ايماقتار • 17 تامىز، 2020

كول قامىسىنان ارىلسا...

358 رەت كورسەتىلدى

سوڭعى جىلدارى تانانىڭ كوزىندەي جارقىراپ جاتاتىن قوپا كولىن قاۋلاي وسكەن قامىس باسىپ كەتتى. قوپاعا قۇياتىن قىلشاقتى وزەنىن دە تۇيەنىڭ بويىنداي قاۋ باسقان. رابايسىز وسكەن وسىمدىكتەردىڭ سالدارىنان كول سۋى دا، وزەن سۋى دا لاستانۋدا. قازىرگى كۇنى وبلىستىق تابيعي رەسۋرستار باسقارماسىنىڭ ماماندارى ارنايى جوبا شەڭبەرىندە تازارتۋ جۇمىستارىن جۇرگىزۋدە.

كوكشەتاۋ قالاسىنىڭ ءدال ىرگەسىندەگى قوپا كولى لاستانعالى قاي زامان؟! كول باعى كەشەگى كەڭەس زامانىندا تايعان. كولگە قۇيا­تىن شاعالالى وزەنىنىڭ بويىنا زەرەندى، ساندىقتاۋ اۋداندارىنىڭ شارۋاشىلىقتارى مال قورالارىن تاقاپ سالعاننان بەرى سۋ لاستاندى. «جىعىلعانعا جۇدىرىق» دە­گەندەي، قامىس ءوسىپ، بالدىر با­سىپ كەتتى. كولدىڭ سانيتارلىق-ەكو­لوگيالىق جاعدايىنىڭ ۋشى­عۋىنا قىلشاقتى وزەنىنىڭ احۋالى دا سەبەپ بولىپ تۇر. قازىرگى كۇنى ماماندار وزەن ارناسىن سۋاستى وسىمدىكتەرىنەن تازارتۋعا كىرىسۋدە. ەكولوگيالىق جوبا بەس ۋچاسكەگە بولىنگەن.

– باسقارما قوپا كولىن تازارتۋ جولىن جان-جاقتى زەردەلەي كەلە، جاڭا جوبا ازىرلەدى، – دەي­دى وبلىستىق تابيعي رەسۋرستار مەن تابيعاتتى پايدالانۋدى رەتتەۋ باسقارماسى باسشىسىنىڭ ورىن­باسارى بولات توقىشەۆ، – ەلى­مىزدەگى وبلىس ورتالىقتارى ىشىندە ىرگەسىندە ءدال وسىنداي كولى بار، جيەكتە قوس وزەنى اعىپ جاتقان قالا كوكشەتاۋ عانا. سوندىقتان ەكولوگيالىق جاعدايدى ساۋىق­تىرىپ، تابيعاتتىڭ تارتۋىن ەلدىڭ يگىلىگىنە جاراتۋ پارىز.

قازىر اتالعان ۋچاسكەدە 15 ادام جۇمىس ىستەيدى. قاجەتتى تەحني­كا­لارمەن قامتاماسىز ەتىلگەن. تا­زارتۋ جۇمىستارى قىركۇيەك ايىن­دا تولىق اياقتالماق، ازىرگە جارتىسى ەڭسەرىلىپ قالىپتى. مەردىگەر ماكسيم كاربۋشەۆتىڭ ايتۋىنا قاراعاندا، ەكى مىڭ تەكشە مەتردەن استام قوقىس شىعارىلعان. وزەن ارناسىنداعى سۋاستى وسىمدىكتەرىن شابۋ ءۇشىن ارنايى تەحنيكا ساتىلىپ الىنعان. بۇل ورايدا سۋ كوزىن تازالايتىن بەلارۋس تەحنولوگياسى الدەقايدا ۇتىمدى ەكەن.

– «لك-12ا» قۇرىلعىسى سۋاس­تى ءشوبىن شابۋعا ارنالعان. رەتىنە قاراي ساعاتىنا 0،8 گەكتارعا دەيىن تازارتا الادى، – دەيدى ينجەنەر ءادىل ءابجانوۆ.

كەلەسى كەزەكتە قىلشاقتى وزە­نىنىڭ باسقا ۋچاسكەلەرىن تازارتۋ جوسپارلانۋدا. مامانداردىڭ ايتۋىنا قاراعاندا، جوبا تولىق جۇزەگە اسىرىلعان كەزدە ەكولو­گيالىق جاعداي اناعۇرلىم ساۋىعا تۇسپەك.

 

كوكشەتاۋ

 

سوڭعى جاڭالىقتار

اراق ساتىلمايتىن اۋدان

ايماقتار • كەشە

ەرلىككە تولى سۋرەتتەر

رۋحانيات • كەشە

ۇقساس جاڭالىقتار