ناقتىراق ايتقاندا, شاراعا قالا اكىمىنەن وزگە كومپوزيتور-ءانشى قۇرالاي ساتمۇحامبەتوۆا, كومپوزيتور, شىمكەنت قالالىق مادەنيەت ءۇيىنىڭ ديرەكتورى نۇرلان ىدىرىس ۇلى اديلحانوۆ, كومپوزيتور قالدىبەك قۇرمانالى, مادەنيەت قايراتكەرى, شىمكەنت قالالىق وپەرا جانە بالەت تەاترىنىڭ انشىسى ءۇرالحان سەيىلبەكوۆا قاتىستى.
ولار ءشامشى ەسكەرتكىشى الدىندا قالداياقوۆ اندەرىنەن پوپۋري ورىنداپ, ەستەلىكتەر ايتتى.
«بۇگىن قازاق حالقىنىڭ رۋحانياتى مەن مۋزىكالىق مادەنيەتىندە وزىندىك ورنى بار دارا دارىن, داڭقتى كومپازيتور ءشامشى قالداياقوۆتىڭ تۋعانىنا 90 جىل تولىپ وتىر. «قۇلاقتان كىرىپ, بويدى الار» اسەم اندەرىمەن حالىقتىڭ ىقىلاسى مەن سۇيىسپەنشىلىگىنە بولەنگەن ونەر يەسىنىڭ توقسان جىلدىعى — بۇكىل ەلىمىزگە ورتاق مەرەكە. تاۋەلسىزدىك جىلدارىندا ءشامشى قالداياقوۆتىڭ شىعارماشىلىعىن ناسيحاتتاۋ باعىتىندا اۋقىمدى ىستەر اتقارىلدى. ەلباسى جارلىقتارىمەن ونەر يەسىنە قازاقستاننىڭ حالىق ءارتىسى اتاعى مەن قازاقستان رەسپۋبليكاسىنىڭ مەملەكەتتىك سىيلىعى بەرىلىپ, ونىڭ «مەنىڭ قازاقستانىم» ءانى مەملەكەتتىك ءانۇران رەتىندە تاڭداپ الىندى. پاندەمياعا قاراماستان بيىل دا وسى ءداستۇر جالعاسىن تاۋىپ وتىر. «شىمكەنت – تمد ەلدەرىنىڭ مادەني استاناسى» ءىس-شاراسىنىڭ اياسىندا ەسترادالىق ءان ورىنداۋشىلار اراسىندا ءشامشى قالداياقوۆتىڭ 90 جىلدىعىنا ارنالعان «مەنىڭ قازاقستانىم» اتتى ونلاين-فەستيۆال وتۋدە. وعان تمد ەلدەرىمەن قاتار اقش پەن تۇركيادان دا تانىمال ورىنداۋشىلار قاتىسۋدا. بۇل — ءشامشى شىعارماشىلىعىن حالىقارالىق دارەجەدە ناسيحاتتاۋعا قوسىلعان ەلەۋلى ۇلەس دەپ بىلەمىز»,- دەدى قالا اكىمى مۇرات ايتەنوۆ.
قازىردە قالادا قالداياقوۆتىڭ 90 جىلدىعىنا ارنالعان ونلاين فورماتتا ادەبي سازدى كەشتەر, ءشامشى ومىرىنە ساياحات, ۆيرتۋالدى كورمە, ونلاين كورمە, ونلاين كاراوكە ت.ب. ءىس-شارالار ۇيىمداستىرىلۋدا.
ايتا كەتەيىك, شىمكەنت قالاسىندا كومپوزيتوردىڭ اتىندا كوشەدەن باسقا فيلارمونيا مەن ساياباق بار.
