۇمىسىن جالعاستىرادى.

18 تامىزداعى جاعداي بويىنشا نۇر-سۇلتاندا قالانىڭ جەتى ستاتسيونارىندا 301 ناۋقاس كۆي اۋرۋىنان ەمدەلۋدە. قالا بويىنشا پنەۆمونيامەن اۋىراتىن ناۋقاستار سانى 5 شىلدەدەن باستاپ 1 333-تەن 179 ادامعا دەيىن ازايدى.

قازاقستانداعى جانە الەمدەگى سوڭعى جاڭالىقتاردى ءبىرىنشى بولىپ وقۋ ءۇشىن Telegram جەلىسىندە بىزگە جازىلىڭىز.