ماراپاتتاۋ راسىمىندە ارحيمەد مۇحامبەتوۆ ىندەتكە قارسى كۇرەستىڭ ەڭ الدىڭعى شەبىندە مەديتسينا قىزمەتكەرلەرىنىڭ جۇرگەنىن اتاپ ءوتتى.
- قازىر بۇكىل الەم كورونوۆيرۋس ينفەكتسياسىنىڭ ەتەك الۋىنا بايلانىستى اسا كۇردەلى كەزەڭدى باستان كەشىرىپ جاتىر. قۇرمەتتى مەديتسينا قىزمەتكەرلەرى, سىزدەر ادام ءومىرى مەن دەنساۋلىعى ءۇشىن بولىپ جاتقان كۇرەستىڭ ۇنەمى الدىڭعى قاتارىندا بولا بىلدىڭىزدەر.
بۇگىندە وبلىستىڭ دەنساۋلىق ساقتاۋ سالاسىندا 15 مىڭ مەديتسينالىق قىزمەتكەر ەڭبەك ەتەدى. ونىڭ 1800-ءى دارىگەر ماماندار بولسا, 6 مىڭنان استامى – ورتا مەديتسينا قىزمەتكەرلەرى.
ايماقتا مىڭنان استام مەديتسينا قىزمەتكەرى ىندەتكە قارسى كۇرەس جۇرگىزىپ جاتىر. ولارعا 2 ملرد تەڭگەنىڭ ۇستىندە قوسىمشا وتەماقى تولەندى.
قازىر ءوڭىردىڭ دەنساۋلىق ساقتاۋ سالاسىن ماماندارمەن قامتۋ جۇمىسى جالعاسۋدا. 2019 جىلى قوستاناي وبلىسىنا 265 دارىگەر كەلسە, بيىل دەنساۋلىق ساقتاۋ سالاسىنا بارلىعى 227 مامان شاقىرتىلىپ وتىر. وڭىرگە كەلگەن دارىگەرلەرگە كوتەرمە اقى تولەنىپ, باسپانا بەرىلۋدە, - دەدى ايماق باسشىسى.
«قۇرمەت» وردەنىن ومىراۋىنا تاققان وبلىستىق جەدەل جاردەم ستانساسىنىڭ باس دارىگەرى يرينا شتەيگەرۆالد پرەزيدەنت قاسىم-جومارت توقاەۆقا شىنايى العىسىن ارنادى.
- ەڭ الدىمەن مەملەكەت باسشىسىنا دارىگەرلەرگە قامقورلىق پەن قولداۋ كورسەتىپ جاتقانى ءۇشىن ريزاشىلىق بىلدىرەمىن. مەنىڭ جۇمىسىمدى جوعارى باعالاعاندارىڭىز ءۇشىن شىن جۇرەكتەن قۋانىپ تۇرمىن. پاندەميا مەديتسينا قىزمەتكەرلەرىن جۇمىلا جۇمىس ىستەۋگە ۇيرەتتى. پاندەميا ءبىزدىڭ ارقايسىمىزدى ءاربىر ناۋقاسقا ەرەكشە نازار اۋدارا بىلۋگە ۇيرەتتى. ەڭ باستىسى ءبىز كوپ بولىپ كوماندامەن جۇمىس ىستەۋگە ۇيرەندىك. مەن بۇگىن جوعارى مەملەكەتتىك ناگرادالارمەن ماراپاتتالعان ءاربىر مەديتسينا قىزمەتكەرىن ماقتان ەتەمىن, - دەدى وردەن يەسى.
