كەزدەسۋ بارىسىندا قاۋىپسىزدىك كەڭەسىنىڭ توراعاسى نۇرسۇلتان نازارباەۆ ۇلتتىق قاۋىپسىزدىكتىڭ احۋالىنا باقىلاۋ جۇرگىزۋدىڭ, پاندەميا جاعدايىندا زاڭدىلىقتى ساقتاۋ مەن ءتارتىپتى قامتاماسىز ەتۋدىڭ ماڭىزدىلىعىنا توقتالدى.
ەلباسى كارانتيننىڭ جەڭىلدەۋىنە بايلانىستى ەپيدەميالىق قاۋىپسىزدىكتى قامتاماسىز ەتۋ قاجەتتىگىن اتاپ ءوتتى.
– بۇگىننەن باستاپ كارانتين شارالارىن جەڭىلدەتۋ تۋرالى شەشىم قابىلداندى. الايدا ادامدار جاۋاپكەرشىلىكتى تولىق سەزىنۋى قاجەت. ءار ادام ءوز دەنساۋلىعىن ساقتاۋ كەرەك, – دەدى قازاقستاننىڭ تۇڭعىش پرەزيدەنتى.
ءوز كەزەگىندە اسەت يسەكەشەۆ قاۋىپسىزدىك كەڭەسى اپپاراتىنىڭ ىقتيمال قاۋىپ-قاتەرلەردى تالداۋ جانە الدىن الۋ بويىنشا جۇرگىزىپ جاتقان جۇمىستارى تۋرالى باياندادى.
– قاۋىپ-قاتەرلەرگە تالداۋ تۇراقتى تۇردە جۇرگىزىلەدى. ءار سالا بويىنشا مونيتورينگ جاسالىپ, ولاردى شەشۋ ءۇشىن شارالار ۇسىنىلادى. قازىرگى نەگىزگى ماسەلە – كوروناۆيرۋس پاندەمياسى. قاۋىپسىزدىك كەڭەسىنىڭ اپپاراتى كەڭەستىڭ شەشىمدەرىن ەسكەرە وتىرىپ, جاعدايعا باقىلاۋ جۇرگىزەدى, بىرقاتار ماسەلەلەر بويىنشا ناقتى ۇسىنىستار ەنگىزەدى. قىلمىستىق احۋالعا كەلەر بولساق, جالپى رەسپۋبليكا بويىنشا قىلمىس سانى وتكەن جىلمەن سالىستىرعاندا 34 پايىزعا ازايعان. جاعداي باقىلاۋدا. بىرقاتار سالالاردا قىلمىستىڭ تومەندەۋ قارقىنى بايقالىپ وتىر, – دەدى ءا.يسەكەشەۆ.
