ايماقتار • 14 تامىز، 2020

اقتوبەدە مەملەكەتتىك قىزمەتشىلەرگە مۋزەيدە ونلاين ەكسكۋرسيا ۇيىمداستىرىلدى

16 رەت كورسەتىلدى

اتالعان ەرەكشە يدەيانىڭ باستاماشىسى اقتوبە وبلىسىنىڭ مەملەكەتتىك قىزمەت ىستەرى دەپارتامەنتى بولدى.

ونلاين تۋر قاتىسۋشىلارعا وبلىستىق تاريحي-ولكەتانۋ مۋزەيىنە ارالاۋعا مۇمكىندىك بەردى.

جىل باسىنان مەملەكەتتىك قىزمەتشىلەرگە ارنالعان بىرقاتار مادەني ءىس-شارالار ەلدەگى قالىپتاسقان جاعدايعا بايلانىستى كەيىنگە شەگەرىلدى.

الايدا ۇيىمداستىرۋشىلار ولاردى جاڭا تەحنولوگيالاردىڭ كومەگىمەن ونلاين فورماتتا وتكۋ تۋرالى شەشىم قابىلدادى.

ەسەسىنە، ونلاين مۋزەيگە تەك مەملەكەتتىك قىزمەتشىلەر ەمەس، ولاردىڭ وتباسى مۇشەلەرى، ءوڭىردىڭ باسقا دا تۇرعىندارى كورە الادى.

بۇل تۋرالى ءوزىنىڭ فەيسبۋك پاراقشاسىندا دەپارتامەنت باسشىسىنىڭ ورىنباسارى رافحات بيسەنوۆ مالىمدەدى.

ونلاين ترانسلياتسيا دەپارتامەنتتىڭ Instagram جانە Facebook الەۋمەتتىك جەلىلەرىندەگى رەسمي اككاۋنتتارىندا جۇرگىزىلدى.

ەكسكۋرسيا بارىسىندا مۋزەي قىزمەتكەرى مۋزەيدىڭ اشىلۋ تاريحى تۋرالى اڭگىمەلەپ، ەكسپوناتتارمەن جانە جادىگەرلەرمەن، قازاقستان اۋماعىن ەجەلگى داۋىردەن ورتا عاسىرلارعا دەيىنگى كەزەڭدە مەكەندەگەن تايپالاردىڭ تاريحىمەن، ەكونوميكاسىمەن، ءدىني كوزقاراسىمەن، قولونەرىمەن جانە ارحيتەكتۋراسىمەن تانىستىردى.

 «بىزگە ونلاين تۋر وتكىزۋ تۋرالى ۇسىنىس تۇسكەندە، بۇل باستامانى قولدادىق. پاندەميا جاعدايىندا كوپتەگەن نىساندار ونلاين رەجيمگە كوشتى، سونىڭ ىشىندە ءبىزدىڭ مۋزەي دە كەلۋشىلەرگە ەسىگىن جاپتى. بىراق بۇگىن ادامدار ۇيلەرىنەن شىقپاي، بىزگە كەلۋگە جانە ەكسپوناتتارمەن تانىسۋعا مۇمكىندىك الدى»، دەدى مۋزەي باسشىسىنىڭ م.ا ارمان ەرجانوۆ.

ونلاين تۋرعا بارلىعى 100دەن استام ازاماتتار قاتىستى.

ۇيىمداستىرۋشىلاردىڭ ايتۋىنشا، مۇنداي ءىس-شارالاردى داستۇرگە اينالدىرۋ جانە جاقىن ارادا وبلىستاعى باسقا دا مادەني جانە تاريحي نىسانداردى ارالاۋ جوسپارلانۋدا.

سوڭعى جاڭالىقتار

ۇقساس جاڭالىقتار