قالا اكىمىنىڭ باستاماسىمەن قولعا الىنعان Jasyl Almaty اكتسياسىنىڭ اياسىندا كوكتەمدە 8 مىڭ اعاش جانە 110 مىڭ شارشى مەتر اۋماققا گۇلزار ەگىلدى. كۇزگى ماۋسىمدا شامامەن 250 مىڭ جاسىل جەلەك, ونىڭ ىشىندە 280 مىڭ جاپىراقتى جانە 8 مىڭ قىلقانجاپىراقتى تۇقىمىنان ەگۋ جوسپارلانعان. جاسىل جەلەكتەندىرىلەتىن جالپى اۋماق 452,6 گەكتاردى قۇرايدى.
«كوشەتتەر گەوگرافيالىق, كليماتتىق جانە توپىراق جابىندىسىنىڭ قۇرامىنا قاراي بولىنگەن. ەگىلەتىن كوشەتتەردىڭ نەگىزگى بولىگى شەتسىز قالا قاعيداسى بويىنشا وتىرعىزىلادى. الاتاۋ اۋدانىندا 176,7 مىڭ كوشەت, تۇركسىب اۋدانىندا 40 مىڭ كوشەت, ناۋرىزباي اۋدانىندا 5,5 مىڭ كوشەت ەگىلەدى. نەگىزىنەن جاپاراقتى اعاشتار – تەرەك, شەگىرشىن, ۇيەڭكى, تالشىن, سونىمەن بىرگە جەمىستى – الما, شيە, ورىك اعاشتارىنا باسىمدىق بەرىلەدى», - دەپ اتاپ ءوتتى ن.ليۆينسكايا.
سونىمەن بىرگە, ينۆەستورلار ەسەبىنەن سكۆەرلەر قۇرۋ ءۇشىن 20 جەر ۋچاسكەسى انىقتالعان. بيزنەس قاۋىمداستىقتاردى تارتۋ ارقىلى 35 مىڭ اعاش ەگۋ جوسپارلانعان.
2019 جىلدىڭ قاراشاسىنان باسقارما اعاشتاردى كەسۋگە رۇقسات بەرۋدى توقتاتتى. ون ايدا اعاشتى كەسۋگە قاتىستى 300-دەن استام ءوتىنىش تۇسكەن, ولار بويىنشا سەبەپتەمەلى باس تارتۋ بەرىلدى, جوباعا ارنالعان 33-ءى بويىنشا رۇقسات ەتىلدى.
«رۇقسات ەتىلگەندەر قاتارىنداعى جوبالار نەگىزىنەن مەكتەپتەر, بالالار باقشاسى, تۇرعىن ءۇي كەشەندەرىمەن بايلانىستى, كوشەلەردى, ساياباقتار مەن سكۆەرلەردى رەكونسترۋكتسيالاۋعا باعىتتالعان جوبالار دا بار. ءبىز ولاردى قايتا قارادىق, اۋماققا قالاي كىرۋ كەرەك ەكەنىن, عيماراتتىڭ جانىنداعى كوشەتتەردى دە ەسكەردىك. وسىلايشا, كەسىلۋ كەرەك دەپ شەشىلگەن جاسىل جەلەكتىڭ سانىن ازايتتىق», - دەدى باسقارما باسشىسى. سونىمەن بىرگە ول ۇسىنىلعان جوبالار بويىنشا مودەرنيزاتسيالاۋ جانە ۇسىنىلعان جوبالاردى جاقسارتۋ بويىنشا جۇمىستار جۇرگىزىلگەنىن اتاپ ءوتتى.
رۇقسات بەرۋ كەزىندە كەسىلۋى ءتيىس دەگەن تىزىمگە ەنگەن جاسىل جەلەك سانىن ازايتۋ دەپ جوبانى تۇزەتۋ ۇسىنىلادى جانە سودان كەيىن عانا كەسۋگە رۇقسات ەتىلەدى. وسىلايشا, «دوستىق» ساياباعىندا جوبا قايتا قارالىپ, كەسىلۋى ءتيىس اعاشتار سانى 169-دان 26-عا دەيىن قىسقاردى.
سونىمەن بىرگە, كومپەنساتسيالىق كوشەتتەر ءادىسى قايتا قارالدى, كوشەتتەر ستاندارتقا ساي ەگىلەدى, دىڭگەك ۇزىندىعى 2,5 مەتر, بۇتاق جۇيەسى قالىپتاسقان جانە وتىرعىزىلعاننان كەيىن ەكى جىل بويى مىندەتتى تۇردە كۇتىم قاجەت.
«جاسىل جەلەكتى ساقتاۋدا قوعامنىڭ قوسار ۇلەسى وراسان زور. «جاسىل كوميسسيا» مۇشەلەرى ءاربىر فاكت بويىنشا بارىپ, ءوز ۇسىنىستارىن ايتادى», - دەپ اتاپ ءوتتى باسقارما باسشىسى.
