اربيگەن اۋىلىنىڭ حالقى توقىراۋ جىلدارى قۇرىلىسى اياقتالماي قالعان مادەنيەت ءۇيىن اپا-اتالار, اعايىن-تۋىس, كورشى-قولاڭ, بالا-شاعا بولىپ وسى كۇنگە دەيىن ساقتاپ كەلدى. بىرەۋلەر بۇزىپ الىپ كەتپەسىن دەپ اۋىلدىڭ ۇلكەن-كىشىسى بار كۇنى-ءتۇنى كادىمگىدەي كۇزەتتى. ءسويتىپ جۇرگەندە, «اۋىل جىلدارى باعدارلاماسى» دا ءوتتى. وبلىستىق «اق بۇلاق» باعدارلاماسى ءتىپتى اربيگەن اۋىلى جاققا بۇرىلعان دا جوق. بۇل جايىندا ءبىز دە گازەتىمىزدە بىرنەشە رەت جازىپ, سول كەزدەگى اكىمدەرگە قۇلاققاعىس ەتكەن بولاتىنبىز.
اربيگەن اۋىلىنىڭ حالقى توقىراۋ جىلدارى قۇرىلىسى اياقتالماي قالعان مادەنيەت ءۇيىن اپا-اتالار, اعايىن-تۋىس, كورشى-قولاڭ, بالا-شاعا بولىپ وسى كۇنگە دەيىن ساقتاپ كەلدى. بىرەۋلەر بۇزىپ الىپ كەتپەسىن دەپ اۋىلدىڭ ۇلكەن-كىشىسى بار كۇنى-ءتۇنى كادىمگىدەي كۇزەتتى. ءسويتىپ جۇرگەندە, «اۋىل جىلدارى باعدارلاماسى» دا ءوتتى. وبلىستىق «اق بۇلاق» باعدارلاماسى ءتىپتى اربيگەن اۋىلى جاققا بۇرىلعان دا جوق. بۇل جايىندا ءبىز دە گازەتىمىزدە بىرنەشە رەت جازىپ, سول كەزدەگى اكىمدەرگە قۇلاققاعىس ەتكەن بولاتىنبىز.
بىلتىر اۋىل اقساقالى, ارداگەر ۇستاز قورعان اشاتاي ۇلى وبلىس اكىمى ەرلان ارىنعا مادەنيەت ءۇيىنىڭ جاي-كۇيىن ايتىپ, ءوتىنىشىن جەتكىزدى. اتامىز كەزىندە دىنمۇحامەد قوناەۆقا دا اۋىل حالقى اتىنان ءوتىنىش جازىپ, اربيگەنگە قازاق مەكتەبىن سالدىرعان ەدى. وبلىسقا دا, اۋدانعا دا تالاي اكىم كەلدى, كەتتى. قورعان اقساقال ولاردىڭ بارىنە دە ارىز-ءوتىنىش جازۋدان جالىقپادى. وزگە اكىمدەر جۇرە تىڭداعان اۋىلدىڭ ءوتىنىشى بۇل جولى جەردە قالمادى. ە.ارىن ايتقان ۋادەسىندە تۇردى. وبلىستىق بيۋدجەتتەن قارجى ءبولىندى. قۇرىلىسى اياقتالماي, اۋىل ورتاسىندا بوس تۇرعان مادەنيەت ءۇيىنىڭ جوندەۋ جۇمىستارىن وبلىس ورتالىعىنداعى «Azia LTD – پاۆلودار» سەرىكتەستىگى جۇرگىزدى. ال قازىر اۋىلدا اۋىلدىقتار وزدەرى ءبىر كىرپىشىن دە بۇزدىرماي ساقتاپ قالعان اسەم ءزاۋلىم عيمارات پايدا بولدى. مادەنيەت ۇيىندە كىتاپحانا, مەديتسينالىق بولىمشە ورنالاستى.
– ويپىرىم-اي! ءۇمىت ۇزبەي تالاي جىل كۇتتىك-اۋ. ەل مەن جەردىڭ ءبىر شەتىن ساقتاپ, اۋىلدا ەل وتىرعانىن كەيبىر باسشىلاردىڭ ۇمىتىپ كەتەتىنى جانعا باتتى. اۋىل – قازاقتىڭ بەسىگى. مادەنيەت ءۇيىن توناتپاي, كۇنى-ءتۇنى كۇزەتىپ جۇرگەنىمىز دە سول, اۋىلدى ساقتاپ قالۋ. مەن ەرلان ارىنعا سەندىم. اۋىل ىرزا. مادەنيەت ءۇيى اشىلعان كۇنى ءوزى كەلىپ, كىتاپحاناعا اقىن-جازۋشىلاردىڭ 200 كىتابىن سىيعا تارتتى, – دەيدى ق.اشاتاي ۇلى.
ال اۋىل جاعدايى جاقسى, مال جەتەدى, داستارقانى مول. سەرىكباي ءداۋىتوۆ باسقاراتىن «ايان» شارۋا قوجالىعى اسىل تۇقىمدى قارا مال وسىرەدى. شارۋاشىلىق «سىباعا» باعدارلاماسىنىڭ كومەگىمەن 8 ميلليون تەڭگە نەسيەگە سيىر ساتىپ الىپتى. قازىر 60 باس مالى بار. ايتپاقشى, اۋىلداعى دارىگەرلىك بولىمشە بۇرىن دارىگەر قۋانىش قايىرباەۆتىڭ ۇيىندە بولىپتى. ول ەكىباستۇزدىڭ مەديتسينالىق كوللەدجىن بىتىرگەن جاس مامان رەتىندە «ديپلوممەن – اۋىلعا!» باعدارلاماسى بويىنشا وسى اۋىلعا كەلىپتى.
بۇل كۇندەرى اۋدان ورتالىعىندا تۇرعىندار اربيگەن اۋىلىنداعى مادەنيەت ءۇيى سياقتى تالاي جىلدار بويى كۇتىپ ءجۇرگەن 300 وقۋشىعا ارنالعان قازاق مەكتەبىنىڭ قۇرىلىسى جۇرگىزىلۋدە.
فاريدا بىقاي,
«ەگەمەن قازاقستان».
پاۆلودار وبلىسى,
شارباقتى اۋدانى.
