1430.kz سايتىنا قولداعى تالداۋ ناتيجەلەرىن جۇكتەي وتىرىپ, بەينە جانە اۋديو بايلانىس رەجىمىندە كەڭەستەر الا الاسىز. بۇل ءۇشىن اۋەلى سايتقا ەسىمىڭىزدى, تەلەفون ءنومىرىڭىزدى كورسەتە وتىرىپ, تىركەۋدەن ءوتۋ قاجەت. سودان سوڭ وڭ جاق جوعارعى بۇرىشتا تىركەلگەن پاتسيەنتتىڭ اتى شىعادى, سونى باسۋ كەرەك. «فايلدار» قويىندىسىنا ءوتىپ, وڭ جاقتا «فايلدى جۇكتەۋدى» تاڭداڭىز, مۇندا ءسىز تالداما ناتيجەلەرىن قوسا الاسىز. سونداي-اق دارىگەرگە جازىلۋ ءۇشىن سايتتىڭ باستى بەتىنە ءوتۋ قاجەت, ىزدەۋ جولاعىنا (سول جاقتا) دارىگەردىڭ اتى-ءجونىن, كونسۋلتاتسيا ۋاقىتىن جازىپ, قابىلداۋعا جازىلا الاسىز. ال «ماسەلەنىڭ سيپاتتاماسى» بولىمىنە ءسىزدى نە مازالايتىنىن قىسقاشا جازۋعا بولادى. ودان كەيىن «تولەۋ» ءبولىمىن تاڭدايسىز.
باستى بەتتە دارىگەرلەردىڭ اتى-ءجونى, ولاردىڭ ءپروفيلى, جۇمىس ءوتىلى, سونداي-اق ونلاين قابىلداۋ ۋاقىتى كورسەتىلگەن «دارىگەرلەر» ءبولىمى بار.
سايتتىڭ باستى بەتىندەگى تەگتەر بويىنشا قاجەتتى ماماندى تابۋعا بولادى. مىسالى, «تۇقىم قۋالايتىن اۋرۋلار» بەلگىسىن تاڭداعاندا, گەنەتيك دارىگەر تۋرالى مالىمەتتەر, تاجىريبەسى مەن كەڭەس بەرۋ قۇنى كورسەتىلگەن ءپروفيلى اشىلادى.
ناۋقاس قابىلداۋعا جازىلعاننان كەيىن دارىگەر جازبا تۋرالى حابارلاما الادى, پاتسيەنتتىڭ تالدامالارىمەن جانە ونىڭ مەديتسينالىق كارتاسى بار جازبامەن الدىن-الا تانىسىپ, زەرتتەيدى. وسىدان كەيىن, بەلگىلەنگەن ۋاقىتتا دارىگەر بەينەكەڭەس جۇرگىزەدى. قاجەت بولعان جاعدايدا ول كۇندىزگى قابىلداۋعا جازا الادى.
سونداي-اق 1430 ءنومىرى بار بايلانىس ورتالىعى جانە 1430 ءموبيلدى قوسىمشاسى جۇمىس ىستەيدى. قوسىمشادا ءسىز دارىگەرگە ونلاين-قابىلداۋعا جازىلا الاسىز, تالدامالار مەن مەديتسينالىق قورىتىندىلاردى قوسا جۇكتەپ, كەڭەستەردى باقىلاي الاسىز. 1430.kz ءموبيلدى قوسىمشاسى Android پلاتفورماسىندا قولجەتىمدى. ونى Play Market-تە ىزدەۋ جولاعىنا «1430.kz» دەپ ەنگىزىپ جۇكتەۋگە بولادى. ايتا كەتۋ كەرەك, كارانتين كەزىندە تاجىريبەلى دارىگەرلەر 1430.kz سايتىندا تەگىن بەينەكەڭەستەر بەردى. قازىرگى ۋاقىتتا پورتالدا قازاقستاننىڭ بىرقاتار قالالارىنان ونلاين-قابىلداۋلار جۇرگىزەتىن 826 بىلىكتى دارىگەر تىركەلگەن.
